Tumelo ya Batu ba Bañata

“Ne ni lolanga litolo ze maswe inge ni ca mulilo mwa lihele! Ne ni lolanga kuli ni nepezwi mwa liyekuyeku la mulilo mi ne ni pasumukanga inge ni sweli ku bokolola. Ne ni likanga ka t’ata ku sa eza sibi.”—Bo Arline.

KANA mu lumela kuli lihele ki sibaka sa tukufazo se si lukiselizwe baezalibi? Batu ba bañata ba lumela cwalo. Ka mutala, mwa patisiso ya na ezize muluti wa fa sikolo sa yunivesiti sa St. Andrews mwa naha ya Scotland ka silimo sa 2005, na fumani kuli buñata bwa baeteleli ba bulapeli ba mwa Scotland ne ba lumela kuli batu ba ba ikauhanyize ku Mulimu ba ka “tukufazwa mwa munahano ku ya ku ile mwa lihele.” Ba sikai ku bona baeteleli ba bulapeli bao ne ba lumela kuli batu ba ba li mwa lihele ba tukufazwa.

Batu mwa linaha ze ñata ba lumela kuli ku na ni lihele. Ka mutala, mwa patisiso ye ne ezizwe mwa United States ka 2007, ne ku fumanwi kuli batu ba bañata (ibat’o ba 70 pesenti) ba lumela kuli ku na ni lihele. Nihaiba mwa linaha mo batu ba bañata ba sa lumeli ku Mulimu, batu ba sa lumela kuli ku na ni lihele. Mwa patisiso ye ne ezizwe mwa Canada ka 2004, ne ku fumanwi kuli palonyana ya batu (42 pesenti) ne ba lumela kuli ku na ni lihele. Mi mwa Great Britain, batu ba sikai (32 pesenti) ba kozwi luli kuli lihele li teñi.

Ze ba Luta Baeteleli ba Bulapeli

Baeteleli ba bulapeli ba bañata ha ba sa luta batu kuli lihele ki sibaka luli sa mulilo ko ba tukufalezwa batu. Kono ba yemela mutalusezo wo swana ni wo bulezwi mwa Katekisema ka keleke ya Makatolika, ka ne ka hatisizwe ka 1994. Katekisema kao ka bulela cwana: “Koto ye tuna ya lihele ki ku kauhana ni Mulimu ku ya ku ile.”

Nihakulicwalo, batu ba bañata ba sa lumela kuli lihele ki sibaka ko ba tukufalezwa batu mwa munahano ni mwa mubili. Batu ba ba yemela tumelo ye ba ipapata kuli tuto ye cwalo i tomile fa Bibele. Albert Mohler, mueteleli wa kopano ye bizwa Southern Baptist Theological Seminary, u talusa tumelo ya hae ka ku utwahala, u li: “Niti kikuli tumelo ye i tomile fa Mañolo.”

Ki Kabakalañi ha ku li Kwa Butokwa ku Tatuba ze mu Lumela?

Haiba lihele ki sibaka luli sa tukufazo, kaniti mwa swanela ku li saba. Kono haiba tuto ye haki ya niti, baeteleli ba bulapeli ba ba sweli ku luta tuto ye, ba lyanganisa batu ni ku ba sabisa ku si na libaka. Hape ba sinya Mulimu libizo.

Linzwi la Mulimu, Bibele, li bulelañi fa tuto ye ya lihele? Litaba ze tatama li ka alaba lipuzo ze talu ze latelela: (1) Ki sika mañi luli se si ezahalanga ku mutu ka nako ya lifu? (2) Jesu na lutileñi ka za lihele? (3) Ku ituta niti ka za lihele ku kona ku mi tusa cwañi?