Kana Jesu ki Mulimu ya Maata Ote?
Kana Jesu ki Mulimu ya Maata Ote?
Likalabo ze zibahala hahulu:
▪ “Eni, Jesu ki Mulimu ya Maata Ote.”
▪ “Jesu ne li poniso ya ku ba teñi kwa Mulimu mwa mubili wa nama.”
Jesu naa buleziñi?
▪ “Kabe mwa ni lata, kabe ne mu ka taba ha ni ya ku Ndate; kakuli Ndate ki yo muhulu ku na.” (Joani 14:28) Jesu naa bulezi hande kuli yena ni Ndatahe ha ba likani.
▪ “Ni sa kambamela ku ndate, Yena Ndat’a mina; ku Mulimu wa ka, Yena Mulimu wa mina.” (Joani 20:17) Jesu naa si ka ipulela kuli ki Mulimu kono naa bulezi kuli Mulimu ki Mutu u sili.
▪ “Ha ni si ka ipulelela fela; kono Ndate ya ni lumile, ki Yena ya ni laezi se ni swanezi ku bulela, ni mukwa o ni bulela ka ona.” (Joani 12:49) Lituto za naa luta Jesu ne li sa zwi ku yena muñi, kono ne li zwa ku Ndatahe.
JESU naa ipulezi kuli ki Mwanaa Mulimu, isiñi kuli ki Mulimu ya Maata Ote. Kambe Jesu naa li Mulimu, na lapelanga ku mañi ka nako ya naa li fa lifasi? (Mateu 14:23; 26:26-29) Kaniti, Jesu naa sa ipumisi ku bulela ku mutu u sili!
Balutiwa ba Jesu ba babeli ha ne ba mu kupile kuli a ba fe litulo ze pahami mwa Mubuso wa hae, Jesu naa alabile kuli: “Haili ku ni ina ku la bulyo, kamba ku la nzohoto, hasi na, ni ka fa mutu; ku ka fiwa ba ba lukiselizwe cwalo ki Ndate.” (Mateu 20:23) Kana Jesu naa bulela buhata ha naa ba alabile kuli naa si na maata a ku ba fa ze ne ba kupile? Batili! Naa itumelezi ka buikokobezo kuli ki Mulimu feela ya na ni maata a ku eza likatulo ze cwalo. Jesu mane naa talusize kuli ku na ni lika zeo yena kamba mangeloi a sa zibi ili ze ne zibiwa feela ki Ndatahe.—Mareka 13:32.
Kana Jesu naa li feela yo munyinyani ku Mulimu ka nako ya naa li fa lifasi fa? Batili. Mane nihaiba hamulaho wa lifu ni zuho ya hae, Bibele ne i talusize kuli Jesu ki yo munyinyani ku Mulimu. Muapositola Paulusi u lu hupulisa kuli “Mulimu ki toho ya Kreste.” (1 Makorinte 11:3) Bibele i lu taluseza kuli kwapili muta “linto kamukana ha li se li beilwe mwatas’a hae, fohe ni yena Mwana u ka beiwa mwa mata a Hae, Yena ya beile linto kaufela mwatas’a hae, ilikuli Mulimu a be linto kamukana kwa batu kamukana.”—1 Makorinte 15:28.
Kaniti, Jesu haki Mulimu ya Maata Ote. Kona libaka ha naa bizize Ndatahe kuli ki “Mulimu wa ka.”—Sinulo 3:2, 12; 2 Makorinte 1:3, 4. *
[Litaluso za kwatasi]
^ para. 12 Kuli mu bale litaba ze ñata ka za taba ye, mu bone makepe 201-204 mwa buka ya Bibele I Lutañi Luli? ye hatisizwe ki Lipaki za Jehova.
[Manzwi a fa likepe 7]
Jesu naa bulezi kuli ku na ni lika zeo yena kamba mangeloi a sa zibi ili ze ne zibiwa fela ki Ndatahe