Kana Mulimu U Amuhela Bulapeli Kaufela?

Likalabo ze zibahala hahulu:

▪ “Bulapeli kaufela ki linzila ze liba ku Mulimu.”

▪ “Ze u lumela ha li na butata haiba feela kuli u na ni niti.”

Jesu naa buleziñi?

▪ “Mu kene ka munyako o kumbani; kakuli munyako wa Sinyeho u atami, mi nzila ye ya mwateñi i atami, mi ba ba kena mwateñi ki ba bañata. Kakuli munyako wa bupilo wa kumbana, nzila ye ya mwateñi ki ye sisani, mi ki ba banyinyani ba ba i fumana.” (Mateu 7:13, 14) Jesu naa si ka lumela kuli linzila kaufela li libile ku Mulimu.

▪ “Mwa lizazi leo, ba bañata ba ka li ku na: Mulena, Mulena, ha lu li, ki luna ne lu polofita ka Libizo la hao? mi ne lu leleka balimu ka Libizo la hao? mi ne lu eza limakazo ze ñata ka Libizo la hao? Kiha ni ka ba bulelela patalaza, ni li: Ha ni si ka mi ziba haisali; mu zwe ku na, mina ba ba sebezanga ze maswe.” (Mateu 7:22, 23) Jesu ha amuheli batu kaufela ba ba ipapata ku mu latelela.

BALAPELI ba bañata ba kumalezi hahulu kwa litumelo ni lizo za bona. Kono kiñi ze ezahalanga haiba lituto za bona ha li lumelelani ni ze fumaneha mwa Linzwi la Mulimu, yona Bibele? Jesu naa bonisize kozi ya ku latelela lizo za butu ha naa bulelezi ba bahulu ba bulapeli ba mwa nako ya hae kuli: “Mu felisa mulao wa Mulimu ka sihabo mina.” Cwale kiha kutela manzwi a Mulimu a, a li: “Ba sicaba se, ba ni kuteka ka milomo, kono lipilu za bona li kwahule ni Na; ba ni kubamela ku si na tuso, kakuli tuto ye ba luta, ki milao ya batu fela.”—Mateu 15:1-9; Isaya 29:13.

Muzamao ni wona ki wa butokwa, ku fita feela ku lumela. Bibele ha i bulela za batu ba bañwi ba ba ipapata ku lapela Mulimu, i li: “Ka mulomo ba li ba ziba Mulimu; kono ka misebezi ya bona ba mu latula.” (Tite 1:16) Mane Bibele i bulela ka za batu ba ba pila mwa nako ya luna kuli: “Ikaba . . . ba ba lata minyaka, isi Mulimu; ikaba batu ba ba eza mukwa wa bulumeli, kono se si eza mata a bulumeli ba si latuzi. U sabe kwa batu ba ba cwalo.”—2 Timotea 3:4, 5.

Ku na ni ze ñata ze tokwahala kwandaa ku ba feela ni niti. Kabakalañi? Kakuli mutu u kona ku ba sifosi kono inge a li ya buniti. Kacwalo, zibo ye nepahezi ka za Mulimu ki ya butokwa hahulu. (Maroma 10:2, 3) Ku ituta zibo ye, ni ku pila ka ku lumelelana ni ze i bulela Bibele ku ka lu tusa ku tabisa Mulimu. (Mateu 7:21) Kacwalohe, bulapeli bwa niti bu kopanyeleza ku ba ni mulelo wa niti, tumelo ya niti, ni likezo ze swanela. Mi likezo ze swanela li talusa ku eza tato ya Mulimu ka zazi ni zazi!—1 Joani 2:17.

Haiba mwa tabela ku ziba ze ñata ze i lu bulelela Bibele ka za Mulimu, mu kupe Lipaki za Jehova kuli ba to mi lutanga tuto ya Bibele ku si na tifo.

[Manzwi a fa likepe 9]

Bulapeli bwa niti bu kopanyeleza ku ba ni mulelo wa niti, tumelo ya niti, ni likezo ze swanela