Kana Mulimu ki Mutu Luli?

Likalabo ze zibahala hahulu:

▪ “Mulimu u kai ni kai, mi u mwa lika kaufela. U swana sina moya.”

▪ “Mulimu ki maata a matuna hahulu ni ya butali ka ku fitisisa.”

Jesu naa buleziñi?

▪ “Miyaho ki ye miñata mwa munzi wa Ndate.” (Joani 14:2) Jesu naa bulezi ka swanisezo kuli Mulimu u na ni munzi, kamba sibaka kwaa pila.

▪ “Ni zwile ku Ndate, mi ni tile mwa lifasi; kono cwale ni siya lifasi mi ni ya ku Ndate.” (Joani 16:28) Jesu naa lumela kuli Mulimu ki Mutu luli ni kuli ku na ni sibaka kwaa pila.

JESU a li ku ba a bulele kuli Mulimu ki maata feela a matuna. Kono naa bulelanga ni Mulimu, mi naa lapelanga ku yena. Hañata naa bizanga Jehova kuli ki Ndatahe wa kwa lihalimu, ili pulelo ye patulula silikani se situna saa na ni sona ni Mulimu.—Joani 8:19, 38, 54.

Ki niti kuli “ha ku na mutu ya boni Mulimu haisali” ni kuli “Mulimu ki Moya.” (Joani 1:18; 4:24) Kono fo ha ku talusi kuli ha na mubili kamba sibupeho. Bibele i lu bulelela kuli: “Ku na ni mubili wa nama, hape ku na ni mubili wa moya.” (1 Makorinte 15:44) Kono kana Jehova u na ni mubili wa moya?

Eni. Jesu ha naa zusizwe kwa bafu, naa “keni mwa lihalimu luli, kuli, cwale a tahe fapil’a Mulimu ka luna.” (Maheberu 9:24) Taba ye i lu luta lika ze peli za butokwa ka za Mulimu. Ya pili ki ya kuli, u na ni sibaka kwaa pila. Ya bubeli ki ya kuli, Jesu naa ka kona cwañi ku taha “fapil’a Mulimu,” kambe kuli Mulimu ki maata feela a matuna a fumaneha kai ni kai? Kacwalo kwa iponahaza hande kuli Mulimu ki mutu.

Kono cwalehe, Mulimu u kona cwañi ku ba ni maata a ku zamaisa lika kai ni kai? Mulimu u kona ku luma moya wa hae o kenile, kamba maata a itusisa, kwa sibaka sifi kamba sifi mwa pupo kaufela. Sina ndate ya otololela lizoho kwa bana hae kuli a ba omba-ombe ni ku ba tusa, Mulimu u lumanga moya wa hae o kenile kuli a kone ku peta milelo ya hae.—Samu 104:30; 139:7.

Bakeñisa kuli Mulimu ki mutu, ku na ni lika za tabela ni za sa tabeli. Mi hape u na ni maikuto. Bibele i lu taluseza kuli Mulimu u lata batu ba hae, u tabela misebezi ya hae, u toile sebelezo ya milimu, mi pilu ya hae ya swabanga bakeñisa bumaswe. (Genese 6:6; Deuteronoma 16:22; 1 Malena 10:9; Samu 104:31) Kwa liñolo la 1 Timotea 1:11, u bizwa kuli ki “Mulimu ya [tabile, NW.]” Kona libaka Jesu ha naa bulezi kuli lwa kona ku ituta ku lata Mulimu yo, ka pilu ya luna kaufela!—Mareka 12:30. *

[Litaluso za kwatasi]

[Manzwi a fa likepe 5]

Sina ndate ya otolola lizoho, Mulimu u lumanga moya wa hae o kenile kuli a kone ku peta milelo ya hae