Mabaka A Ketalizoho ha lu Swanela ku Saba Mulimu ku Fita Batu

MUTANGANA yo muñwi naa komokile hahulu. Nto ye ne i ezahezi naa si ka i libelela ni hanyinyani. Puhisano ya naa bile ni yona ni Lipaki za Jehova ba babeli ne i mu lutile nto ye ñwi ye nca. Ka lilimo ze ñata naa katalizwe ki puzo ya libaka Mulimu ha tuhelezi manyando, kono cwale se i alabilwe hande ku zwelela mwa Bibele. Naa sa zibi kuli mwa Bibele ku na ni litaba ze ñata za butokwa ni ze tabisa.

Nakonyana feela ku zwa fo ba mu siyela baenyi bao, muñaa ndu yeo wa musali a kena mwa muzuzu wa mutangana yo, mi a buza ka bunyemi kuli: “Ki bomañi batu bani?”

Bakeñisa kuli mutangana yo naa komokile hahulu, a palelwa ku alaba.

Musali yo a kalumuka kuli: “Na ba ziba, mi haiba u ta ba amuhela hape, u zibe u ta zwa mwa ndu ya ka ni ku yo bata muzuzu ku sili!”

Musali yo a kwala sikwalo ka buhali mi a ikema.

Balateleli ba Kreste ba Niti ba Ziba Kuli ba ta Lwaniswa

Za naa kopani ni zona mutangana yo hasi ze sienyi. Linzwi la Mulimu, yona Bibele, li talusa kuli: “Batu kaufela ba ba lata ku pila ka bulumeli bo bu li teñi ku Jesu Kreste, ba ka nyandiswa.” (2 Timotea 3:12) Bakreste ba niti kaufela ha ba tabelwi mi ba li ku ba ba tabelwe. Ki kabakalañi? Muapositola Joani naa bulelezi Bakreste ka yena kuli: “Lwa ziba kuli lu ba Mulimu, ni kuli lifasi kamukana li lapalezi mwatas’a ya maswe.” Satani  Diabulosi hape u swanisezwa kwa “tau ye lila ye bata ye i ka ca.” (1 Joani 5:19; 1 Pitrosi 5:8) Ye ñwi ya lilwaniso za itusisa hahulu Satani ki sabo ya ku saba batu.

Mane nihaiba Jesu Kreste, ya naa ezize lika ze ñata ze nde ni ya naa si ka eza sibi, naa sheunuzwi ni ku nyandiswa. Naa bulezi kuli: “Ba ni toile fela.” (Joani 15:25) Fa busihu pili a si ka bulaiwa kale, Jesu naa bulelezi cimo balateleli ba hae ka manzwi a, a li: “Lifasi ha li mi toya, mu zibe kuli li toile na, pili. Mu hupule linzwi le ni mi bulelezi la kuli, Mutanga h’a fiti mulen’a hae. Ha ba ni nyandisize, ba ka mi nyandisa ni mina.”—Joani 15:18, 20.

Bakeñisa yona temuso ye, ba bañata ne ba si ka tiyela mwa bulapeli bwa niti. Ha i bulela ka za batu ba ne ba bata Jesu ka nako ye ñwi, Bibele i bulela kuli: “Nihakubacwalo, ne ku si na ya bulela za hae ka ku tiisa, kabakala ku saba Majuda.” (Joani 7:13; 12:42) Baeteleli ba bulapeli ba mwa miteñi yeo, ne ba bembile kuli ba ka lelekela kwande a sinagoge mutu kaufela ya ka lumela ku Kreste. Kacwalo sabo ya ku saba batu ne i palelwisize batu ba bañata ku ba Bakreste.—Likezo 5:13.

Hamulaho, Bukreste ha se bu tomilwe, lu bala ka za “manyando a matuna” a naa tahezi puteho ya mwa Jerusalema. (Likezo 8:1) Mane mwa Mubuso wa Roma kaufela, Bakreste ne ba kopani ni nyandiso. Baana ba ba kutekeha ba mwa Roma ne ba bulelezi muapositola Paulusi kuli: “Lwa ziba kuli tuto yeo ye keluhile i lwaniswa kai ni kai.” (Likezo 28:22) Kaniti, Bakreste ba niti ne ba lwaniswa kai ni kai.

Nihaiba kacenu, Satani u sa itusisa sabo ya ku saba batu sina silwaniso sa ku tibela batu ba bañata kuli ba si ke ba ba balateleli ba Kreste ba niti. Batu ba lipilu ze nde ba ba ituta Bibele ni Lipaki za Jehova ba kopananga ni twaniso kamba sheununo kwa sikolo, kwa mubeleko, ni mwa silalanda se ba pila ku sona, kamba kwa balikani ba bona. Ba kona ku saba ku sheununwa, ku silokiwa ki balikani ba bona, kamba ku sa tusiwa kwa neku la kwa mubili. Mwa libaka ze ñwi za mwa mahae, balimi ba sabanga kuli ba ba yahile mabapa ni bona ba kana ba hana ku ba tusa ku kutula licalo za bona kamba ku sileleza limunanu za bona. Ku si na taba ni yona sabo yeo, ka ku likanyisa Jesu, bolule-lule ba batu ba ikatulezi ku sepa Mulimu ni ku pila ka ku lumelelana ni Linzwi la hae. Jehova u ba fuyauzi bakeñisa mihato ye ba ngile yeo.

Libaka ha lu Swanela ku Saba Mulimu ku Fita Batu

Bibele i lu susumeza ku saba Mulimu ku fita batu. I bulela kuli: “Makalelo a butali ki ku saba [Muñ’a] Bupilo.” (Samu 111:10) Sabo ye haki ya boi feela, kono ki sabo ye nde ya ku saba ku nyemisa Mufani wa Bupilo bwa luna. Sabo ye ya ku saba Mulimu i tamahani ni lilato. Kono ki kabakalañi he ha lu swanela ku saba Mulimu ku fita batu? Ha lu nyakisiseñi mabaka a ketalizoho.

1 Jehova ki Ya Maata Ote. Jehova u maata hahulu ku fita mutu ufi kamba ufi. Ka ku saba Mulimu, lu keta ku yema kwa lineku la Ya Maata Ote, ili yo ku yena “macaba a swana sina kalotoli ka ka lota mwa nkwana.” (Isaya 40:15) Bakeñisa kuli Mulimu ki ya maata ote, u na ni maata a ku fenya “silwaniso [sifi kamba sifi] se si ezezwa” ba ba sepahala ku yena. (Isaya 54:17) Mi bakeñisa kuli ki yena ya keta ba ba swanela ku fiwa bupilo bo bu sa feli, lu ka eza hande ku sa lumeleza nto ifi kamba ifi ku lu palelwisa ku ituta ka za hae ni ku eza tato ya hae.—Sinulo 14:6, 7.

2 Mulimu u ka lu tusa ni ku lu sileleza. Bibele kwa Liproverbia 29:25 i bulela kuli: “Ku saba batu, ku isa mutu mwa lilaba; kono ya sepa [Muñ’a] Bupilo u ka bonelwa.” Ku saba batu ki lilaba kakuli ku kona ku lu palelwisa ku shaela za tumelo ya luna ku Mulimu ka ku lukuluha. Mulimu u lu sepisa kuli u na ni maata a ku lu sileleza, haa li: “Si sabi kakuli ni na ni wena. Si bilaeli kakuli ki Na Mulimu wa hao. Ni ka ku fa mata, e, ni ka ku tusa; e, ni ka ku tiisa ka lizoho la ka la bulyo la niti ya ka.”—Isaya 41:10.

3 Mulimu u lata ba ba sutelela ku yena. Muapositola Paulusi naa ñozi manzwi a susueza a, a li: “Ni kozwi kuli nihaiba lifu, nihaiba bupilo, nihaiba mangeloi, nihaiba ze busa, nihaiba ze li teñi cwale, nihaiba ze sa ta, nihaiba ze mata, nihaiba bupahamo kamba butasi, nihaiba nto ye ñwi ye bupilwe, ha ku na se si kona ku lu kauhanya ni lilato la Mulimu, le li li  teñi ku Jesu Kreste Mulen’a luna.” (Maroma 8:37-39) Haiba lu ituta ku sepa Mulimu ni ku mu utwa, lwa kona ku ikola silikani se situna ni Muambakani-ya-Pahami. Mi yeo ki tohonolo ye tuna luli!

4 Lu itebuha lika kaufela za lu ezelize Mulimu. Jehova ki yena Mubupi wa luna, yena ya tahisize kuli bupilo bu be teñi. Ku tuha fo, ha si ka lu fa feela lika ze seheza bupilo kono hape u lu file lika ze tahisa kuli bupilo bu be bo bu bunde ni bo bu tabisa. Kaniti, ki yena simbule sa mpo ye nde kaufela. (Jakobo 1:17) Davida, muuna ya sepahala ya naa itebuhile sishemo sa Mulimu, naa ñozi kuli: “[Muñ’a] Bupilo, Mulimu wa ka; ki ye miñata misebezi ye komokisa y’o ezize, ni z’o hupuzi ku lu ezeza . . . Palo ya zona ha i na mo i konelwa.”—Samu 40:5.

5 Batu ba bañwi ba ba lu lwanisa ba kana ba cinca. Mwa kona ku tusa batu ba ba mi lwanisa ka ku sa tuhela busepahali bwa mina kono ka ku kumalela kwa sabo ya mina ya ku saba Mulimu ni ku mu lata. Mu hupule taba ya bana bahabo Jesu. Kwa makalelo, ne ba si ka lumela ku yena, kono ne ba bulezi kuli: “H’a sa ikutwa.” (Mareka 3:21; Joani 7:5) Hamulaho wa lifu ni zuho ya Jesu, buñata bwa bahabo Jesu ne ba bile balumeli. Jakobo ni Juda banyani ba Jesu ku bo mahe mane ne ba ñozi libuka ze ñwi za mwa Mañolo. Mane hape ne ku na ni munyandisi ya situhu ya naa bizwa Saule, ili ya naa tilo zibahala hahulu ka libizo la muapositola Paulusi. Batu ba bañwi ba ba lu nyandisa ka nako ya cwale ba kana ba fita fa ku lemuha kuli lu na ni niti ya mwa Bibele bakeñisa katulo ya luna ye bundume ya ku zwelapili ku eza ze lukile.—1 Timotea 1:13.

Ka mutala, musali ya bizwa Aberash ya pila mwa Africa, naa lapelanga kuli a fumane niti. Ha naa kalile ku ituta Bibele ni Lipaki za Jehova, naa kopani ni twaniso ye situhu ku zwelela kwa lubasi lwa hae ni kwa baeteleli ba bulapeli. Bahabo yena ba bañwi ba ne ba kalile ni bona ku ituta Bibele, ne ba tuhezi bakeñisa ku saba twaniso yeo ya batu. Kono yena a kupa Mulimu kuli a mu fe maata ni bundume mi a fita fa ku kolobezwa sina yo muñwi wa Lipaki za Jehova. Ki lika mañi ze ne zwile mwateñi? Bahabo yena ba 8 ne ba ndumebile, ba kalisa hape ku ituta Bibele, mi se ba eza zwelopili ye nde ya kwa moya.

Mwa Kona ku Tula Sabo ya ku Saba Batu

Kuli mu si ke mwa swasiwa ki sabo ya ku saba batu, mu eze ka taata ku tiisa lilato la mina ku Mulimu. Mwa kona ku eza cwalo ka ku ituta Bibele ni ku nahanisisanga mañolo a cwale ka Maheberu 13:6, ye bulela kuli: “[Jehova] ki Yena ya ni tusa, ha ni sabi se siñwi; mutu s’a ka ni eza ki nto mañi?” Mu si ke mwa libala mabaka ku saba Mulimu ku fita batu haili nto ye lukile ni ye swanela.

Hape mu hupule limbuyoti ze ñata ze tiswa ki ku sebelisa lika ze mu ituta mwa Bibele. Mwa kona ku fumana likalabo za niti kwa lipuzo za butokwa mwa bupilo. Mwa kona ku ba ni butali bo bu ka mi tusa ku tiyela miinelo ye taata ya mwa bupilo. Mwa kona ku ikola sepo ye nde ku si na taba ni miinelo ya kacenu ye zinga. Mi mwa kona ku atumela Mulimu ya maata ote ka nako ifi kamba ifi ka tapelo.

Muapositola Joani naa ñozi kuli: “Lifasi la fela, ni takazo ya lona; kono ya eza tato ya Mulimu u ina ku ya ku ile.” (1 Joani 2:17) Ye ki yona nako ya ku tiya ni ku zwelapili ku saba Mulimu. Ku fita ku tuhelela tumelo ya mina ku fokoliswa ki sabo ya ku saba batu, mwa kona ku keta ku eza za lu taluseza Mulimu, haa li: “Mwan’aka u talife, mi u tabise pilu ya ka, mi ni ka kona ku alaba ya ni nyaza.” (Liproverbia 27:11) Kaniti, ku utwa kelezo ya Mulimu yeo ki tohonolo ye tuna!

Mu hupule kuli, ha ku na mutu ya kona ku mi fa lika zeo Mulimu a ka fa ba ba mu saba: “Mupuzo wa ku ikokobeza ni ku saba Mulimu, ki bufumu, ni ku kutekiwa, ni bupilo.”—Liproverbia 22:4.

[Siswaniso se si fa likepe 14]

Bakeñisa bundume bwa naa bonisize Aberash, bahabo yena ba 8 ba zwelapili ku ikola ku ituta Bibele