KU Pepwa Sinca—Kana ki Nzila ye Libisa Kwa Puluso?

MU KONA ku alaba cwañi puzo ye li: “Kana mu pepilwe sinca?” Balumeli ba bañata mwa lifasi kaufela ba kona ku alaba ka buikolwiso kuli, “Eni!” Ba lumela kuli ku pepwa sinca ki sizibelo sa Bakreste ba niti kaufela mi ki nzila i nosi ye libisa kwa puluso. Ba na ni mubonelo o swana ni wa baeteleli ba bulapeli ba ba cwale ka Robert C. Sproul caziba wa za bulapeli, ya naa ñozi kuli: “Haiba mutu haa si ka pepwa sinca, . . . u zibe haki Mukreste.”

Kana mu ba bañwi ba batu ba ba lumela kuli ku pepwa sinca ku mi kenya mwa nzila ye libisa kwa puluso? Haiba ku cwalo, u zibe he mu bata ku tusa ba habo mina ni balikani ba mina kuli ni bona ba fumane nzila yeo mi ba kale ku zamaya ku yona. Kuli ba eze cwalo, ba tokwa ku ziba shutano ye mwahalaa mutu ya pepilwe sinca ni ya si ka pepwa sinca. Mu kona ku ba taluseza cwañi taluso ya ku pepwa sinca?

Batu ba bañata ba lumela kuli pulelo ya kuli ku “pepwa sinca” i ama ku mutu ya itama ka luci kuli u ka sebeleza Mulimu ni Kreste, mi kacwalo u cinciwa ku zwa mwa muinelo wa ku shwa kwa moya ni ku ba ya pila kwa moya. Mane dikishinari ye nca i talusa mutu ya pepilwe sinca kuli, “ki Mukreste ya uncafalize kamba ku tiisa tumelo ya hae sihulu hamulaho wa ku nahanisisa hahulu litaba za bulapeli.”—Merriam-Webster’s Collegiate Dictionary—Eleventh Edition.

Kana mu ka komoka ha mu ka ituta kuli Bibele ha i lumelelani ni taluso yeo? Kana mwa tabela ku ziba seo Bibele i luta luli ka za ku pepwa sinca? Kaniti, mu ka tusiwa hahulu ka ku nyakisisa hande taba ye. Kabakalañi? Kakuli ku ba ni kutwisiso ye nepahezi ka za se ku talusa ku pepwa sinca, ku ka cinca bupilo bwa mina ni sepo ya mina ka za nako ya kwapili.

Bibele I Lutañi?

Pulelo ya kuli ku “pepwa sinca” i fumaneha kwa liñolo la Joani 3:1-12, ili le li talusa za ngambolo ye nde ya naa bile ni yona Jesu ni mueteleli wa bulapeli mwa Jerusalema. Likande la mwa Bibele leo mu ka li fumana mwa kambokisi ka ka zamaelela ni taba ye. Lu mi susueza ku li bala ka tokomelo.

Mwa likande le, Jesu u bonisa  hande likalulo li sikai ka za ku “pepwa sinca.” Mane likande la Jesu li lu tusa ku alaba lipuzo ze ketalizoho ze:

▪ Ku pepwa sinca ki kwa butokwa cwañi?

▪ Kana ki luna bañi ba ba lukela ku iketela kuli lu pepwe sinca?

▪ Ki ufi mulelo wa ku pepwa sinca?

▪ Mutu u pepiwa sinca ka mukwa ufi?

▪ Ki cinceho mañi ye ezahalanga kwa silikani se si mwahalaa Mulimu ni batu ba ba pepilwe sinca?

Ha lu nyakisiseñi lipuzo ze, iliñwi ka iliñwi.

[Mbokisi/Siswaniso se si fa likepe 4]

“Mu Swanezi ku Pepwa Sinca”

“Cwale, kwa bafalisi ne ku na ni mutu ya bizwa Nekudema, wa Kuta ya Majuda; a ta ku Jesu busihu, mi a li ku yena: Muluti, lu ziba kuli u Muluti ya zwa ku Mulimu, kakuli haa yo ya kona ku eza limakazo zoo eza, Mulimu haa li siyo ku yena. Jesu a mu alaba, a li: Kaniti-niti na ku bulelela, ni li, mutu haa sa pepwi sinca, haa koni ku bona mubuso wa Mulimu. Nekudema a li ku yena: Mutu a ka pepwa cwañi haa saa supezi? Kikuli a ka kutela hape mwa mba ya mahe, a yo pepwa lwa bubeli? Jesu a alaba, a li: Kaniti-niti na ku bulelela, ni li, mutu haa sa pepwi ka mezi ni ka Moya, haa koni ku kena mwa mubuso wa Mulimu. Se si pepilwe ki nama ki nama, mi se si pepilwe ki Moya ki Moya. Si komoki ha ni ku bulelela kuli mu swanezi ku pepwa sinca. Moya u fukela mo u lata, mi u utwa mulumo wa ona, kono ha u zibi ko u zwa ni ko u ya; ku cwalo ni ku mutu kaufela ya pepilwe ki Moya. Nekudema a alaba, a li ku yena: Zeo li ka ezwa cwañi? Jesu a mu alaba, a li: U muluti wa Isilaele, mi zeo ha u li zibi? Kaniti-niti, na ku bulelela, ni li: Lu bulela se lu ziba, mi lu paka se lu boni; kono ha mu amuheli bupaki bwa luna. Ha mu sa lumeli ha ni mi bulelela za lifasi, mu ka lumela cwañi ha ni mi bulelela za lihalimu?”—Joani 3: 1-12.