Kana ku na ni Mutu ya ni Tokomela Luli?

Kana mu kile mwa ikutwa kuli ha mu koni ku eza nto ni ye kana ni ku ikutwa buinosi, inge kuli ha ku na mutu ya naa ziba luli matata e ne mu kopana ni ona? Mi nihaike kuli ne ba a ziba, ne mu ikutwile kuli ne ba sa mi tokomeli.

HA KU ba ni matata, bupilo bwa luna bu kona ku bonahala inge liñungwa le li si ke la ombala. Fokuñwi, lu kana lwa atula kuli butata bo lu kopana ni bona ki bo butuna hahulu ni kuli ne bu sa swaneli ku ezahala kuli mane ha lu sa kona ku bu tiyela. Hañata ku banga cwalo ha lu na ni matuku a mwa munahano a tiswa ki lika ze maswe ze nee ezahezi, ku lembwala, likozi ze fokolisa mubili, matuku a si na likalafo, kamba ze ñwi ze swana sina ze. Lu kana lwa ikutwa kuli ha lu koni ku eza nto ni ye kana ni ku felelwa ki sepo kuli mane ha lu zibi ko lu kona ku fumana ku tiiswa pilu. Kana ku na ni mutu ya lu tokomela luli?

“Mulimu wa ze Tiisa Pilu Kaufela” wa lu Tokomela

Mwa Bibele, Mulimu u taluswa kuli ki “Ndate ya mukekecima, Mulimu wa ze tiisa pilu kaufela.” (2 Makorinte 1:3) Mulimu, yena wa libizo la Jehova, wa ziba kuli lu tokwa ku tiiswa pilu. Bibele i itusisanga pulelo ya ku “tiisa pilu” ka ku shutana-shutana, ku fitelela ha mwanda, ili ku lu kolwisa kuli Mulimu wa ziba ze lu kopana ni zona mi mane u lakaza ku lu tiisa pilu. Ku ziba taba ye, ku lu kolwisa kuli nihaike kuli batu ba bañwi ba bonahala inge kuli ha ba zibi matata a luna, kamba ha ba lu tokomeli, Jehova Mulimu yena wa lu iseza pilu mi wa lu tokomela.

Taba ya kuli Jehova wa tokomelanga batu ba hae ka butu ya iponelwa hande mwa Mañolo. Bibele i bulela kuli: “Meto a Muñaa Bupilo a mwa mabaka kaufela. Inzaa talima ba ba maswe ni ba bande.” (Liproverbia 15:3) Ka ku swana, kwa Jobo 34:21, lu bala kuli: “Meto a hae a talima mikwa ya mutu, mi u bona mizamao ya hae kaufela.” Jehova wa bonanga ze lu eza, ibe kuli ki ze nde kamba ki ze maswe, mi wa ziba miinelo ya luna, kuli a kone ku eza zaa nga kuli za swanela. Taba ye i pakilwe mwa manzwi a naa bulezi muboni kamba mupolofita Hanani ku Mulena Asa wa Juda, a li: “Meto a Muñaa Bupilo a talimisisa lifasi kaufela, kuli a tahise maata a hae ku tusa ba ba mu file lipilu za bona, kaufela zona.”—2 Makolonika 16:7, 9.

Jehova wa lu talimanga ka libaka le liñwi. Jesu u talusa kuli: “Ha ku na mutu ya ka ta ku na, konji haa ka hohiwa ki Ndate ya ni lumile.” (Joani 6: 44) Jehova wa tokomela luli ka ku tatuba mwa pilu ya mutu kuli a bone haiba mutu yo wa tabela ku ziba Mulimu hande. Haiba mutu a tabela ku mu ziba hande, Jehova wa kona ku mu tusa. Ka mutala, mwa naha ya Dominican Republic, musali yo muñwi naa li mwa sipatela kuli a pazulwe bakeñisa butuku bwa kansa. A kupa Mulimu kuli a mu tuse ku fumana bulapeli bwa niti. Hona fo feela, bo muunaa hae ba mu tiseza broshuwa ye li, Ki Sifi Seo Mulimu A Tokwa ku Luna? * ye ne ba filwe ki yo muñwi wa Lipaki za Jehova ya naa tile kwa ndu ya bona kakusasana wa lizazi leo. Musali yo a bala broshuwa yeo mi a lemuha kuli ne ili yona kalabo ya Mulimu kwa tapelo ya  hae. Naa lumezi ku ituta Bibele ni Paki yo, mi mwa likweli ze sa fiti ku ze silezi a neela bupilo bwa hae ku Mulimu mi a kolobezwa.

Mwa buka ya Bibele ya Lisamu, lu fumana lipulelo ze ñata ze tabisa ze nee bulezwi ki baopeli ba kwaikale ba Maheberu, ba ba cwale ka Mulena Davida, ili ze talusa mo Jehova a babalelela batanga ba hae ka lilato. Kwa Samu 56:8, lu bala za Mulena Davida ha naa itilelela ku Mulimu kuli: “U buluke mioko ya ka mwa botolo ya hao, ha ni li, i ñozwi kaufela mwa buka ya hao?” Sina mo i boniseza swanisezo yeo, Davida naa zibile kuli Jehova naa ziba manyando a naa kopana ni ona, mane ni ka mo manyando ao a kona ku amela maikuto a mutu. Jehova naa ziba butuku bwa naa utwa Davida mi naa hupuzi za naa fitile ku zona Davida ili ze nee tahisize kuli Davida a lotise mioko. Kaniti, Mubupi wa luna u talimanga batu kaufela ba ba lika ka taata ku eza tato ya hae, bona “ba ba mu file lipilu za bona, kaufela zona.”

Taba ye ñwi ya mwa Bibele ye talusa ka za mo Mulimu a babalelela batu ka lilato i fumaneha kwa Samu 23 ye zibahala hande. Manzwi a yona a pili a swaniseza Mulimu ku mulisana ya lilato: “Muñaa Bupilo ki mulisana wa ka; ha ni na ku tokwa se siñwi.” Mulisana wa kwa Middle East u babalelanga ye ñwi ni ye ñwi ya lingu za hae, mane ni ku li beya mabizo. Ka zazi u bizanga ngu ye ñwi ni ye ñwi mi wa i swala-swalanga ka lilato ni ku i tatuba kuli a bone haiba ku na ni fo i holofezi. Haiba a fumana sitombo, wa si toza oli kamba mulyani kuli si fole ka bubebe. Haiba ngu ya kula, mulisana a kana a i nwisa mulyani ka ku i hapeleza ni ku i yemisa kuli i si ke ya lobala ni ku shwa. Kaniti, yeo ki swanisezo ye nde ya ka mo Jehova a babalelanga batu ba ba kupa tuso ku yena.

 Tapelo ni Zuho ki Bupaki Bwa Kuli Mulimu wa lu Tokomela

Lisamu ze hamoho cwalo ni ze ñwi ze nde ze mwa Bibele, ha li si ka ñolelwa kuli lu li balange feela ni ku ikola zona. Li lu bonisa ka mo batanga ba Mulimu ba ba sepahala ba kwaikale ne ba itilelelanga ku Jehova ku kupa tuso ya Mulimu ni ku bonisa buitumelo kwa ketelelo ni limbuyoti ze zwa ku yena. Lipulelo ze cwalo li bonisa hande kuli batanga ba Mulimu ba kwaikale bao ne ba na ni tumelo ye tuna ya kuli Mulimu naa ba tokomela. Ku bala ni ku nahanisisa manzwi a zwelela kwatasaa pilu ao, ku lu tusa ku ikutwa kuli Mulimu wa lu tokomela ni luna. Taba ya kuli Mulimu wa lu lumelezanga ku lapela ku yena ki bupaki bwa kuli wa lu tokomela.

Kono fokuñwi lu kona ku eshulwa ki butata kuli mane ha lu zibi mo lu kona ku lapelela ka za teñi. Kana seo sa kona ku paleliswa Jehova ku ziba matata a luna? Maroma 8:26 i alaba kuli: “Moya u lu tusa mwa mifokolo ya luna. Kakuli ha lu zibi se lu lukela ku kupa; kono Moya isali ona wa lu lapelela, ka sitongo se si sa konwi ku taluswa.” Liñolo le, li lu bulelela kuli litapelo ze buyelezwi za batanga ba Mulimu ba kwaikale li kona ku ba ni maikuto a swana ni a luna, mi Jehova “ya utwa milapelo” u amuhela litapelo zeo sina ze zwa ku luna.—Samu 65:2.

Sepo ya zuho ki bupaki bo buñwi bo bu kolwisa bwa kuli Mulimu u isezanga pilu ku mañi ni mañi. Jesu Kreste naa ize: “Nako ya ta, mo ba ba li mwa mabita [a kupulo NW] kaufela, ba ka utwa linzwi la hae [Jesu], mi ba zwe.” (Joani 5:28, 29) Pulelo ya Sigerike ye itusisizwe mwa liñolo le, i tolokilwe hande mwa Bibele ya New World Translation kuli “mabita a kupulo” isiñi feela kuli “mabita.” Pulelo yeo i bonisa kuli Mulimu wa hupulanga mwa naa inezi mutu yo pili a si ka shwa kale.

Ha mu nahane feela; kuli Mulimu a kutiseze mutu kwa bupilo, u tokwa ku ziba lika kaufela ka za mutu yo, ze kopanyeleza mwa naa bonahalela, mikwa ya na pepilwe ni yona ni ya na itutile, ni maata a hae a ku hupula! (Mareka 10:27) Mulimu haa koni ku libala mutu ya cwalo niha ku fitile lilimo ze likiti-kiti. (Jobo 14:13-15; Luka 20:38) Kacwalo Jehova Mulimu wa hupula ka ku tala batu ba bañata-ñata ba ba shwile, ili bupaki bo bu lu kolwisa kuli Mulimu wa lu tokomela ka butu!

Jehova ki Yena Yaa fa Mupuzo

Lu swanela ku ezañi kuli Mulimu a lu bonise lilato ni ku lu tokomela? Sa butokwa ni ku fita kikuli lu swanela ku mu sepa ni ku mu utwa, ili ku bonisa kuli lu na ni tumelo ku yena. Muapositola Paulusi u bonisa swalisano ye mwahalaa ku ba ni tumelo ni ku ikola pabalelo ya Mulimu. Naa ñozi kuli: “Kwandaa tumelo mutu haa koni ku tabelwa ki Yena; kakuli ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.”—Maheberu 11:6.

Mu lemuhe kuli tumelo ye tabisa Mulimu i ama lika ze peli. Sapili, lu swanela ku “lumela kuli Mulimu u teñi” ni kuli ki mubusi wa luna ya pahami, ye lu swanela ku utwa ni ku lapela. Sa bubeli, lu swanela ku lumela kuli ki “Yena ya fa ba ba mu bata mupuzo.” Tumelo ya niti i kopanyeleza ku lumela kuli Mulimu u tabela ku bona batu kaufela ba ba tukufalelwa ku eza tato ya hae ha ba li mwa buikangulo bo bunde ni kuli wa ba fanga mupuzo. Haiba mu ituta Linzwi la Mulimu ni ku swalisana ni batu ba ba mu utwa, ni mina mwa kona ku ba ni tumelo ye kona ku mi fumanisa mupuzo ni pabalelo ya Mulimu ye lilato.

Batu ba bañata kacenu ba lumela kuli Mulimu haa na taba ni ze ezahala kwa batu. Kono sina mo lu bonezi, Bibele i bonisa kuli Mulimu u tokomelanga hahulu batu ba ba bonisa tumelo ya niti ku yena. Nihaike kuli bupilo kacenu bu tezi matata, sabo, ku zwafa, ni ze utwisa butuku, ha lu tokwi ku felelwa ki sepo. Jehova Mulimu wa lu tokomela. Mane, ka lilato u lu mema kuli lu kupe tuso ku yena. Walisamu u bulela kuli: “U lwalise Muñaa Bupilo mulwalo wa hao, mi u ka ku tiisa. Haa na ku lumela kuli ya na ni niti a nyanganyiswe.”—Samu 55:22.

[Litaluso za kwatasi]

[Mbokisi/Siswaniso se si fa likepe 23]

Mañolo aa Kona ku Tiisa Tumelo ya Mina Mwa Pabalelo ya Mulimu ye Lilato

“Meto a Muñaa Bupilo a talimisisa lifasi kaufela, kuli a tahise maata a hae ku tusa ba ba mu file lipilu za bona, kaufela zona.”—2 MAKOLONIKA 16:9

“U buluke mioko ya ka mwa botolo ya hao, ha ni li, i ñozwi kaufela mwa buka ya hao?”—SAMU 56:8

“Muñaa Bupilo ki mulisana wa ka; ha ni na ku tokwa se siñwi.”—SAMU 23:1

“Wena ya utwa milapelo, batu kaufela ba ka ta ku Wena.”—SAMU 65:2

“Fo, Wena noo ka biza, mi ne ni ka ku alaba; mi noo ka shukelwa ku bona hape musebezi wa mazoho a hao.”—JOBO 14:15

“Ya taha ku Mulimu u swanezi ku lumela kuli Mulimu u teñi, ni kuli ki Yena yaa fa ba ba mu bata mupuzo.”—MAHEBERU 11:6

“U lwalise Muñaa Bupilo mulwalo wa hao, mi u ka ku tiisa. Haa na ku lumela kuli ya na ni niti a nyanganyiswe.”—SAMU 55:22