Ku Pepwa Sinca—Mulelo ki Ufi?

BATU ba bañata ba lumela kuli, kuli mutu a fumane puluso ya ku ya ku ile u tokwa ku pepwa sinca. Kono mu lemuhe za naa bulezi Jesu yena ka sibili ka za mulelo wa ku pepwa sinca. Naa talusize kuli: “Mutu haa sa pepwi sinca, haa koni ku bona mubuso wa Mulimu.” (Joani 3:3) Kacwalo, mutu u tokwa ku pepwa sinca kuli a kene mwa Mubuso wa Mulimu, isiñi kuli a puluswe. Batu ba bañwi ba kana ba hana ni ku bulela kuli: ‘Kono lipulelo ze peli ze—ku kena mwa Mubuso wa Mulimu ni ku amuhela puluso—kana haa li buleli za mupuzo wo swana?’ Batili. Kuli lu utwisise shutano ye mwa lipulelo zeo, ha lu nyakisiseñi pili taluso ya pulelo ya kuli “mubuso wa Mulimu.”

Mubuso ki mufuta wa mulonga. Kacwalohe, pulelo ya kuli “mubuso wa Mulimu” i talusa “mulonga wa Mulimu.” Bibele i luta kuli Jesu Kreste, yena “mwanaa mutu,” ki Mulena wa Mubuso wa Mulimu, ni kuli Kreste u na ni batu baa ka busa ni bona. (Daniele 7:1, 13, 14; Mateu 26:63, 64) Hape, pono ya naa boni muapositola Joani ne i patuluzi kuli ba ba ka busa hamoho ni Kreste ki batu ba ba ketilwe “mwa masika kaufela, ni mwa lipuo, ni mwa mishobo, ni mwa macaba” mi ba ka “busa lifasi.” (Sinulo 5:9, 10; 20:6) Linzwi la Mulimu li zwelapili ku patulula kuli ba ba ka busa sina malena, ki “mutapinyana” wa batu ba 144,000 “ba ba liuluzwi mwa lifasi.”—Luka 12:32; Sinulo 14:1, 3.

Mubuso wa Mulimu u busa ku zwelela kai? “Mubuso wa Mulimu” hape u bizwa kuli “mubuso wa kwa lihalimu,” ili nto ye bonisa kuli Jesu ni ba ba busa ni yena ba busa ku zwelela  kwa lihalimu. (Luka 8:10; Mateu 13:11) Kacwalo, Mubuso wa Mulimu ki mulonga wa kwa lihalimu, mi ba ba mwa mulonga wo ki Jesu Kreste ni sikwata sa batu baa ka busa ni bona ba ba ketilwe mwahalaa batu.

Kono cwale kiñi sa naa talusa Jesu ha naa ize, mutu u swanela ku pepwa sinca kuli a ‘kene mwa mubuso wa Mulimu’? Naa talusa kuli mutu u tokwa ku pepwa sinca kuli a buse hamoho ni Kreste kwa lihalimu. Ka bukuswani feela kikuli, mulelo wa ku pepwa sinca, ki ku lukiseza sikwatanyana sa batu kuli ba yo busa kwa lihalimu.

Cwale ki kale lu bona kuli ku pepwa sinca ki kwa butokwa hahulu, ku tahiswa ki Mulimu, mi ku lukiseza sikwata sa batu kuli ba yo busa kwa lihalimu. Kono mutu u pepiwa sinca ka mukwa ufi?

[Manzwi a fa likepe 7]

Mulelo wa ku pepwa sinca ki ku lukiseza sikwatanyana sa batu kuli ba yo busa kwa lihalimu

[Siswaniso se si fa likepe 7]

Ba ba mwa Mubuso wa Mulimu ki Jesu Kreste ni sikwata sa batu baa ka busa ni bona ba ba ketilwe mwahalaa batu