Ni Fumana Tabo ku si na Taba Kuli ni Sihole

Ka mo li Kandekezwi ki bo Paulette Gaspar

Nihaike kuli ne ni weitile likilo ze batoo ba ze talu ka nako ye ne ni pepilwe, mualafi naa lemuhile kuli ku na ni butata bo butuna hahulu mwa mubili wa ka. Ka nako ye ni pepwa, masapo a ka naa na ni miandala. Taba ki ya kuli, ni kula butuku bo bu bizwa osteogenesis imperfecta, ili bo bu zibahala hande kuli ki butuku bwa masapo a tiile hahulu kono ili a lobeha ka bunolo. Ne ni matiselizwe mwa lipazulelo, kono baalafi ne ba si na sepo ya kuli ni ka pila. Ne ba libelela kuli ni ka shwa mwahalaa lihola ze 24.

N E NI pepilwe ka June 14, 1972 mwa Canberra, ili tolopo ye tuna ya naha ya Australia. Butata bo ne bu libelelwa ne bu si ka ezahala, mi ne ni pilile ku yo fita kwa mafelelezo a lizazi la makalelo. Kono hamulaho se ni kula katabi. Bakeñisa kuli baalafi ne ba nga kuli ha ni na ku pila, ne ba si ka ni fa kalafo ni ye ka na, mi ba atula kuli ni shwe feela. Kono ne ni si ka shwa.

Ni nahana kuli bashemi ba ka ne ku ba bezi hahulu taata ka nako yeo. Bakeñisa kuli ne ku iponahaza hande kuli ha ni na ku pila, baalafi ba ne ba na ni milelo ye minde ne be elelize bashemi ba ka kuli ba si ke ba ba hahulu bukaufi ni na. Mi mane mwahalaa likweli ze taalu za makalelo ze ne ni li mwa sipatela, bashemi ba ka ne ba sa lumelezwi ku ni swala. Ne ni kona ku holofazwa ka nako ifi kamba ifi. Ha ne ku bonahezi hande kuli ha ni sa shwa, baalafi ba akaleza kuli bashemi ba ka ba ni ise kwa sibaka ko ku babalelwa banana ba lihole.

Kono bashemi ba ka ba ikatulela ku ya ni na kwa ndu. Bo ma kona ha ne ba sa zo kalisa ku ituta Bibele ni Lipaki za Jehova. Ze ne ba ituta ne li ekelelize kwa mubonelo wa bona wa kuli ba swanela ku ni babalela. Kono ku bonahala kuli ne ku ba bezi hahulu taata ku ba bukaufi ni na, bakeñisa kuli ne ba itusisa maata a bona kaufela kwa ku ni babalela ka tokomelo ye tuna. Ne ni iswanga kwa sipatela nako ni nako. Masapo a ka naa kona ku lobiwa ki nto feela ye bunolo ye cwale ka ku ni tapisa fa mubili. Nihaiba feela ha ne ni itimula, lisapo ne li kona ku pazuha.

Ne ni Kenezwi ki Ndiulu

Ha ne ni nze ni hula, nako kaufela ne ni pilanga mwa sipula sa mawili. Ne ni sa koni ku ituta ku zamaya. Ku si na taba ni matata a, bashemi ba ka ne ba ni babalezi hande hahulu.

Ku tuha fo, bo ma ne ba likile ka taata ku ni luta lushango lwa Bibele lo lu omba-omba. Ka mutala, ne ba ni lutile kuli kwapili Mulimu u ka fetula lifasi ku ba paradaisi ili mo batu kaufela ba ka ikola buikangulo bo bu petehile bwa kwa moya, bwa mwa munahano ni bwa mwa mubili.  (Samu 37:10, 11; Isaya 33:24) Niteñi, bo ma ne ba itumelezi patalaza kuli ne ku ba bezi taata ku nahana mwa ku ni piliseza bupilo bo bu tabisa ku fitela Mulimu a ka fetula lifasi ku ba paradaisi.

Kwa makalelo, ne ni kenanga fa sikolo sa lihole. Baluti ba ka ne ba si ka ni tomela likonkwani, mi ni na ne ni si ka itomela zona. Mi mane ku itiisa ku kena sikolo ne ku bile butata bo butuna. Banana ba bañata kwa sikolo ne ba ni nyandisanga. Hasamulaho na kala ku kena fa sikolo sa batu ba ba si lihole. Ne ni lemuhile kuli ku ituta mwa ku pilela hande ni ba bañwi, ne ku ni felize maata a mubili, a maikuto ni a munahano. Nihakulicwalo, ne ni tundamezi kuli ni feze sikolo mwa sitopa sa bu 12.

Sihulu mwahalaa lilimo za ka za kwa sikolo se si pahami, ne ni lemuhile kuli bana ba sikolo ba bañwi ne ba si na sepo mi bupilo bwa bona ne bu si na mulelo. Hape ne ni nahananga ze ne ba ni lutanga bo ma ku zwelela mwa Bibele. Ne ni ziba hande mwa pilu ya ka kuli ze ne ba bulelanga nee li yona niti. Kono lituto za Bibele ka nako yeo ne li si ka ni fita kale kwa pilu. Ka nakonyana, ne ni ikatulezi ku pila bupilo bwa lishea ni bwa liseho, ni bwa ku sa nahana za kamuso.

Ha ne ni li wa lilimo ze 18, ne ni tutile fa lapa la bashemi ba ka ni ku yo pila mwa ndu ni sikwata sa batu ba lihole ka na. Ne ni lemuhile kuli ku tuta ko, ne ku tabisa kono hape ne ku sabisa. Ku ba ni tukuluho ye nca, ku ba ni balikani, ni ku eza siango ni bona, kaufela neeli lika ze nee ni tabisa hahulu. Buñata bwa balikani ba ka ne ba nyezwi. Ni na ne ni lakaza ku fumana mutu ya naa ka ni nyala ni ku ni lata. Kono bakeñisa kuli ne ni li sihole, ne ku si na mutu ya naa ka kona ku ni nyala. Ku ziba kuli ha ku na ya naa ka kona ku ni nyala ne ku ni tahiselize maswabi.

Na li ku ba ni nyaze Mulimu kabakala kuli ni sihole. Ne ni itutile lika ze ñata ka za Mulimu mi ne ni konile ku utwisisa kuli haa koni ku eza nto ni ye kana ye maswe. (Jobo 34:10) Ne ni likile ku nga bupilo bwa ka, ka mo ne bu inezi. Nihakulicwalo, ne ni lembwalile hahulu.

Ni Fola Hanyinyani-hanyinyani

Ni ya tabile kakuli bo ma ne ba zibile muinelo o ne ni li ku ona mi ba zibisa yo muñwi wa maeluda ba puteho ya naa pila bukaufi ni na. Eluda yo naa ni lizelize luwaile ni ku ni mema kuli ni yo fumaneha kwa mikopano ya Sikreste kwa Ndu ya Mubuso ya Lipaki za Jehova ya mwa sibaka se ne ni pila ku sona. Fahalimu a seo, kaizeli yo muñwi mwa puteho a kala ku ni luta Bibele ka sunda.

Ha ne ni nze ni hupuliswa lituto za Bibele ze ne ba ni lutile bo ma mwa lilimo za kwamulaho, mubonelo wa ka wa bupilo wa kala ku ba hande. Ne ni ikola ku ba mwahalaa Bakreste sina na. Kono ne ni itutile ku sa bulela mo ne ni ikutwela kakuli ne ni ikalelwa kuli ni ka swana na holofazwa mwa maikuto. Ni nahana kuli ku eza cwalo ne ku ni palelwisa ku lata Mulimu ka pilu ya ka kaufela. Nihakulicwalo, ne ni ziba kuli ne li nto ye nde ku neela bupilo bwa ka ku Mulimu. Kacwalo ka December 1991, na bonisa buineelo bwa ka ka ku kolobezwa.

Na tuta mwa ndu mo ne lu pila hamoho ni balikani ba ka ba lihole ni ku yo pila mwa muyaho wa ka ni nosi. Cinceho ye, ne i tisize lika ze nde ni matata. Ka mutala, ne ni utwanga hahulu bulutu. Mi ku nahananga za kuli micaha ba ka to ni kenela, ne ku ni sabisanga hahulu. Hamulaho wa nakonyana, na kala ku lembwala hape. Nihaike kuli fa sifateho ne ni bonahalanga ku ba ya bundume ni ya na menyanga ka tabo, lika ne li siyo hande. Ne ni tokwa hahulu mulikani yo munde ili ya na si ke a ni siya.

Ni ikutwa kuli Jehova naa ni file mulikani ya cwalo. Maeluda mwa puteho ye ne ni kopana ku yona, ne ba ambozi ni kaizeli wa libizo la Suzie ili ya naa nyezwi kuli a itutange ni na Bibele. Bo Suzie ne ba si feela baluti ba ka, kono ne ba li balikani ba batuna be ne ni lata hahulu.

Bo Suzie ne ba ni lutile ku talusezanga ba bañwi ze ne ni ituta—ka ku kutaza fa ndu ni ndu ni ka ku tandaalelwa. Cwale na kala ku itebuha hahulu tulemeno twa Mulimu. Niteñi, nihaike kuli ne ni kolobelizwe, ne ni si ka fita kale fa ku lata  hahulu Mulimu. Mane ne ni nahananga za ku itulela ku lapela Jehova. Na sebela bo Suzie, mi ba ni tusa mwahalaa butata-tuna bo.

Bo Suzie hape ne ba ni tusize ku lemuha kuli buñata bwa lika ze nee ni feza tabo ne li taha kabakala kuli ne ni swalisana ni batu ba ne ba sa lati hahulu Jehova. Kacwalo na kala ku ipatela balikani mwahalaa batu ba ba tiile mwa ku lapela Mulimu—sihulu ba bahulu. Hape swalisano ya ka ni bo ma ne i kalile ku shekesha; ki ha se ni kala ku kutisa sinca swalisano ya ka ni bona hamohocwalo ni muhulwanaa ka. Ne ni komokile ha ne ni kalile ku ba ni tabo ye tuna ili yeo na samba ku ba ni be ni yona. Mi tabo ni maata a ka ne li zwelela kwa mizwale ni likaizeli mwa puteho, kwa lubasi lwa hesu, mi sihulu ni ku yena Jehova.—Samu 28:7.

Musebezi wo Munca

Hamulaho wa ku fumaneha kwa mukopano o mutuna ko ne ni utwile ngambolo ye ne talusize hahulu za tabo ye ne ba fumana ba bañata mwa bukombwa bwa Sikreste bwa nako kaufela, na ipulelisa kuli: ‘Ni na naa kona ku eza cwalo!’ Kono ne ni izibela hande kuli ne ku ka ni bela hahulu taata ku eza cwalo. Kono ha se ni nyakisisize taba ye ka tapelo, na ikatule ku fitisa kupo ya ka ya liñolo la ku kupa kuli ni be muluti wa Bibele wa nako kaufela, mi ka April 1998, na kala ku sebeza sina paina.

Ni konanga cwañi ku abana mwa musebezi wa ku kutaza inge ni li sihole? Ka mo ni inezi, ni mutu ya ikemezi ni ya sa lati ku imeza batu, ili ku itinga ku bona kuli ba ni bonelange mwa ku zamaela ni lituso ze ñwi. Kacwalo bo Suzie ni bo muunaa bona bo Michael, ba akaleza kuli: Leka mutututu! Kono ne ni ka u matisanga cwañi? Sina mo si boniseza siswaniso se si fa likepe le, mutututu wa ka ne u pangezwi feela na. Mi ni ha ni na ni mubili o musisani wa bukiti bo bu eza likilo ze 19, ha ni koni nihaiba ku nanuha mwa sipula sa ka sa mawili.

Bakeñisa kuli se ni na ni mutututu wa ka o munca, se ni kona ku potela batu ni ku ituta ni bona Bibele ka nako ye swanela bona ni na. Ni swanela ku itumelela kuli ni tabela hahulu ku zamaisa mutututu wa ka ni ku utwa kamoya ka ka ni fukela kwa sifateho—ili nto ye ñwi ya lika ze tahiseza tabo-nyana mwa bupilo!

Ni tabelanga hahulu ku kalisa lingambolo za ka ku tandaalelwa ni batu mwa makululu, ili bao kaufela ba bonahala ku wa lipilu ni ba ba ni kutekanga hahulu. Ni tabelanga hahulu ku tusa batu ba bañwi ku ituta za Bibele. Ni hupula nako ye ñwi ha ne lu li mwa bukombwa bwa fa ndu ni ndu ni muzwale yo mutelele. A lumelisa muñaa ndu, mi muñaa ndu a ni lubukela feela inze a ikomokezi ni ku buza mulikanaa ka kuli, “kana mutu yo wa kona ku bulela?” Sibeli sa luna lwa ikashaula ku seha. Ha se ni felize ku mu kutaza, musali yo kaniti a itemuhela kuli luli na kona ku bulela!

Na ikola bupilo cwale mi ni itutile ku lata Jehova Mulimu. Ni itumela hahulu ku bo ma kwa ku ni luta niti ya Bibele, mi ni talimela kwapilinyana ka buikolwiso muta Mulimu a ka eza ‘linto kaufela ku ba ze nca,’ ku kopanyeleza cwalo ni mubili wa ka o musisani.—Sinulo 21:4, 5.

[Manzwi a fa likepe 26]

“Ne ni likile ku nga bupilo bwa ka ka mo ne bu inezi. Nihakulicwalo, ne ni kenezwi ki ndiulu”