TOHO YA TABA: MWA KONA KU PILA KA TABO NIHAIBA MWA LIFASI LE LI MASWE LE

Kana Luli Kwa Konahala ku Pila ka Tabo Mwa Lifasi le?

“Bupilo bwa luna, mazazi a bona a eza myaha ye mashumi aketalizoho ka a mabeli, Ku ba ba tiile ki myaha ye mashumi aketa-lizoho ka a malalu. Bo, bukonelo bwa yona ki bwa mikatazo ni butata feela.”—Samu 90:10.

MANZWI ao ki a niti! Bupilo mwa lifasi le bu tezi “mikatazo ni butata.” Mane mwendi ni mina mu kile mwa ipuza kuli: ‘kana luli kwa konahala ku pila ka tabo mazazi a?’

Ka mutala, ha lu nyakisiseñi bupilo bwa bo Maria. Ne ba ezanga misebezi ye miñata ha ne ba sa li ba banca, kono cwale, haa se ba na ni lilimo ze 84, ha ba sa kona nihaiba feela ku zwa fa ndu bakeñisa kuli ha ba koni ku zamaya. Ba ikutwanga kuli kambe ne ba ka eza lika ze ñata, kono cwale mubili wa bona wa fokola. Kana kwa konahala kuli ba be ni tabo inze ba pila bupilo bo bu cwalo?

Mina bo? Mwendi ni mina ka nako ye ñwi mu kile mwa nahana ka za mo mu kona ku bela ni tabo mwa bupilo. Mwendi musebezi wa mina wa mi katalisanga hahulu ni ku mi nyikwisa. Mi mane mwendi batu ba bañata ha ba lemuhi kamba ku isa pilu kwa buikatazo bwa mina. Nihaike kuli mwendi ka nako ya cwale bupilo bu mi zamaela hande, mu kana mwa ikalelwa ka za mo bu ka bela bupilo bwa mina kwapili. Ka linako ze ñwi, mu kana mwa ikutwa bulutu kamba ku zwafa. Mwendi mwa lubasi lwa mina ku na ni mifilifili ni ku sa utwana. Mwendi ku na ni mutu ye mu lata wa mwa lubasi lwa mina ya timezi. Bo André ne ba utwana hahulu ni bo ndataa bona, kono ka sipundumukela bo ndataa bona ba kenelwa ki butuku bo ne bu ba bulaile. Bo André, ba nahana kuli ha ba na ku kona ku ba ni tabo hape mwa bupilo bwa bona.

Ku si na taba ni butata bo lu talimana ni bona, ku na ni taba ya butokwa ye lu swanela ku ziba, taba yeo ki ya kuli: Kana luli kwa konahala ku pila ka tabo mwa lifasi le? Lwa kona ku fumana kalabo kwa puzo yeo ka ku nyakisisa bupilo bwa mutu ya naa pilile fa lifasi lilimo ze 2,000 kwamulaho, yena Jesu Kreste. Ku si na taba ni butata bwa naa talimani ni bona, Jesu naa pilile bupilo bwa tabo. Ni luna lwa kona ku pila ka tabo haiba lu likanyisa mutala wa hae.