“Mu Tundamene ku Kupa, mi mu ka Fiwa”
MU SUTELELE KU MULIMU
“Mu Tundamene ku Kupa, mi mu ka Fiwa”
“Mulena, ha ku lu lute mwa ku lapelela.” (Luka 11:1) Jesu naa kupilwe ku eza cwalo ki yo muñwi wa balutiwa ba hae. Mwa kalabo ya hae, Jesu naa itusisize liswanisezo ze peli ze lu luta mo lu kona ku lapelela ku Mulimu kuli a lu utwe. Haiba mwa kakanyanga ka za kuli Mulimu wa teelezanga kwa litapelo za mina, u zibe kalabo ya naa file Jesu i ka mi tusa.—Mu bale Luka 11:5-13.
Swanisezo ya pili i ama ku mutu ya lapela. (Luka 11:5-8) Likande li bonisa kuli, mutu yo muñwi u amuhela muenyi fahalaa busihu kono ha na lico za ku mu yumbula. Mutu yo, u ikutwa kuli u tokwa ku eza se siñwi kapili-pili. Ku si na taba ni kuli ki fahalaa busihu, u ya ku mulikanaa hae ku yo kupa kuli a mu kolotise linkwa. Kwa makalelo mulikanaa hae wa zina-zina ku zuha bakeñisa kuli yena ni lubasi lwa hae ba lobezi. Kono kabakala ku tundamena ni kutokwa maswabi kwa hae, mutu yo, u zwelapili ku kupa ku fitela mulikanaa hae a zuha ni ku to mu fa za tokwa. *
Swanisezo ya Jesu yeo, i lu itutañi ka za tapelo? Jesu u lu bulelela kuli lu tokwa ku tundamena ku kupa, ku bata, ni ku ngongota. (Luka 11:9, 10) Ki kabakalañi Jesu ha bulela cwalo? Kana Jesu u talusa kuli Mulimu ha tabeli ku teeleza kwa litapelo za luna? Batili. Sa talusa Jesu kikuli, ka ku sa swana ni mutu yani ya bulezwi mwa likande ya naa zina-zina ku fa mulikanaa hae linkwa, Mulimu wa tabela ku alaba litapelo za batu ba ba lapela ku yena ka tumelo. Lu bonisa kuli lu na ni tumelo ye cwalo ha lu lapela ka ku sa lisela. Ha lu tundamena ku kupa, lu bonisa kuli lu bata luli ku fiwa ze lu tokwa mi lwa lumela kuli Mulimu wa kona ku lu fa zona haiba za lumelelana ni tato ya Hae.—Mareka 11:24; 1 Joani 5:14.
Swanisezo ya bubeli i ama ku Jehova, yena “ya utwa milapelo.” (Samu 65:2) Jesu u buza kuli: “Ki ufi ndate mwahalaa mina ya kupiwa tapi ki mwanaa hae, ya ka mu fa noha mwa sibaka sa tapi? Kamba ya ka mu fa kabanze haiba hape a mu kupa lii?” Ku si na ku kakanya, ha ku na ndate ya lilato ya kona ku fa bana ba hae lika ze maswe. Hasamulaho, Jesu u fa taluso ya swanisezo yeo kuli: Haiba ndate ya si ka petahala u kona “ku fa limpo ze nde” kwa bana ba hae, “ku cwañi Ndate ya kwa lihalimu, yena u ka mi fita hahulu mwa ku fa moya o kenile,” yona mpo ye nde hahulu, kwa bana ba hae ba fa lifasi ba ba mu kupa!—Luka 11:11-13; Mateu 7:11.
Swanisezo yeo i lu lutañi ka za Jehova, yena “ya utwa milapelo”? Jesu u lu luta kuli Jehova ki Ndate ya lilato ya itukiselize ku tusa bana ba hae. Kamukwaocwalo, balapeli ba Jehova ba lukuluhile ku mu atumela ka likupo ze zwelela kwatasaa lipilu za bona. Kabakala kuli ba ziba kuli Jehova u bata ku ba tusa, ba amuhelanga lika za ba fa ha alaba likupo za bona, niha neikaba kuli haki zona luli ze ne ba libelela. *
Litaba za mwa Bibele ze akalelizwe ku baliwa mwa April
[Litaluso za kwatasi]
^ para. 4 Swanisezo ya Jesu yeo i bonisa lika ze ezahalanga luli mwa bupilo. Majuda ne banga kuli ku amuhela baenyi ki nto ya butokwa hahulu. Lubasi ne lu lukisanga linkwa ze kwana feela lizazi li li liñwi, kamukwaocwalo, ne ku sa komokisi ku kupa linkwa haiba ze ne lukisizwe zazi leo ne li felile. Hape haiba lubasi ne lu shebile, ne ba lobalanga hamoho fa bulilo mwa muzuzu u li muñwi.
^ para. 7 Kuli mu itute ze ñata ka za mo mu kona ku lapelela ku Mulimu kuli a mi utwe, mu bone kauhanyo 17 mwa buka ya Bibele I Lutañi Luli? ye hatisizwe ki Lipaki za Jehova.
Mulimu wa tabela ku alaba litapelo za batu ba ba lapela ku yena ka tumelo
