“Tulemeno Twa Mulimu to tu sa Bonahali tu Iponahaza Hande”
MU SUTELELE KU MULIMU
“Tulemeno Twa Mulimu to tu sa Bonahali tu Iponahaza Hande”
Kana mwa lumela kuli Mulimu u teñi? Haiba ki cwalo, kana ku na ni bupaki bo mu ziba bo bu bonisa kuli Mulimu u teñi? Taba ya niti kikuli ku na lika ze lu iponela ze bonisa kuli ku na ni Mubupi ya butali, ya na ni maata, ni ya na ni lilato. Ki bufi bona bupaki bo, mi bu lu kolwisa cwañi kuli ku na ni Mubupi? Kuli mu fumane kalabo, ha mu nyakisise manzwi a muapositola Paulusi a kwa liñolo la naa ñolezi Bakreste ba kwa Roma.
Paulusi naa ñozi kuli: “Tulemeno twa Mulimu to tu sa bonahali tu iponahaza hande haisamba lifasi li ezwa, kakuli tu lemuhiwa ka lika ze ezizwe, nihaiba ona maata a hae a kamita ni Bumulimu bwa hae, kuli mane ha ba koni ku itatula.” (Maroma 1:20) Sina mwa naa boniselize Paulusi, lika za bupile Mubupi li bonisa tulemeno twa hae. Ha lu nyakisiseñi hande manzwi a Paulusi.
Paulusi naa lemuhile kuli, lwa kona ku bona tulemeno twa Mulimu “haisamba lifasi li ezwa.” Mwa taba ye, linzwi la Sigerike le li tolokilwe kuli “lifasi” ha li talusi pulaneti ya lifasi. Kono li talusa batu. * Kabakaleo, Paulusi u bulela kuli, ku zwa feela fo ba bupelwa batu, ba kona ku iponela bupaki bo bu bonisa tulemeno twa Mubupi mwa lika za bupile.
Mi kaufelaa luna lwa iponela hande bupaki bo. Ha bu si ka ipata mwa lika ze bupilwe, kono bwa “iponahaza hande.” Ibe lika ze tuna kamba ze nyinyani, lika ze bupilwe li bonahaza hande kuli ku na ni Mubupi mi hape u na ni tulemeno to tunde. Mubupehelo o ipitezi wa lika ze bupilwe, u lu bonisa hande kuli ku na ni Mulimu ya butali. Mahalimu a tezi linaleli ni lufulo lwa mandinda a matuna li bonisa kuli Mulimu u na ni maata. Lico za mifuta-futa ze tabusa ni ku buheha kwa lizazi ha li likela ni ha li pazula li bonisa kuli Mulimu wa lata batu.—Samu 104:24; Isaya 40:26.
Kana bupaki bo bwa iponahalela hande luli? Eni, bwa iponahalela hande kuli mane batu ba ba sa bu boni ili ba ba sa lumeli kuli Mulimu u teñi, “ha ba koni ku itatula.” Caziba yo muñwi u talusa hande taba ye cwana, u li: Mu nge kuli muzamaisi wa mota u hana ku mamela sisupo sa fa mukwakwa se si bonisa kuli mukwakwa wa potoloha ku liba kwa nzohoto. Mupokola wa mu yemisa mi u kala u mu ñolela tikiti ya kuli a life masheleñi kakuli u lobile mulao. Muzamaisi wa mota yo u lika ku kanana kuli naa si ka bona sisupo sa fa mukwakwa. Kono za bulela ha li utwahali kakuli sisupo seo sa iponahalela hande, mi muzamaisi yo wa bona hande. Hape ka ku ba muzamaisi wa mota, ki musebezi wa hae wa ku bona ni ku mamela lisupo za fa mukwakwa. Kona mo ku inezi ni ka za bupaki bwa kuli Mulimu u teñi bo bu li mwa lika za bupile. “Lisupo” za mwa pupo ze bonisa kuli Mulimu u teñi, za iponahalela hande. Ka ku ba libupiwa ze butali, lu bupilwe ka nzila ye lu konisa ku bona “lisupo” za mwa pupo zeo. Kamukwaocwalo, ha lu koni ku itatula haiba lu iketela ku sa li bona.
Kaniti luli, lika ze bupilwe li patulula ze ñata ka za Mubupi wa luna. Kono ku na ni buka ye patulula litaba ze ñata hahulu ka za Mulimu, mi buka yeo ki Bibele. Ha lu bala Bibele lu ka fumana kalabo kwa puzo ya butokwa ye, ye li: Mulelo wa Mulimu ki ufi ka za lifasi la luna ni ka za batu ba ba yahile mwateñi? Ku ziba kalabo kwa puzo ye, ku ka mi tusa ku sutelela ku Mulimu, ili yo “tulemeno twa [hae] to tu sa bonahali tu iponahaza hande” mwa lifasi le lu pila ku lona.
Litaba za mwa Bibele ze akalelizwe ku baliwa mwa August
[Litaluso za kwatasi]
^ para. 5 Bibele hape i bulela kuli “lifasi” li na ni mulatu wa sibi ni kuli li tokwa mupilisi, ili ku bonisa hande kuli mwa litaba zeo, linzwi la lifasi li ama kwa batu isiñi kwa pulaneti ya lifasi.—Joani 1:29; 4:42; 12:47.
[Manzwi a fa likepe 11]
Lika za bupile Mubupi li bonisa tulemeno twa hae
