Lifasi le ne li bupilwe ka nzila ye li konisa ku ba ni lika ze pila ku lona. Li na ni mezi a mañata, a tusa lika ze ku lona ku zwelapili ku pila. Ku pikuluha kwa lifasi ha li nze li potoloha lizazi, ku tahisa kuli mezi a mwa liwate a si ke a kangela kamba ku fela mwateñi. Mi mbyumbyulu ni maata a lifasi a hoha lika, li sileleza lifasi kuli li si ke la sinyiwa ki ku cisa kwa lizazi. Taba ya kuli bupilo bwa limela bu itingile kwa lifolofolo ni kuli bupilo bwa lifolofolo bu itingile kwa limela ya makaza luli. Kabakaleo, batu ba bañata ba lumela kuli lifasi le ne li bupilwe ka mulelo wa kuli ku be ni lika ze pila ku lona.—Mu bale Isaya 45:18.

Kono mu kana mwa ipuza kuli: ‘Ki kabakalañi fa lifasi ha ku na ni manyando ni ku sa luka?’—Mu bale Deuteronoma 32:4, 5.

Lifasi ne li bupezwi kuli li be lihae la batu ba ba tabile, ba ba kutekana, ni ba ba lata Mubupi wa bona. Kacwalo, batu ne ba bupilwe ka nzila ye ipitezi ku fita limela ni lifolofolo. Luna lwa kona ku utwisisa kuli Mubupi wa luna ki mañi mi lwa kona ku itebuha ni ku likanyisa lilato la hae ni ku lata ku luka kwa hae.—Mu bale Muekelesia 12:13; Mika 6:8.

Mubupi wa luna wa kona ku taleleza lika kaufela za lela ku eza. Kacwalo, lwa kona ku ba ni buikolwiso bwa kuli u ka felisa manyando ni ku sa luka ko ku li teñi mi u ka tahisa kuli lifasi li be lihae la batu ba ba petehile ili ba ba tabile.—Mu bale Samu 37:11, 29; Isaya 55:11.