Mukopano omutuna wa 2020 neuipitezi—neli ona mukopano omutuna wapili one ueziwa mwa lifasi kaufela kulekodiwa ni kuhasanywa ka kuitusisa Intaneti! Kono mwa naha ya Malawi ni ya Mozambique, mizwale ni likaizeli babañata nebakonile kuikola mukopano wo kusina kuitusisa Intaneti. Taba yeo neikonahalile cwañi?

 Bakeñisa miinelo yemiñwi yeipetezi, ba Katengo ka Baswalisanisi ni ba Katengo ka Tuto ka Sitopa Sesietelela nebafile tumelezo ya kuli mukopano omutuna ukone kubuhiswa fa TV ni kuteelezwa fa wayalesi kwa Malawi ni kwa Mozambique. Ki kabakalañi mizwale ni likaizeli ba mwa linaha zeo hane bafilwe tumelezo yeipitezi yeo? Kwa Malawi, data yetusa mutu kuitusisa Intaneti itula hahulu, mi naha ya Malawi ki yeñwi ya linaha zenani data yetula hahulu mwa lifasi kaufela; kacwalo, ki Lipaki za Jehova basikai feela babakona kuituisisa Intaneti. Muzwale wa mwa Katengo ka Mutai mwa naha ya Malawi wa libizo la William Chumbi utalusa kuli: “Mizwale ni likaizeli nebakona feela kubuha kamba kuteeleza kwa mukopano wo fa wayalesi kamba TV.” Muzwale yomuñwi wa mwa Katengo ka Mutai wa Malawi yabizwa Luka Sibeko, ni yena naaize: “Kambe nelusika tusiwa kuli lubuhe mukopano wo fa TV kamba kuuteeleza fa wayalesi, kambe ki mizwale ni likaizeli basikai feela mwa sibaka sesisebelezwa ki mutai waluna bane bakaikola mukopano wo.” Nihaiba kwa Mozambique ki nto yeswana; kambe mizwale ni likaizeli nebasika tusiwa ka nzila yeo, babañata nebaka yawa mukopano wo bakeñisa kuli nebasike bakona kuleka lipangaliko zeneka bakonisa kubuha mukopano wo kamba kukena fa Intaneti.

 Bakeñisa butuku bobuyambukela bwa COVID-19, likampani zeñwi za TV ni mandu a moya amañwi naasakalile kale kubuhisa mikopano ya puteho fa TV kamba kuihasanya fa wayalesi. a Mizwale baluna nebaatumezi likampani zeo, mi bakupa kuli likone kubatusa kubuhisa mukopano omutuna fa TV kamba kuuteeleza fa wayalesi.

 Kwa Malawi, mizwale baluna nebakopani ni muinelo omuñwi otaata. Hañata, likampani zehasanya litaba ka wayalesi kamba ka TV lilumelezanga feela kubuhisa kamba kuhasanya litaba ka hora iliñwi. Neliikalezwi kuli hane likazwelapili kuhasanya litaba zeswana ka nako yetelele, bateelezi nebaka nyikwa mi nebasike bazwelapili kuteeleza kamba kubuha. Kono mizwale baluna babataluseza kuli musebezi waluna utusa batu mwa silalanda. Batalusa kuli nihaiba ka nako ye yeeza kuli batu habakoni kuzwa mwa libaka zabona, lusweli lwatusa batu kuutwa taba yende ya mwa Bibele yeomba-omba, ili yekona kutusa batu kuba bayahi ba naha babande ni kuba ni tabo mwa lubasi. Bañi ba likampani zeo hane bautwile cwalo, balumela kubuhisa mukopano omutuna kamba kuuhasanya ka wayalesi.

 Kwa Malawi, mukopano omutuna neubuhisizwe ki kampani iliñwi ya TV ni kusanywa ki ndu ya moya iliñwi, ili zeo likona kuhasanya litaba kwa batu babañata-ñata mwa naha kaufela. Kwa Mozambique, mukopano omutuna neubuhisizwe ki kampani ya TV iliñwi ni kuhasanywa ka wayalesi ki mandu a moya a 85.

 Kopano neinani kulifa likampani za TV masheleñi aeza K591,637 kuli mizwale ni likaizeli ba mwa linaha zepeli zeo bakone kubuha mukopano omutuna fa TV, mi neinani kulifa mandu a moya masheleñi abato eza K419,200 kuli mukopano ukone kuteelezwa fa wayalesi. Tifo ya kuhasanya litaba neishutana; mandu a moya amanyinyani naalifisa masheleñi aeza K314 mi mandu a moya amatuna anaatusa kuisa litaba mwa naha kaufela ona naalifisa masheleñi afita fa K58,205.

 Mizwale baluna nebaboni teñi kuli linubu zaitusiswa hande. Ka mutala, kwa Malawi, mizwale nebakutiselizwe kwa teko ya kubuhisa mukopano kamba teko ya kuuteeleza fa wayalesi hamulaho wa kuambola ni bañi ba likampani, mi mane kampani yeñwi neikutisize kwa teko ka 30 pesenti. Kukutiswa kwa liteko ko nekutusize kuli masheleñi afita fa K35,862 abukelezwe. Kwa Mozambique, likampani zeñwi nelikutisize kwa teko bakeñisa libubo lelinde lelunani lona la kulifanga masheleñi akwanile ni kulifa ka bunako.

 Mizwale ni likaizeli baluna nebaitebuhile hahulu kuli nebakonile kubuha mukopano omutuna kamba kuuteeleza fa wayalesi. Muzwale yali muuna-muhulu mwa puteho yabizwa Patrick, utalusa kuli: “Lwaitumela ku ba Sitopa Sesietelela kabakala lika kaufela zeba luezelize ka nako ye ya butuku bobuyambukela.” Muzwale yomuñwi wa kwa Malawi yabizwa Isaac utalusa kuli: “Haluna lipangaliko; kacwalo, lwaitumela luli kwa tukiso yeipitezi ye yeezizwe ki kopano ya Jehova ya kuteeleza kwa mukopano fa wayalesi. Kabakala tukiso yeezizwe ye, lubasi lwaka kaufelaa lona lukonile kuteeleza kwa mukopano. Luiponezi fokusweu kuli Jehova walata batu bahae.”

 Mukopano omutuna wa mwa 2020 ki ona mukopano omutuna wapili wanaafumanehile ku ona muhasanyi yomuñwi kwa Mozambique. Muzwale yo utalusa kuli: “Tukiso yeneezizwe ya kubuhisa mukopano omutuna fa TV nei nitusize kulemuha kuli kaniti Jehova ki Mulimu Yamaata Kaufela. Butuku bobuyambukela bwa COVID-19 nebusika mupaleliswa kululukiseza lico za kwa moya ni kunitiseza zona mwa ndu yaka luli. Neniiponezi lilato lebanani lona batanga ba Jehova. Nalumela luli kuli bo ki bona bulapeli bwa niti.”

 Muzwale yali muuna-muhulu mwa puteho wa libizo la Wyson utalusa kuli: “Naitumela luli ku mutanga yasepahala ka kulubabalela hande ka nako ya butuku bobuyambukela bwa COVID-19. Tukiso yeezizwe ya kuli lubuhe mukopano omutuna fa TV kamba kuuteeleza fa wayalesi itusize kuli buñata bwaluna babotana babapila mwa libaka zeshebile lukone kuikola mukopano ni kutusiwa ki ona.”

 Ba Katengo ka Baswalisanisi ni ba Katengo ka Tuto hape balumelelize kuli mukopano omutuna wa 2021 ni ona ukone kubuhiswa fa TV kamba kuteelezwa fa wayalesi mwa libaka zeñwi. Lukonanga cwañi kulifela lisinyehelo za kuhasanya mukopano omutuna ka linzila ze? Taba yeo ikonahaliswa ki linubu zefiwanga kuli lituse mwa musebezi wa mwa lifasi kaufela, mi buñata bwa linubu zeo lifiwanga ka kuitusisa yeñwi ya linzila zeshutana-shutana zebonisizwe fa donate.mr1310.com. Lwaitumela ku mina kwa linubu zeñata zemufanga.