Shi wi Kamoni wa Yehova, le uketabija bampulushi bakulame posapula myanda miyampe ku njibo ne njibo? Bino ye byemwenine Joseph mu Mikronezi mu 2017. Aye ne Batumoni bakwabo basatu, baendele kukalonga kampanye ka busapudi pa bisanga bitolwele.

 Kubwipi na midi, bano Batumoni baná bafika pa kakisanga katyetye kadi’po bantu kintu kya 600. Abo pa kufika ku nkula, mukulu wa pa kisanga webalubula. Joseph ulombola byalongekele amba: “Mukulu wa pa kisanga wanena’mba motoka wa bampulushi uketutūle ku mobo onso. Twatulumuka pa kunena namino, ino twapela na bulēme. Twadi tusaka kukemona na bantu motwibamwenanga nyeke ku njibo ne njibo.”

 Penepa basapudi baenda lwa nshi, basumininwe kwisamba na bantu bavule. Batumoni banena’mba, “bantu badi na kizaji kadi basangela musapu. Twadi tupityija kitatyi kivule pa njibo ne njibo kutabuka motwadi tulangila.”

 Kitatyi pa kupita’po mu dine difuku’dya, motoka wa bampulushi wapita Joseph misunsa ibidi, ebiya musunsa wa busatu waimana. Bampulushi banena Joseph bakamutūle na motoka ku mobo amushadile’ko. Joseph uvuluka’mba, “napelele. Inoko pano bauningila’mba, ‘Kubashala’tu kitatyi kityetye, longa tukakutūle ku mobo ashala’ko.’ Nakomenwa kupela monka mwanda kwadi kukinshadile mobo mavule. Potwadi tufwena ku njibo yo-yonso, bampulushi badi banombola dijina dya kisaka ne kunena’mba shi ubakokola kebakwitabilepo, nankyo tusa kwela sone mwanda wa kudyumuna benē njibo.

 “Kupityila ku buno bukwashi, twabwenye kufika ku mobo onso dine difuku’dya. Twapēne mabuku mavule ne kulaya bantu badi basangela’mba tusa kwibajokela.”

 Bampulushi basapwila Joseph amba “tubasangala pa kukwasha’ko mwanda wa kusapula myanda miyampe.” Batumoni ba Yehova pa kutaluka pa kupona kwa dyuba, bampulushi bebapepeja makasa ku nkula koku basangale, bakwete ne mabuku ku makasa abo.