Ong-li, i Kamoni wa Yehova wa mu Bilgari. Wadi wifunda Bible na nsongwakaji witwa bu Zlatka, wandi mulume kadipo usaka kwifunda Bible. Ong-li unena’mba: “Potwadi twisambila pa būmi bwa kisaka, namulombwele amba i biyampe kulombola benē petu ne betu bana’mba twibasenswe. Zlatka wauntala bya bulanda; waunsapwila’mba kashā kanenene wandi mulume nansha wandi mwana mwana-mukaji wa myaka kitema amba wibasenswe!”

 Zlatka ushintulula’mba, “nebalongelanga kintu kyo-kyonso na mutyima tō, ino nkibwanyapo kwibanena’mba nemusenswe.” Kadi ubweja’ko amba, “mama kadipo unena ami amba unsenswe, kadi nkambo nandi kadipo unena mama amba umusenswe.” Ong-li walombola Zlatka amba Yehova wānenene na diwi dikatampe amba usenswe Yesu. (Mateo 3:17) Wakankamika Zlatka alombele kudi Yehova pa uno mwanda ne kwitungila kitungo kya kunena wandi mulume ne wandi mwana’mba wibasenswe.

 Ong-li unena’mba: “Mafuku abidi pa kupita’po, Zlatka waunombola na nsangaji amba walombēle kudi Yehova amukwashe. Wandi mulume pa kujokela kwinjibo, wamulombola’mba wefundile mu Bible amba i biyampe mukaji alēmeke wandi mulume ne kumusanswa. Pa kupwa kwitūja, wamunena’mba nkusenswe bininge! Kadi wandi mwana pa kujokela kwinjibo, Zlatka wamupamba bīpa ne kumunena’mba nkusenswe! Zlatka waunombwele amba: ‘Pano mutyima ubantūka. Ino myaka yonso’i nkyadipo nebajikwila patōka’mba nebasenswe, ino na bukwashi bwa Yehova, pano nabwanya kulombola buswe bonswele kyami kisaka.’

 Ong-li ubweja’ko amba, “yenga umo pa kupita’po, twetana na mulumya Zlatka, waunena’mba bantu bavule badi bansapwila mpeleje Zlatka kwifunda nobe Bible, ino na bubine kwifunda kwaefunda Bible kubakwasha kyetu kisaka bininge. Pano tudi mu kipwano kiyampe kadi kya nsangaji.”