Le Bulopwe bwa Leza Budi mu Mutyima Obe?
Bilondolola Bible
Aa, Bulopwe bwa Leza ke ngikadilapo ya mityima ya bene Kidishitu. a Bible ulombola kwine kobudi na kwibutela’mba i “Bulopwe bwa mūlu.” (Mateo 4:17) Tala bintu binena Bible bilombola’mba i buludiki budi’ko bine buludikila momwa mūlu.
Bulopwe bwa Leza budi na baludiki, babikalwa, bijila, ne mwingilo wa kulongeja kiswa-mutyima kya Leza mūlu ne pano pa ntanda.—Mateo 6:10; Kusokwelwa 5:10.
Buludiki bwa Leza, nansha Bulopwe, bukabikalanga pa “bantu, ne mizo, ne ndimi” yonso ya pano pa ntanda. (Danyele 7:13, 14) Lupusa lwa buno bulopwe kelutabengapo ku babikalwa, ino lutambanga kudi Leza.—Ñimbo ya Mitōto 2:4-6; Isaya 9:7.
Yesu wāsapwidile batumibwa bandi ba kikōkeji amba ukekalanga nabo mu Bulopwe bwa mūlu mwanda wa “kushikata pa mpona.”—Luka 22:28, 30.
Bulopwe budi na balwana, bene bakonakanibwa na buno Bulopwe.—Ñimbo ya Mitōto 2:1, 2, 8, 9; 110:1, 2; 1 Bene Kodinda 15:25, 26.
Bible kafundijangapo amba Bulopwe bwa mūlu budi mu mutyima obe mu buluji bwa amba buludikilanga mu mutyima wa muntu. Ino aye ulombola’mba “mwanda wa Bulopwe” nansha “myanda miyampe ya Bulopwe” ibwanya kadi ifwaninwe kushinta mityima yetu.—Mateo 13:19; 24:14.
Le binenwa bya amba “bulopwe bwa Leza budi munda mwenu” bishintulula bika?
Bantu bamo i bakomenwe kuyuka kwine kudi Bulopwe bwa Leza pa mwanda wa mwalamwino walamwinwe Luka 17:21 mu malamuni a Bible amoamo. Kimfwa, Mukanda Ukola unena’mba “bulopwe bwa Leza budi munda mwenu.” Pa kwivwanija uno vese senene, tufwaninwe kutala myanda īsambilwe’po.
Bulopwe bwa Leza kebwādipo mu mutyima mūmu wa balwana na Yesu kadi bantapañani.
Yesu wādi wisamba na Bafadiseo, kisumpi kya bendeji ba bipwilo bādi bamulwa ne kukuta nkuku ya mwa kumwipaila. (Mateo 12:14; Luka 17:20) Le bidi na buluji kulanga’mba Bulopwe i ngikadila ya mityima yabo myūmu? Yesu wēbasapwidile amba: “Munda mwenu i muyūlwe bya buzazangi, ne byakujilula bijila.”—Mateo 23:27, 28.
Malamuni makwabo i malamune biyampe binenwa bya Yesu bidi mu Luka 17:21 amba: “Bulopwe bwa Leza budi nenu pano.” (I batwe basendeka; Contemporary English Version) “Bulopwe bwa Leza budi momudi.” (Bwalamuni bwa Ntanda Mipya, kunshi kwa dyani) Bulopwe bwa mūlu bwādi ‘na’ Bafadiseo nansha kwikala ‘mobadi,’ mu buluji bwa amba Yesu, mwine wātongelwe na Leza bu Mulopwe, wādi wimene ku meso abo.—Luka 1:32, 33.
a Bipwilo bivule bya bwine Kidishitu bifundijanga’mba Bulopwe bwa Leza budi munda mwa muntu, nansha mu mutyima wa muntu. Kimfwa, mu États-Unis, Mutōtelo wa ba Batiste ba Kunshi wanenene amba Bulopwe bwa Leza budi kipindi kimo kya “buludiki bwa Leza mu mutyima wa muntu ne mu būmi bwandi.” Muswelo umo onka, Papa Benoît XVI nandi wanenene mu dibuku dyandi Jesus of Nazareth amba “Bulopwe bwa Leza bwiilanga mu mutyima wivwana.”
Tala'po Bidi ne Bino:
ESSENTIAL BIBLE TEACHINGS
Le Bulopwe bwa Leza I Bika?
Yesu paādi usapula, wāfundije bininge myanda ya Bulopwe bwa Leza kupita’ko myanda mikwabo. Mu tutwa twa myaka, balondi bandi nabo bālombele buno Bulopwe bwiye.
KITEBA KYA MULAMI
Le Mulopwe wa Bulopwe bwa Leza I Ani?
Balembi bavule ba Bible bālembele myanda ya mwa kuyukila muntu wadi wa kwikala Mulopwe wa Bulopwe bwa Leza. Mu mānga yonso ya muzo wa muntu, i enka muntu umo kete ubwenye bino bisakibwa.
BIPANGUJO BYA MU BIBLE BILONDOLWELWE
Le Bulopwe bwa Leza Bukalonga Bika?
Tala bintu byobwanya kutengela pakaludika Bulopwe bwa Leza ino ntanda.
