Aa, kitatyi kyetu kya kufwa kekitungilwepo kala. Pa kyaba ku kubingija luno lukulupilo, aye Bible unena’mba divule dine lufu lufikanga mwanda wa “myanda yampikwa kulaa.”—Musapudi 9:11.

Mwene Bible unena’mba kudi “kitatyi kya kufwa”?

 En-en, Musapudi 3:2 unena’mba kudi “kitatyi kya kubutulwa ne kitatyi kya kufwa; kitatyi kya kukuna ne kitatyi kya kutukuna kyakuninwe.” Inoko myanda idi kūlu ne kunshi kwa uno vese ilombola’mba Bible wisambilanga pa mushintyilanga bitatyi mu būmi. (Musapudi 3:1-8) Leza ketutungīlepo kitatyi kyetu kya kufwa monka mwakanigidilanga kidimye akune nkunwa mu kitatyi kampanda. Ino mwanda udi’po i uno amba ketufwaninwepo kuta mutyima bininge ku myanda ya mu būmi bwa bukile-bukya twailwa Umpangi wetu.—Musapudi 3:11; 12:1, 13.

Būmi bubwanya kulēpejibwa

 Nansha būmi byobudi bu kyula mu kyūla, tubwanya kwikala’ko kitatyi kilampe shi tukwata butyibi bwa tunangu. Bible unena’mba: “Bufundiji bwa muntu wa tunangu i nsulo ya būmi mwanda wa kusāsukija muntu ku makinga a lufu.” (Nkindi 13:14) Kadi Mosesa nandi wāsapwidile bene Isalela amba bādi babwanya ‘kwikala bōmi kitatyi kilampe’ shi bākōkele misoñanya ya Leza. (Kupituluka mu Bijila 6:2) Inoko, shi ketutele’kopo mutyima tubwanya kwipipija būmi bwetu pa mwanda wa bilongwa bibi nansha bya bulembakane.—Musapudi 7:17.

 Shako, ekale shi tudi na tunangu nansha shi tutele’ko mutyima namani, ketubwanyapo kunyema lufu. (Bene Loma 5:12) Inoko, kusa kwikala kushinta, mwanda Bible i mulaye amba “lufu kelukekala’kopo dikwabo.”—Kusokwelwa 21:4.