Pa kupwana na Leza bikulomba kwifunda myanda imutala ne kulonga bintu bimusangaja. Kupwa Leza nandi, ‘ukakufwena.’ (Yakoba 4:8) Bible witukulupija amba, kadipo “kulampe na batwe bonso.”—Bilongwa 17:27.

•  Byofwaninwe kulonga pa kupwana na Leza

•  Milangwe ya bubela itala pa kupwana na Leza

 Tanga Bible

•  Binena Bible: “Kisonekwa kyonso i kisonekejibwe na mushipiditu wa Leza.”—2 Temote 3:16.

•  Mokishintulwila: Leza ye Mulembi wa Bible. Balembi ba Bible bālembele milangwe ya Leza. Enka mu dino dibuku kete, mo mudi bitusakila Leza kulonga. Kadi i mwitulombole’mo ne ngikadila yandi, kimfwa buswe, boloke, ne lusa.—Divilu 34:6; Kupituluka mu Bijila 32:4.

•  Byobwanya kulonga: Tanga Bible difuku ne difuku. (Yoshua 1:8) Langulukila pa byotanga, kupwa wiipangule amba: ‘Le bimfundija bika pa ngikadila ya Leza?’—Ñimbo ya Mitōto 77:12.

   Kimfwa, tanga Yelemia 29:11, kupwa wiipangule amba: ‘Lelo Leza unsakilanga bika—ndoe’ni nansha kyamalwa? Le i Leza wa kinongo’ni nansha i Leza unsakila būmi buyampe bwa kumeso?’

 Bandila bupangi

•  Binena Bible: “Ngikadila [ya Leza] yampikwa kumweka i mimweke patōka tamba ku kupangwa kwa ino ntanda, mwanda i mimwekelele mu bintu byalongele.”—Bene Loma 1:20.

•  Mokishintulwila: Bipangwa bya Leza bimweka, bilombola ngikadila yandi imoimo, monka mulombwelanga kya busendwe bwino bwa sendwe wakyo, nansha mulombwelanga mashini makutakane bwino bwa mwine wiapungile. Kimfwa, bukomo bwa bongolo bwa muntu ne muswelo mukutakane obulongelwe bilombolanga tunangu twa Leza, kadi bukomo bwa dyuba ne ñenyenye mikwabo bilombolanga bukomo bwa Leza.—Ñimbo ya Mitōto 104:24; Isaya 40:26.

•  Byobwanya kulonga: Witūdile’ko kitatyi kya kubandila bupangi mwanda wa kwibwivwanija senene. Polonga namino wiipangule amba, ‘le buno buya bwa kutendelwa budi mu bupangi bumfundija bika padi Leza? a Na bubine, kudi kadi bintu bikwabo bivule bitala padi Leza byoketubwanyapo kwifundila ku bupangi. O mwanda Leza wētupele Bible.

 Ingidija dijina dya Leza

•  Binena Bible: “Nkamukiñanga mwanda uyukile dijina dyami. Ukangitanga, nami nkamwitaba.”—Ñimbo ya Mitōto 91:14, 15.

•  Mokishintulwila: Leza, wa dijina dya bu Yehova, utele mutyima boba bayukile dijina dyandi kadi bedingidija na bulēme. b (Ñimbo ya Mitōto 83:18; Malaki 3:16) Leza wēyukenye kotudi na kwitutelela dijina dyandi. Unena’mba, “Ami ne Yehova. Dyo dyami dijina.”—Isaya 42:8.

•  Byobwanya kulonga: Tela dijina dya Yehova powisambila pādi.

 Wisambe na Yehova mu milombelo

•  Binena Bible: “Yehova udi pabwipi na boba bonso bamwita.”—Ñimbo ya Mitōto 145:18.

•  Mokishintulwila: Yehova ufwenanga boba bonso bamulomba na lwitabijo. Milombelo ibadilwa mu butōtyi kadi ilombola’mba tulēmekele Leza bininge.

•  Byobwanya kulonga: Lombela kudi Leza kitatyi ne kitatyi. (1 Bene Tesalonika 5:17) Mulombole makambakano obe ne mowiivwanina.—Ñimbo ya Mitōto 62:8. c

 Ikala na lwitabijo mudi Leza

•  Binena Bible: “Pampikwa lwitabijo kebibwanikapo kusangaja Leza biyampe.”—Bahebelu 11:6.

•  Mokishintulwila: Pa kufwena kudi Leza, tufwaninwe kwikala na lwitabijo mwadi. Mungya Bible, kwikala na lwitabijo kulomba bintu bivule kupita’ko’tu kwitabija’mba Leza udi’ko. Kulomba ne kukulupila bininge mudi Leza, mu milao yandi ne misoñanya yandi. Kikulupiji i kisakibwa kikatampe pa kupwana na muntu.

•  Byobwanya kulonga: Pa kwikala na lwitabijo lwa bine bilomba kwikala na buyuki. (Bene Loma 10:17) Nanshi wifunde Bible kadi bandaula shi ubwanya kukulupila mudi Leza ne mu madingi andi. Batumoni ba Yehova bakasangela kwifunda nobe Bible. d

 Longa bintu bisangaja Leza

•  Binena Bible: “Buno namino bo buswe bwa Leza, amba tulame mbila yandi.”—1 Yoano 5:3.

•  Mokishintulwila: Yehova udi pabwipi na babo bamulombola buswe na kwielela’ko kukōkela mbila yandi.

•  Byobwanya kulonga: Potanga Bible, tala bintu bisenswe Leza ne byashikilwe. Wiipangule amba, ‘le i bintu’ka byomfwaninwe kushinta mwanda wa nsangaje Umpangi wami?’—1 Bene Tesalonika 4:1.

 Londa madingi a Leza, umone mwasa kukutela mutyima

•  Binena Bible: “Tompai mumone amba Yehova i muyampe.”—Ñimbo ya Mitōto 34:8.

•  Mokishintulwila: Leza ukwita wimwene abe mwine amba i muyampe. Shi ubemwena muswelo wakusenswe ne kukukwatakanya, ukasaka kumufwena.

•  Byobwanya kulonga: Potanga Bible, londa madingi a Leza wimwene kamweno kadi’mo. (Isaya 48:17, 18) Kadi tala bimfwa bya bantu bakwashibwe na Leza banekenye makambakano abo, balumbulule būmi bwabo ne bwa bisaka byabo, kadi bekale na nsangaji ya bine. e

 Milangwe ya bubela: Ketubwanyapo kuyuka Leza mwanda i kikata kifyame.

 Bubine: Kudi myanda imo itala padi Leza mikomo kwivwanija, kimfwa, kwikala kwaikele bu Mushipiditu keumweka. Inoko, tubwanya kuyuka Leza. Bine, Bible unena amba tufwaninwe kuyuka Leza pa kukamona būmi bwa nyeke. (Yoano 17:3) Bible wingidijanga bishima byotukokeja kwivwana biyampe pawitulombola myanda ya Umpangi wetu, ngikadila yandi, mpango yandi pa bantu ne ntanda, ne misoñanya yandi. (Isaya 45:18, 19; 1 Temote 2:4) Kadi enka na motwanenenanga kala, Bible witusokwelanga dijina bya Leza. (Ñimbo ya Mitōto 83:18) Nanshi, tubwanya kuyuka Leza ne kumufwena.—Yakoba 4:8.