Le I Ani Ukenda Mūlu?

VUMIJA MU

Bilondolola Bible

Leza i mutonge bene Kidishitu ba kikōkeji batyetye kete, bakasangwilwa mūlu shi abafu. (1 Petelo 1:3, 4) Shi abebatonge, bafwaninwe kwikala nyeke na lwitabijo lukomo ne mwiendelejo wampikwa disubi, kutyina bakaleka kubwanya bisakibwa bya kupebwa kipyanwa kyabo kya momwa mūlu.—Bene Efisesa 5:5; Bene Fidipai 3:12-14.

Le boba bakenda mūlu bakalonga’mo bika?

Bakengila pamo na Yesu bu balopwe ne babitobo myaka 1 000. (Kusokwelwa 5:9, 10; 20:6) Bakabunda “madiulu mapya,” nansha umbikalo wa momwa mūlu, mwine ukaludika “ntanda mipya,” nansha bantu ba pano panshi. Bano baludiki ba momwa mūlu bakajokeja bantu ku boloke bwādi busaka Leza dibajinji.—Isaya 65:17; 2 Petelo 3:13.

Le i bantu banga bakasangwilwa mūlu?

Bible unena’mba bantu 144 000 bakasangwilwa mūlu. (Kusokwelwa 7:4) Mu kimonwa kilembelwe mu Kusokwelwa 14:1-3, mutumibwa Yoano wāmwene “Kana ka Mukōko kemene pa Lūlu lwa Ziona, kadi wadi pamo na bantu 144 000.” Mu kino kimonwa, “Kana ka Mukōko” i Yesu musanguke. (Yoano 1:29; 1 Petelo 1:19) “Lūlu lwa Ziona” i kyepelo kizunzulwe kya Yehova ne bantu 144 000 bakabikala nabo momwa mūlu.—Ñimbo ya Mitōto 2:6; Bahebelu 12:22.

Boba “betyilwe, batongwe” kukabikala na Kidishitu mu Bulopwe i “kaluombe katyetye.” (Kusokwelwa 17:14; Luka 12:32) Kino kilombola amba i batyetye shi twibadingakanye na buvule bonso bwa mikōko ya Yesu.—Yoano 10:16.

Milangwe ya bubela pa boba bakenda mūlu

Milangwe ya bubela: Bantu bayampe bonso bendanga mūlu.

Bubine: Leza i mulaye kupa bantu bayampe bavule būmi bwa nyeke pano pa ntanda.—Ñimbo ya Mitōto 37:11, 29, 34.

Yesu wānenene amba: “I kutupu muntu wakandile mūlu poso yewa watūkile mūlu.” (Yoano 3:13) Mu uno muswelo, wālombwele amba bantu bayampe bāfwile aye kaile, kimfwa Abalahama, Mosesa, Yoba, ne Davida, kebāendelepo mūlu. (Bilongwa 2:29, 34) Ino, bādi na lukulupilo lwa kusangwilwa pano pa ntanda.—Yoba 14:13-15.
Lusangukilo lwa kwenda mūlu lwitwanga bu “lusangukilo lubajinji.” (Kusokwelwa 20:6) Kino kilombola’mba kukekalanga lusangukilo lukwabo. I lusangukilo lwa boba bakekala pano pa ntanda.
Bible ufundija’mba mu buludiki bwa Bulopwe bwa Leza, “lufu kelukekala’kopo dikwabo.” (Kusokwelwa 21:3, 4) Uno mulao utala pano pa ntanda, mwanda mūlu i mutupu lufu.

Milangwe ya bubela: Muntu ne muntu ye wa kutonga shi ukenda mūlu nansha kushala pano pa ntanda.

Bubine: Leza ye utoñanga bene Kidishitu ba kikōkeji ba kupala “mpalo ya lwito lwa mūlu,” ko kunena’mba lukulupilo lwa kwenda mūlu. (Bene Fidipai 3:14) Ke kusakapo nansha kwabila kwa muntu kulengejanga bamutonge.—Mateo 20:20-23.

Milangwe ya bubela: Lukulupilo lwa kukekala na būmi bwa nyeke pano pa ntanda ludi na mvubu mityetye, lukapebwa enka boba kebafwaninwepo kwenda mūlu.

Bubine: Leza witanga boba bakekala na būmi bwa nyeke momwa mūlu bu “bantu bami,” “batongwe bami,” ne bu “boba beselwe na Yehova.” (Isaya 65:21-23) Bakekala na dyese dya kufikidija mpango mibajinjibajinji ya Leza itala pa bantu—kwibapa būmi bwa nyeke bubwaninine mu paladisa pano pa ntanda.—Ngalwilo 1:28; Ñimbo ya Mitōto 115:16; Isaya 45:18.

Milangwe ya bubela: Kibalwa kya bantu 144 000 batelelwe mu Kusokwelwa i kya kyelekejo, ke kya kumonapo’nka mokilembelwe.

Bubine: Nansha mu kusokwelwa byomudi bibalwa bya kyelekejo, bibalwa bimo i bya kumona enka mobilembelwe. Kimfwa, wisambila pa “majina 12 a batumibwa 12 ba Kana ka Mukōko.” (Kusokwelwa 21:14) Langulukila pa bubinga botwafudila ku kunena’mba kibalwa kya bantu 144 000 kifwaninwe kumonwa’nka mokikadile.

Mu Kusokwelwa 7:4 i balembe’mo amba, “bungi bwa boba batūdilwe biyukeno [nansha betabijibwe kupebwa būmi bwa mūlu], 144 000.” Myanda idi mu mavese alonda’ko īsambila pa kibumbo kya bubidi amba: “kibumbo kikatampe kya bantu, kekikokejapo kubalwa na muntu nansha umo.” Bantu ba mu “kibumbo kikatampe” nabo bakamwena lupandilo kudi Leza. (Kusokwelwa 7:9, 10) Shi kibalwa kya bantu 144 000 i kya kyelekejo ne shi kifunkila pa kibumbo kekikokejapo kubalwa, nabya i patupu kwishila pa bukata bwa bino bibumbo bibidi. a

Ne kadi, banena’mo amba bantu 144 000 “bapotelwe mu bantu bu byangulwa bibajinji.” (Kusokwelwa 14:4) Bishima “byangulwa bibajinji” bifunkila pa mikendi mityetye itongelwe. I bifwaninwe kufunkila pa boba bakabika na Yesu momwa mūlu pa babikalwa kebabadika pano pa ntanda.—Kusokwelwa 5:10.

a Muswelo umo onka, Polofesele Robert Thomas walembele pa mwanda utala bantu 144 000 batelelwe mu Kusokwelwa 7:4 amba: “Kino kibalwa kitelelēle i kishile na kibalwa kyampikwa kupotoloka kidi mu shapita 7:9. Shi twikimone mu buluji bwa kyelekejo, nabya bibalwa byonso bidi mu uno mukanda bikamonwa mu buluji bwa kyelekejo.”—Kusokwelwa 1-7: An Exegetical Commentary, paje 474.