En-en, Leza ukakulekela bubi bobe shi utabule matabula mayampe. Bible unena’mba Leza ‘kejengapo kulekela’ ne amba “ukalekela bya binebine.” (Nehemia 9:17; Ñimbo ya Mitōto 86:5; Isaya 55:7) Shi wetulekela, wetulekela bya binebine. Bubi bwetu ‘bujimankanibwanga’ nansha kubulwa. (Bilongwa 3:19) Kadi Leza ulekelanga lonso, mwanda unena’mba “nkikavulukapo monka bubi bwabo.” (Yelemia 31:34) Shi wetulekela, kavulukangapo bubi bwetu mwanda wa kwitutopeka nansha kwitupa mfuto monka.

 Inoko kulekela kulekela Leza ke buzozepo nansha kukimba’tu kusangaja muntu. Kashintangapo nansha dimo misoñanya yandi myoloke. Pa kino, upelanga kulekela bubi bumobumo.—Yoshua 24:19, 20.

Bya kulonga pa kulekelwa na Leza

1.   Itabija’mba shi wi mulonge bubi, wimujilule misoñanya ya Leza. Bintu byolongele byobisansa padi bakwenu, ufwaninwe dibajinji kuyuka’mba wi mulubile Leza na bubi bobe.—Ñimbo ya Mitōto 51:1, 4; Bilongwa 24:16.

2.   Wisapule kudi Leza mu milombelo.—Ñimbo ya Mitōto 32:5; 1 Yoano 1:9.

3.   Wialakanye bininge pa bubi bobe. Kuno “kufītwa mutyima bya bwine Leza” kutwalanga ku kwisāsa, nansha kwalamuka pa mutyima. (2 Bene Kodinda 7:10) Kadi mubadilwa ne kwialakanya pa bintu bibi bitwalanga ku bubi.—Mateo 5:27, 28.

4.   Shinta ngikadila yobe, ko kunena’mba ‘alamuka.” (Bilongwa 3:19) Ko kushintulula’mba leka kujokela mu kilongwa kibi nansha kibidiji kibi, nansha’mba shinta mulangilo obe onso ne bilongwa byobe.—Bene Efisesa 4:23, 24.

5.   Longa bukomo bwa kupwa kibi nansha kulongolola bibi bilupukile’ko. (Mateo 5:23, 24; 2 Bene Kodinda 7:11) Lomba lusa ku boba basusuka pa byolongele nansha kujilula kobe, kadi shi bibwanika aluja byowaselele.—Luka 19:7-10.

6.   Lombela kudi Leza akulekele pa kinkūlwa kya Yesu. (Bene Efisesa 1:7) Shi usaka evwane milombelo yobe, ufwaninwe kulekela boba bakulubīle.—Mateo 6:14, 15.

7.   Shi wi mulonge bubi bukatampe, lombola’mo muntu ubwenye bisakibwa bya kukukwasha ku mushipiditu kadi aye ubwanya kulombela pa mwanda obe.—Yakoba 5:14-16.

Milangwe ya bubela pa mwanda utala kulekelwa na Leza

 “Shi nesapula bubi bwami kudi mumpe nansha mwingidi wa kipwilo, nafwilwa lusa.”

 I kutupu muntu udi na lupusa lwa kulekela bubi bwa mukwabo bwalubīle Leza. Nansha kwisapula bubi kudi muntu mukwabo byokukokeja kukwasha yewa ulongele bubi eivwane biyampe, ino i enka Leza kete ubwanya kulekela bubi.—Bene Efisesa 4:32; 1 Yoano 1:7, 9.

 Shi bidi uno muswelo, penepa Yesu wādi ukimba kunena bika paāsapwidile batumibwa amba: “Shi mulekele muntu e-ense bubi, nankyo bubamulekelwa; shi kemulekēlepo muntu e-ense bubi, nankyo kebumulekēlwepo.” (Yoano 20:23) Wādi wisambila pa lupusa lwa pa bula lwaādi wa kupa batumibwa kitatyi kyobādi ba kutambula mushipiditu ujila.​—Yoano 20:22.

 Monka mokyālailwe, batumibwa bātambwile kino kyabuntu pobēbapungulwidile mushipiditu ujila mu mwaka wa 33 Yesu ke mwiye. (Bilongwa 2:1-4) Mutumibwa Petelo wāingidije luno lupusa paātyibīle mwanā bwanga Ananaisa ne Safaila mambo. Petelo wāyukile mu kingelengele nkuku yabo ya bongojani, kadi butyibi bwandi bwālombwele amba bubi bwabo kebwādipo bwa kulekelwa.—Bilongwa 5:1-11.

 Kino kyabuntu kya mu kingelengele kya mushipiditu ujila, ne byabuntu bikwabo pamo bwa kubelulañana, kwisamba mu ndimi, byāpwile pa kufwa kwa batumibwa. (1 Bene Kodinda 13:8-10) Nanshi, dyalelo i kutupu muntu ubwanya kufwila bubi bwa mukwabo lusa.