Divilu 15:1-27
15 Penepa Mosesa ne bene Isalela kebembila Yehova+ luno lwimbo amba:
“Nkembila Yehova, mwanda wezunzula peulu bininge.+
Kabalwe ne mwine utentamine’po webela mu dijiba.+
2 Yah* i buninge ne bukomo bwami, mwanda waikala ke lupandilo lwami.+
Uno i Leza wami, nkamutendelanga;+ Leza wa tata,+ nkamuzunzulanga.+
3 Yehova i wa bulwi mukomokomo.+ Dijina dyandi i Yehova.+
4 Waela makalo a Felo ne kibumbo kyandi mu dijiba,+Ne ba bulwi bandi balumbuluke abashika mu Dijiba Dityila.+
5 Mema atūta abebapūta; abashika mu mushike wa mema pamo bwa dibwe.+
6 A Yehova, kuboko kobe kwa lundyo i kukatampe mu bukomo;+A Yehova, kuboko kobe kwa lundyo kukokeja kuvingakanya walwana.
7 Mu bukatampe bobe ukokeja kutyumuna boba bakutombokela;+Utumanga bulobo bobe budyendyemuka, bwebadya pamo bwa bityakuku.
8 Na umpuya wa mu myulu yobe mema ebungile pamo;Aimana nkū pamo bwa lubumbu;Mema atūta ekwata mu bukata mwa* dijiba.
9 Walwana wanenene amba: ‘Nsa kwibalondalonda! Nsa kwibapeta!
Nsa kwabanya kitūtwa ne byongikuta!*
Nsa kusomona kipete kyami! Kuboko kwami kusa kwibanekenya!’+
10 Wapujije umpuya obe, dijiba dyebaputa;+Bashika pamo bwa fweta mu mema a mushike.
11 A Yehova,+ lelo i leza’ka udi pamo bwa abe?
I ani udi bwa abe, wilombola bu mukomo mu buujila?+
Mwine ufwaninwe kutyinwa na ñimbo ya mitendelo, Mwine ulonga bya kutendelwa.+
12 Waolwele kuboko kobe kwa lundyo, ntanda yebamina kubyu.+
13 Mu buswe bobe bwa ndamatyidile ubaendeja bantu bowakūdile;+Mu bukomo bobe ukebaludikila ku kifuko kyobe kijila kya kwikala.
14 Bantu bakevwana;+ bakatetema;Moyo mukatampe* ukakwata bekadi ba Fidishitia.
15 Mu kine kitatyi’kya bamfumu* ba Edoma bakatuyuka,Luzakalo lukakwata balopwe* bakomokomo ba Moabu.+
Bekadi bonso ba Kenani bakatyumukwa mutyima.+
16 Moyo ne kityino bikebaponena.+
Pa mwanda wa bukatampe bwa kuboko kobe kebakajinapo pamo bwa dibweEnka ne bipita bantu bobe, a Yehova,Enka ne bipita+ bantu bowalongele.+
17 Ukebasela ne kwibemika mu lūlu lwa bupyani bobe,+Kifuko kikomejibwe kyowilongolwedile mwanda wa kwikala’mo, a Yehova,A Yehova, kipandulwe kyowatūdile’ko na maboko obe.
18 Yehova ukabikalanga bu mulopwe nyeke ne nyekeke.+
19 Tubalwe twa Felo pamo ne makalo andi a divita ne basola bandi ba pa tubalwe pa kutwela mu dijiba,+Yehova wajokeja mema a dijiba pobadi,+Ino bantu ba Isalela bapita pa nshi myūmu mu bukata mwa dijiba.”+
20 Penepo Midiamu mupolofeto mukaji, mwanabo na Alone, wayata ñoma mu kuboko kwandi, kadi bana-bakaji bonso nabo bamulonda na mañoma koku baja.
21 Midiamu wadi utundaija bana-balume amba:
“Imbilai Yehova, mwanda wezunzula peulu bininge.+
Kabalwe ne mwine utentamine’po webela mu dijiba.”+
22 Kupwa Mosesa watambija Isalela ku Dijiba Dityila, baenda mu ntanda mutuputupu ya Shula, bananga mafuku asatu mu ntanda mutuputupu, ino kebatenepo mema.
23 Bafika ku Mala,*+ ino kebabwenyepo kutoma mema a ku Mala mwanda adi alula. O mwanda wainikile kino kifuko bu Mala.
24 Penepo bantu baanza kwiuningila Mosesa,+ kebanena’mba: “Le tusa kutoma bika?”
25 Nandi waabija Yehova,+ Yehova nandi wamulombola mutyi umo nenki. Aye pa kwiwela mu mema, mema atalala.
Kwine’kwa ye kwaebatūdile musoñanya ne muswelo wa kutyiba mambo, kadi webatūla pa ditompo kwine’kwa.+
26 Kanena’mba: “Shi wivwane biyampe diwi dya Yehova Leza obe ne kulonga byoloke ku meso andi ne kuta mutyima ku mbila yandi ne kulama misoñanya yandi yonso,+ nankyo nkikakuletelapo misongo yonaletele pa bene Edipito,+ mwanda amiwa Yehova, nkundapanga.+
27 Kupwa papo baiya ku Edime, kwadi masulo a mema 12 ne tunkindu 70. Ebiya batūla nkambi kwine’kwa kubwipi na mema.
Kunshi kwa Dyani
^ “Yah” i dijina Yehova mu kīpi.
^ Kishima pa kishima i, “mutyima wa.”
^ Nansha’mba “bikuta muya wami.”
^ Kishima pa kishima i, “Bisanso bya lubutulo.”
^ Nansha’mba “basheke.”
^ Nansha’mba “bendeji.”
^ Ko kushintulula’mba “Bululu.”
