Divilu 23:1-33
23 “Kufwaninwepo kusambakanya* mwanda wa bubela.+ Kokekupa ku mutamba wa muntu mubi ne kwikala kamoni wa nshikani.+
2 Kufwaninwepo kulonda kibumbo kukalonga bibi, kadi kufwaninwepo kunyengakanya butyibi na kuleta bukamoni mwanda wa kwendela pamo na kibumbo.*
3 Kufwaninwepo kwikala na mboloji mu lupata lwa mulanda.+
4 “Shi ubatana ñombe wa walwana nobe nansha mpunda wandi ulumbakana, ufwaninwe kumujokejeja’ye.+
5 Shi ubamone mpunda wa muntu ukushikilwe wapone munshi mwa kiselwa kyandi, kufwaninwepo kumusūla wamushiya. Ufwaninwe kumukwasha atūle nyema.+
6 “Kokanyengakanya butyibi bwa mulanda wa mu bukata mwenu mu kidye.+
7 “Kokekuja mu mambo* a bubela, kadi kokepaya muntu wampikwa mambo ne moloke, mwanda nkikatelapo muntu mubi bu moloke.*+
8 “Kufwaninwepo kwitabija kutyibwa milomo, mwanda kutyibwa milomo kusabanga meso a bantu bamona biyampe kadi kunyengakanyanga binenwa bya bantu boloke.+
9 “Kufwaninwepo kumwesha mweni wa kibundi malwa. Banwe bene muyukile kwikala bu mweni mokwikadile,* mwanda nenu mwadi beni ba kibundi mu ntanda ya Edipito.+
10 “Ukakuna nkunwa mu ntanda yobe ne kukonga byangulwa byayo mu myaka isamba.+
11 Ino mu mwaka wa busamba-bubidi ukeileka bitupu kudima’yo mpika, balanda badi mu bukata mwa bantu bobe bakadya’ko, kadi byobya byobakashiya, bikadibwa na banyema ba ntanda. E mokalongela na budimi bobe bwa mañanza ne impafu yobe.
12 “Mu mafuku asamba ukengila mwingilo obe; ino mu difuku dya busamba-bubidi, ukaleka mingilo yobe ya masusu, amba ñombe obe ne mpunda obe bakōkolokwe, ne mwanā umpika obe mwana-mukaji ne mweni wa kibundi nabo batūje.+
13 “Ufwaninwe kutadija ulonge byonso byonakulombola’bi,+ kadi kufwaninwepo kutela majina a baleza bakwabo; kebafwaninwepo kwivwanikwa ku milomo* yobe.+
14 “Ukansobela masobo misunsa isatu ku mwaka.+
15 Ukalama Masobo a Mikate Yampikwa Kiyujo.+ Ukadya mikate yampikwa kiyujo mafuku asamba-abidi pa kitatyi kitungwe mu kweji wa Abibu,*+ monka monakusoñaninye, mwanda mu kine kitatyi’kya mo mowatambile mu Edipito. Kekwakikala nansha umo wa kumweka ku meso ami makasa bitupu.+
16 Kadi, ukalama Masobo a Mwangulo* wa bipa bibajinji bya mingilo yobe ya masusu, byowakunine mu budimi;+ ne Masobo a Kukongakanya* ku mfulo kwa mwaka, pokongakanya bipa bya mingilo yobe ya masusu+ mu budimi bobe.
17 Misunsa isatu ku mwaka, bana-balume bobe bonso bakamweka ku meso a Mfumwetu wa bine, Yehova.+
18 “Kufwaninwepo kulambula mashi a kitapwa kyami pamo ne kintu kyelwe kiyujo. Kadi bitapwa bya māni bilambwilwe pa masobo ami kebikalālapo bufuku bonso kufika ne ku lubanga.
19 “Ufwaninwe kuleta bilumbuluke bya mu bipa bibajinji bya mu ntanda yobe ku njibo ya Yehova Leza obe.+
“Kufwaninwepo kutēka kana ka mbuji mu mabele a inako.+
20 “Natume mwikeulu ku meso obe+ wa kukulama mu dishinda ne kukutweja mu kifuko kyonkulongolwedile.+
21 Mute mutyima ne kukōkela diwi dyandi. Kokimutombokela, mwanda kakalekelapo kujilula kwenu,+ ke-pantu dijina dyami didi mwadi.
22 Inoko, shi ukōkele diwi dyandi binebine ne kulonga byonso byonena ami, nabya nkashikwa balwana nobe ne kulwa na boba bakulwa.
23 Mwanda mwikeulu wami ukakutangidila kumeso ne kukufikija ku bene Amole, bene Hiti, bene Pedizi, bene Kenani, bene Hivi, ne bene Yebushi, kadi nkebatukija fututu.+
24 Kufwaninwepo kwivukwila ku baleza babo nansha kwitabija kwibengidila kwine, kufwaninwepo kwiula bilongwa byabo.+ Ino, ufwaninwe kwibatūta ne kulalakanya bikomo byabo bikola.+
25 Ufwaninwe kwingidila Yehova Leza obe,+ nandi ukeselanga mikate ne mema obe.+ Nkatalulanga misongo mu bukata mobe.+
26 Bana-bakaji ba mu ntanda yobe kebakapulumunapo memi nansha kwikala bañumba,+ kadi nkakupa būmi bulampe bininge.*
27 “Nkatuma moyo wami kumeso kobe,+ nkela kavutakanya mu bantu bonso boketana nabo, kadi nkalengeja balwana nobe bonso bakunyeme koku banekenibwe.*+
28 Nkatuma kutuyuka* kumeso kobe,+ nako kukapinga bene Hivi, bene Kenani ne bene Hiti ku meso obe.+
29 Nkikebapangapo ku meso obe mu mwaka umo kete, kutyina’mba ntanda yakekala masala kadi banyema ba ntanda bakakuvudila.+
30 Nkebapanga ku meso obe bityebitye, kufika ne byowivudija ne kukwata ntanda’ya.+
31 “Nkakutūdila mukalo kushilwila ku Dijiba Dityila kutūla ne ku dijiba dya bene Fidishitia, kushilwila ku ntanda mituputupu kutūla ne ku Munonga;*+ mwanda nkapāna bekadi ba ntanda’ya mu kuboko kobe, kadi ukebapanga ku meso obe.+
32 Kufwaninwepo kusamba nabo kipwano nansha na baleza babo bene.+
33 Kebafwaninwepo kwikala mu ntanda yobe, kutyina’mba bakakulongeja bubi kondi. Shi wingidile baleza babo, nankyo bine dikekala dikinga kodi.”+
Kunshi kwa Dyani
^ Kishima pa kishima i, “kusela.”
^ Nansha’mba “bukamoni bwa bavule.”
^ Kishima pa kishima i, “mwanda.”
^ Nansha’mba “nkikabingijapo muntu mubi.”
^ Nansha’mba “uyukile būmi (muya) bwa mweni.”
^ Kishima pa kishima i, “kyakanwa.”
^ Tala Mbwejo B15.
^ Ayukene ne bu Masobo a Bitanda (Bipema).
^ Ayukene ne bu Masobo a Mayenga, nansha’mba Pentekosa.
^ Nansha’mba “nkavudija mafuku obe.”
^ Nansha’mba “nkalengeja balwana nobe bonso bakwele nyuma.”
^ Bibwanika padi i, “kusela mutyima kūlu; luzakalo.”
^ Ko kunena’mba, Ufalete.
