Eseta 1:1-22
1 Penepo mu mafuku a Ahaswelusa,* ko kunena’mba, yewa Ahaswelusa wadi ubikele pa matanda a bubikavu* 127+ tamba ku India kutūla ku Efiopya,*
2 mu oa mafuku’a, padi pashikete Ahaswelusa pa lupona lwandi lwa bulopwe mu Shushane*+ kibundi kya nsakwa,*
3 mu mwaka wa busatu wa bulopwe bwandi, wasobela bamfumu bandi ne bengidi bandi bonso masobo. Kibumbo kya divita kya Peleshia+ ne Media,+ ne ba bulēme, ne bamfumu ba matanda a bubikavu* badi ku meso andi,
4 kadi webalombola bupeta bwa bulopwe bwandi bwa ntumbo ne bukata ne buya bwa dyangi bwa bukatampe bwa ntumbo yandi mu mafuku mangi, mafuku 180.
5 Ano mafuku pa kubwana, mulopwe wasobela bantu bonso badi mu Shushane* kibundi kya nsakwa* masobo a mafuku asamba-abidi, tamba ku mukatampe bininge kutūla ne ku mutyetye bininge, mu kipango kya budimi bwa maluba bwa njibo mikatakata ya mulopwe.
6 Kwadi bukonge, ne butonge bulumbuluke, ne bintu bifītuluka bikutwe na myonji ya mbwija milumbuluke, ne myoya ityilakana ku nzenze ya ndalama, bikomo bya mimfinye,* ne bitalu bya olo* ne ndalama byadi panshi pāle mabwe a polefidi, ne mimfinye, ne malungo, ne mimfinye ifīta.
7 Vinyu yadi ipānwa mu bitomeno* bya olo; kitomeno ne kitomeno kyadi kishile na kikwabo, kadi vinyu ya mulopwe yadi mingi, mungya kamweno ka mulopwe.
8 Bitomibwa byadi bitomwa mungya kijila kya amba i kutupu kuningilwa,* mwanda mulopwe weivwanikile na bengidi ba bulēme ba mu njibo yandi mikatakata amba muntu ne muntu ukalonga mwasakila.
9 Vashiti+ Mukaja Mulopwe nandi wasobela bana-bakaji masobo mu njibo ya bulopwe* ya Mulopwe Ahaswelusa.
10 Mu difuku dya busamba-bubidi, mulopwe pa kusangala bininge mwanda wa vinyu, wasapwila Mehumane, ne Bizita, ne Halabona,+ ne Bikita, ne Abakata, ne Zetale, ne Kalakase, bengidi ba bulēme ba mu kipango basamba-babidi badi bakwasha Mulopwe Ahaswelusa,
11 amba balete Vashiti Mukaja Mulopwe ku meso a mulopwe, uvwele kilongo* kya bulopwe, mwanda wa alombole bantu ne bamfumu buya bwandi, ke-pantu wadi muyampe mpala bininge.
12 Ino Vashiti Mukaja Mulopwe wapela’nka kupela kwiya na kishima kya mulopwe kyaletelwe kupityila kudi bengidi ba bulēme ba mu kipango. Penepo mulopwe waloba bininge, bukalabale bwandi bwaaka munda mwandi.
13 Penepo mulopwe wesamba na bana-balume ba tunangu badi bajingulwile myanda ya kala* (mwanda i uno muswelo wadi ufika myanda ya mulopwe ku meso a boba bonso badi bajingulwile bijila ne bisambo,
14 ne boba badi nandi kubwipi bininge i ba Kaleshena, ne Shetale, ne Ademata, ne Talashishi, ne Melese, ne Malesena, ne Memukane, bamfumu basamba-babidi+ ba Peleshia ne Media, badi batwelanga kwa mulopwe kadi badi na bitenta bikatampe bininge mu bulopwe).
15 Ebiya mulopwe waipangula’mba: “Mungya bijila, i bika le bifwaninwe kulongwa Vashiti Mukaja Mulopwe mwanda wa kupela kwaapela kukōkela kishima kya Mulopwe Ahaswelusa kyaletelwe kupityila kudi bengidi ba bulēme ba mu kipango?”
16 Penepo Memukane walondolola ku meso a mulopwe ne a bamfumu amba: “Vashiti Mukaja Mulopwe kalongelepo kibi enka kudi mulopwe kete,+ ino i ne kudi bamfumu bonso ne kudi bantu bonso ba matanda onso a bubikavu* a Mulopwe Ahaswelusa.
17 Mwanda bino byalonga mukaja mulopwe bisa kuyukana ku bakaji bonso, kadi bakafutulula balume babo kebanena’mba, ‘Mulopwe Ahaswelusa wanenene bamuletele Vashiti Mukaja Mulopwe ku meso andi, ino aye wapela kwiya.’
18 Dyalelo dino’di bakaji ba bamfumu ba Peleshia ne Media basa kuyuka byalongele mukaja mulopwe bakasapwila’byo bamfumu bonso ba mulopwe, kino kikaleta kafutululo kakatampe ne kufītwa mutyima.
19 Shi i biyampe kudi mulopwe, nankyo mulopwe alete lubila, kadi lulembwe mu bijila bya Peleshia ne Media, bine kebibwanyapo kushintwa,+ amba Vashiti kakitwela monka nansha dimo ku meso a Mulopwe Ahaswelusa; kadi mulopwe apāne kifuko kyandi kya bu mukaja mulopwe kudi mwana-mukaji mulumbuluke kumupita.
20 Kadi shi lubila lwa mulopwe lubaivwanwa mu ntanda yandi yonso mikatampe, nabya bakaji bonso bakalēmeka balume babo, tamba ku mukatampe kutūla ne ku mutyetye.”
21 Uno mulangwe wasangaja mulopwe ne bamfumu, ebiya mulopwe walonga byanenene Memukane.
22 Penepo watuma mikanda ku matanda onso a bubikavu a bulopwe,*+ ntanda ne ntanda ya bubikavu* mu mulembelo wayo kadi bantu ne bantu mu ludimi lwabo, mwanda wa mulume ense ekale mfumwandya* njibo yandi ne kwisamba ludimi lwa bantu bandi.
Kunshi kwa Dyani
^ Ulangilwanga bu Zelekishishi I, mwanā Dadiusa Mukatampe (Dadiusa Hishitashipishi).
^ Nansha’mba “buludiki bwa bipindi bya ntanda.”
^ Nansha’mba “Kusha.”
^ Nansha’mba “Susa.”
^ Nansha’mba “njibo mikatakata; nsakwa.”
^ Nansha’mba “buludiki bwa bipindi bya ntanda.”
^ Nansha’mba “Susa.”
^ Nansha’mba “njibo mikatakata; nsakwa.”
^ Nansha’mba “bikundulu; bikundudyu.”
^ Nansha’mba “nsahabu.”
^ Nansha’mba “bipungwa; makopo.”
^ Nansha’mba “kukankajibwa.”
^ Nansha’mba “njibo mikatakata.”
^ Nansha’mba “kivwalwa kya ku mutwe.”
^ Nansha’mba “mulongelwanga.” Kishima pa kishima i, “bitatyi.”
^ Nansha’mba “buludiki bwa bipindi bya ntanda.”
^ Nansha’mba “buludiki bwa kipindi kya ntanda ya mulopwe.”
^ Nansha’mba “buludiki bwa kipindi kya ntanda.”
^ Nansha’mba “mfumu mu.”
