Isaya 65:1-25
65 “Nalekele bankimbe kudi boba kebanombelepo;Nalekele bansokole kudi boba kebankimbilepo.+
Nanenene amba: ‘Ami uno, ami uno!’ ku muzo kewadipo wita dyami dijina.+
2 Nabāla maboko ami difuku dyonso dituntulu ku bantu ba mitwe myūmu,+Ku boba banangila mu dishinda dibi,+Balonda milangwe ya abo bene;+
3 Bantu bansanshija kyaba kyonso ku mpala yami,+Batapa bitapwa mu madimi+ ne kufitula mwishi wa bitapwa pa bidiki.
4 Bashikete mu bukata mwa bibundu,+Kadi balāla bufuku mu bifuko bifyame,*Badya mwita wa bangulube,+Kadi busuku bwa bintu bya disubi budi mu bipungwa byabo.+
5 Banenanga’mba, ‘Ikala’nka kodi’ko; kokamfwena,Mwanda ami ne ujila kukupita.’*
Bano’ba i mwishi mu myulu yami, mudilo utēma difuku dyonso dituntulu.
6 Tala! I kilembwe ku meso ami;Nkikemanapo talala,Ino nkebalubwila,+Nkebalubwila ne pa mfulo*
7 Pa mwanda wa bilubo byabo ne pa mwanda wa bilubo bya bakulutuba babo,”+ i Yehova unena.
“Byobafitwile mwishi wa bitapwa pa nguluNe kuntuka pa mikuna,+Nkebapimina bidi mfutwa yabo yonso.”*
8 Yehova wanena namino amba:
“Monka mutaninwanga vinyu mipya mu kisansa kya mañanzaIno muntu kanena’mba, ‘Kokonakanya’kyo, mwanda kidi na bintu biyampe* munda,’Nami ye monkalongela pa mwanda wa bengidi bami;Nkikebonakanyapo bonso.+
9 Nkatambija lutundu* kudi Yakoba,Kudi Yuda nako muntu wa kupyana ngulu yami;+Batongwe bami bakeiyata ke yabo,Kadi bengidi bami bakashikata’mo.+
10 Shalone+ ukekala ke madyo a mikōkoKadi Musanza* wa Akola+ nao ke kifuko mwa kulāla bañombe,Kya bantu bami bankimba.
11 Ino banwe mudi mu bukata mwa boba baleka Yehova,+Boba belwa lūlu lwami lujila,+Boba bāla meza a leza wa Dyese,Ne boba bayujija leza wa Kitungo bitomeno bya vinyu mityange.
12 Penepo nami nkemutungila kipete,+Kadi banwe bonso mukafukata mwanda wa kutapibwa,+Mwanda naityile, ino kemwaitabilepo,Nesambile, ino kemwatejejepo;+Mwadi mulonga nyeke bibi ku meso ami,Kadi mwatongele byobya kebinsangajapo.”+
13 O mwanda Mfumu Mwinē Lupusa Lonso Yehova wanena namino amba:
“Talai! Bengidi bami bakadya, ino banwe mukekala na nzala.+
Talai! Bengidi bami bakatoma,+ ino banwe mukekala na kyumwa.
Talai! Bengidi bami bakasangala,+ ino banwe mukafwa bumvu.+
14 Talai! Bengidi bami bakela nsadi ya tusepo pa mwanda wa mutyima udi biyampe,Ino banwe mukadila mwanda wa mutyima usansaKadi mukayoyokota miyoa mwanda wa mushipiditu mutyumuke.
15 Mukashiya dijina dikengidija batongwe bami bu mafingo,Kadi Mfumu Mwinē Lupusa Lonso Yehova ukemwipaya banwe bonso,Ino uketa bengidi bandi dijina dikwabo;+
16 Amba muntu ense wikimbila dyese pano pa ntandaUkeselwa na Leza wa bubine,*Kadi ense utyipa mutyipo pano pa ntandaUkatyipila padi Leza wa bubine.*+
Mwanda tusua* twa kala baketwilwa;Tukafibwa ku meso ami.+
17 Mwanda talai! Napange madiulu mapya ne ntanda mipya;+Kadi bintu bya kala kebikavulukwapo,Nansha kwiya’byo ku mutyima kwine mpika.+
18 Nanshi sepelelai ne kusangela nyeke bintu byonapanga.
Mwanda talai! Napange Yelusalema ke kintu kya kusangelaBantu bandi nabo ke kintu kya kusepelela.+
19 Kadi nkasangela Yelusalema ne kusepelela pa mwanda wa bantu bami;+Munda mwandi kemukevwanwapo monka lunwa lwa madilo nansha kudila tusua.”+
20 “Mu kyokya kifuko kemukekalapo monka mwana wa lukeke ulāla mafuku matyetye,Nansha mununu ukomenwa kufikila pa mafuku andi.
Mwanda muntu ense ufwa na myaka katwa ukamonwa bu mwanuke’tu,Kadi kipya-mambo ukafingwa, nansha shi udi na myaka katwa.*
21 Bakobakanga mobo ne kwikala’mo,+Kadi bakadimanga madimi a mañanza ne kudya bipa byao.+
22 Kebakobakapo amba muntu ungi ekale’mo,Nansha kudima’mba bantu bakwabo badye.
Mwanda mafuku a bantu bami akekalanga pamo bwa mafuku a mutyi,+Kadi batongwe bami bakasangela bya binebine mingilo ya makasa abo.
23 Kebakaputumapo na mingilo* bya bitupu,+Nansha kubutula bana ba kumona malwa,Mwanda i lutundu* lwa boba beselwe na Yehova,+Ne babo bana pamo nabo.+
24 Nansha abo kebaityile, ami nketaba;Abo papo bakīsamba, ami nkevwana.
25 Mpumpi ne kana ka mukōko bakadya pamo,Ntambo ukadya biyombo pamo bwa ñombe,+Kadi nyoka nandi ukadya luvumbi.
Kebakasanshijapo nansha konakanya mu lūlu lwami lonso+ lujila,” i Yehova unena.
Kunshi kwa Dyani
^ Bibwanika padi i, “mu tūbo twa balami.”
^ Bibwanika padi i, “Mwanda nkakusambwila buujila bwami.”
^ Kishima pa kishima i, “mu kyadi kyabo.”
^ Kishima pa kishima i, “mu kyadi kyabo.”
^ Kishima pa kishima i, “dyese.”
^ Kishima pa kishima i, “lukunwa.”
^ Nansha’mba “Dilungu dya Musanza.”
^ Nansha’mba “bubinebine.” Kishima pa kishima i, “Amena.”
^ Nansha’mba “bubinebine.” Kishima pa kishima i, “Amena.”
^ Nansha’mba “makambakano.”
^ Bibwanika padi i, “Kadi muntu kakafikijapo myaka katwa ukamonwa bu mufingwe.”
^ Nansha’mba “Kebakengilapo bininge.”
^ Kishima pa kishima i, “lukunwa.”
