Mwendele Mako 14:1-72
-
Babitobo bakuta kitumba kya kwipaya Yesu (1, 2)
-
Abatūta Yesu māni a mananshi (3-9)
-
Yudasa waaba Yesu (10, 11)
-
Pashika ya mfulo (12-21)
-
Bidibwa bya Kyolwa bya Mfumwetu bibashilulwa (22-26)
-
Kutuna kwa Petelo kubalaibwa (27-31)
-
Milombelo ya Yesu mu Ngesemani (32-42)
-
Yesu wakwatwa (43-52)
-
Kusambijibwa ku meso a Sanedini (53-65)
-
Petelo watune Yesu (66-72)
14 Ebiya, kwadi kushele mafuku abidi+ penepo ke Pashika+ ne Masobo a Mikate Yampikwa Kiyujo.+ Babitobo bakulu ne basonekeji badi bakimba mwa kumukwatyila* na bunwa* bamwipaye;+
2 mwanda badi banena’mba: “Ketwakimukwata pa masobo; uyuka kwatamba lupotopoto mu bantu.”
3 Kadi paadi ku Betani udya* mu njibo ya Shimona wa makopo, mwana-mukaji umo waiya na mukomba wa dibwe dya alubatele udi’mo māni a mananshi, a nala ya binebine, a bei mikande. Walala mukomba wa alubatele’wa kamutūta’o ku mutwe.+
4 Penepo, bamo badi banena abo bene na bene koku bafītwe amba: “Mwanda waka ano māni a mananshi abaonwe uno muswelo?
5 Mwanda ano māni a mananshi adi a kupotejibwa ku ndenadi* 300 ne kupita ne lupeto’lwa lwaabilwa balanda!” Kadi bamulobela bininge.*
6 Ino Yesu wanena’mba: “Mulekei. I kika kyomumukambakenya? Wanongela kilongwa kilumbuluke.+
7 Mwanda balanda mudi nabo mafuku onso,+ kadi kyaba kyonso kyomusaka, mukokeja kwibalongela biyampe, ino ami kemukekalapo nami mafuku onso.+
8 Walonga kyaadi ukokeja kulonga; wabadikila kala kuntūta māni a mananshi pa umbidi wami mwa kujīkilwa.+
9 I bine nemulombola’mba, konso kusapulwa ino myanda miyampe mu ino ntanda yonso,+ kino kyalonga uno mwana-mukaji nakyo kikasekununwa bu pa kumuvulukila.”+
10 Ebiya Yudasa Isakadiota, umo wa mu Ba Dikumi ne Babidi, waenda kudi babitobo bakulu mwanda wa kumwaba kobadi.+
11 Abo pa kwivwana nabya, basangala, bamulaa kumupa lupeto lwa ndalama.+ Penepo waanza kukimba mukenga wa kumwaba.
12 Ebiya, mu difuku dibajinji dya Mikate Yampikwa Kiyujo,+ kitatyi kyobadi na kibidiji kya kutapa kitapwa kya Pashika,+ bandi bana ba bwanga bamunena’mba: “I kwepi kosaka twende tukakuteakenye kwa kudīla Pashika?”+
13 Penepo watuma bandi bana ba bwanga babidi kaebanena’mba: “Endai mu kibundi, kadi mwana-mulume umo uselele mulondo wa mema usa kwimutana. Mulondei,+
14 kadi monso mwasa kutwela, nenai mwinē njibo amba, ‘Mufundiji wanena’mba: “I kwepi le kudi kyumba kya beni monkokeja kudīla Pashika na bami bana ba bwanga?”’
15 Nandi ukemulombola kyumba kya peulu kikata, kidi’mo bintu kadi kilongololwe senene. Mwituteakenye’yo mwine’mwa.”
16 Penepa bana ba bwanga baenda, batwela mu kibundi batana enka mwaebanenene’mwa, balongolola Pashika.
17 Kyolwa pa kōloba, waiya na Ba Dikumi ne Babidi.+
18 Pobadi bashikete ku meza badya, Yesu wanena’mba: “I bine nemulombola’mba, umo pomudi’po udya nami pamo usa kungaba.”+
19 Bashilula kufītwa mutyima kebamunena umo umo amba: “Le i ami?”
20 Nandi webanena’mba: “I umo wa mu Ba Dikumi ne Babidi ubelela nami pamo mu luvu.+
21 Mwanda Mwanā muntu yeu wenda, enka mokilembelwe pa mwanda wandi, ino yō malwa andi yewa obabidila’ko Mwanā muntu!+ I kipite buya kudi yao muntu shi kabutwilwepo nansha kubutulwa kwine.”+
22 Ebiya pobadi bakidya, watekuna mukate, waesela dyese, weutyumuna, webapa’o, kanena’mba: “Atai’o; uno welekeja umbidi wami.”+
23 Kadi watekuna kitomeno nakyo, wafwija’ko, webapa’kyo, penepo abo bonso batoma’mo.+
24 Webanena’mba: “Kino kyelekeja ami ‘mashi+ a kipwano,’+ asa kumwangwa pa mwanda wa bavule.+
25 I bine nemulombola’mba, nkikatomepo nenu dikwabo bitomibwa bya mañanza kufika ne mu dyodya difuku dyonkatoma’byo bipya mu Bulopwe bwa Leza.”
26 Ku mfulo, pa kupwa kwimba mitendelo,* batamba kebenda ku Lūlu lwa Impafu.+
27 Penepo Yesu webanena’mba: “Banwe bonso musa kukukala, mwanda kilembelwe amba: ‘Nkakupila mukumbi,+ ne mikōko nayo ikapalakana.’+
28 Ino shi nasanguka, nkemubadikilanga mu Ngadilea.”+
29 Ino Petelo wamunena’mba: “Nansha shi bakwabo bonso abakukala, ami’ko mhm.”+
30 Ponkapo, Yesu wamunena’mba: “I bine nakulombola’mba dyalelo dino’di, bine’nka buno bufuku’bu, nzolo pakadidile misunsa ibidi, abe usa kuntuna misunsa isatu.”+
31 Ino aye waningisha’mba: “Shi binomba kufwa nobe, nkikakutunepo nansha dimo.” Kadi, bakwabo bonso nabo banena’nka nabya.+
32 Ebiya baiya ku kifuko kitelwa bu Ngesemani, nandi wanena bandi bana ba bwanga’mba: “Shikatai pano ami nkalombele bidi.”+
33 Penepa wasela Petelo, Yakoba, ne Yoano,+ washilula kujingwa mutyima* bininge ne kuvutakanibwa ñeni bikatampe.
34 Webanena’mba: “Nafītwa* nakampata+ bya lufu. Shalai pano kadi keshai’nka kukesha.”+
35 Aye pa kwenda’mo kinselensele, wapona pa nshi kalombela’mba shi bibwanika kitatyi’kya kimupityile kulampe.
36 Kanena’mba: “Abba,* Tata,+ bintu byonso bibwanikanga kodi; mfundule kino kitomeno. Inoko, ke kyonsakapo ami, aa, ino i kyosaka abe mwine.”+
37 Ebiya wajoka webatana balēle, penepo kanena Petelo amba: “A Shimona, ubalāla? Le kudipo na bukomo bwa kukesha nsá imo?+
38 Keshai’nka kukesha ne kulombela kitatyi kyonso, kutyina’mba mwakatwela mu kutompibwa.+ Mushipiditu shao usakanga,* ino ngitu i mikōkekōke.”+
39 Kadi waenda dikwabo kalombela, unena kintu kimo kyonka.+
40 Ebiya waiya monka webatana balēle, mwanda meso abo adi malēmenenwe, penepo kebayukilepo kya kumulondolola.
41 Waiya musunsa wa busatu kaebanena’mba: “Mu kitatyi kya uno muswelo, banwe mulēle mōlolokwa! Kubapu! Nsá ibabwana!+ Talai! Mwanā muntu waabwa mu makasa a babipya-mambo.
42 Imanai, twendei. Talai! Yewa wa kungaba wafwena pabwipi.”+
43 Ponka na ponka, aye ukīsamba, Yudasa, umo wa mu Ba Dikumi ne Babidi, wafika pamo na kibumbo kya bantu baselele bipete ne mipebwe* batumwe na babitobo bakulu, basonekeji, ne bakulumpe.+
44 Papo, yewa wa kumwaba wadi mwibape kala kiyukeno kyobeivwanikile, amba: “Yewa’tu onakafifya, ye aye; mukutei, mwende nandi mumulamine.”
45 Waiya pityipityi wamufwena, kanena’mba, “A Labi!” penepo wamufifya senene.
46 Penepo bamukwata bamukuta.
47 Inoko, umo wa mu boba badi bemene’po wasomona kipete kyandi, wakesa’kyo umpika wa kitobo mukatampe, wamuketa kutwi.+
48 Ino kwivwana kwadi Yesu kaebanena’mba: “Le mubaiya na bipete ne mipebwe kunkwata pamo bwa kabwalāla?+
49 Difuku ne difuku, nadi nshikatanga mu tempelo mfundija,+ ino kemwankutyilepo. Inoko, i pa mwanda wa kufikidija Bisonekwa.”+
50 Penepo bonso bamushiya banyema lubilo.+
51 Ino nsongwalume umo wadi uvwele’nka kivwalwa kya bukonge bulumbuluke pa ngitu, waanza kumulonda mu nyuma, penepo basaka kumukwata,
52 ino washiya kivwalwa kyandi kya bukonge’kya, wanyema mutaka.*
53 Penepo bakatūla Yesu kwa kitobo mukatampe,+ ebiya babitobo bakulu bonso ne bakulumpe ne basonekeji bebunga.+
54 Ino Petelo wadi umulonda kato-nyuma, kufika ne ku kipango kya kitobo mukatampe; kadi wadi kashikete pamo na bengidi ba mu njibo, ōta mudilo utēma.+
55 Papo, babitobo bakulu ne Sanedini yonso badi bakimba bukamoni bwa kuponeja nabo Yesu mwa kumwipaila, ino kebasokwelepo nansha bumo.+
56 Shako, bavule badi bamuletela bukamoni bwa bubela,+ ino bukamoni bwabo kebwadipo bukwatañane.
57 Kadi bantu bamo badi bemana ne kumuletela bukamoni bwa bubela, amba:
58 “Twamwivwene unena’mba, ‘Nsa kubundula ino tempelo ilongelwe na makasa’i, kadi mu mafuku asatu nsa kūbaka mikwabo yampikwa kulongwa na makasa.’”+
59 Inoko ne pa ino myanda mine, bukamoni bwabo kebwadipo bukwatañane.
60 Penepo, kitobo mukatampe waimana umbukata mwabo kaipangula Yesu amba: “Le abe kutentululangapo? Le umwene namani bikulambika bano bantu?”+
61 Ino aye wauba’tu nyā ne kutentulula mpika.+ Kadi kitobo mukatampe washilula dikwabo kumwipangula, kamunena’mba: “Le abe ye Kidishitu Mwanā Yewa Mweselwe?”
62 Ebiya Yesu walondolola’mba: “En-en i ami; kadi banwe mukamona Mwanā muntu+ ushikete ku kuboko kwa lundyo+ kwa bukomo kadi wiya na makumbi a mūlu.”+
63 Penepo kitobo mukatampe wasana bivwalwa byandi kanena’mba: “Le kudi kadi kyotusakila batumoni bakwabo?+
64 Mubaivwana mutonko watuka Leza. Mubatyibe’o namani?”* Bonso bamuponeja’mba ufwaninwe kufwa.+
65 Bamo baanza kumupēlela mata,+ kumupūta mu mpala, kumukupila bikoni kebamunena’mba: “Polofeta!” Kupwa bamukupila mapi mu mpala, ebiya bengidi ba mu kipango bamusela.+
66 Ino, Petelo byaadi munshi mu kipango, mwana-mukaji umo mwingidi wa kitobo mukatampe waiya.+
67 Aye pa kumona Petelo ōta mudilo, wamutala sō kanena’mba: “Abe nobe wadi na uno Yesu, mwine Nazala.”
68 Ino aye watuna, amba: “Nkimuyukilepo kadi ne byonena’byo bine nkibivwenepo,” penepo watambila panja ku kitwelelo.*
69 Kwine’kwa mwingidi mwana-mukaji wamumona, penepa kanena monka boba badi bemene’po amba: “Uno’u wadi nabo.”
70 Nandi watuna monka. Kadi papita kitatyi kityetye, boba badi bemene dya kubwipi baanza kunena Petelo amba: “Bine nobe wadi nabo, mwanda na bubine, wi mwine Ngadilea.”
71 Ino washilula kufinga koku utyipa ukolokota’mba: “Nkiyukilepo yao muntu omunena’ye!”
72 Ponka na ponka nzolo wadila dya bubidi,+ ebiya Petelo wavuluka byamunenene Yesu amba: “Nzolo pakadidile misunsa ibidi, usa kuntuna misunsa isatu.”+ Ebiya kinku kyamukwata kadila.
Kunshi kwa Dyani
^ Nansha’mba “bukosoke.”
^ Nansha’mba “mwa kumukutyila.”
^ Nansha’mba “ushikete ku meza.”
^ Tala Mbwejo B14.
^ Nansha’mba “bamunena bya bulobo; bamufunina.”
^ Nansha’mba “ñimbo ya butōtyi; ñimbo ya mitōto.”
^ Nansha’mba “kupandikila.”
^ Nansha’mba “Muya wami ubafītwa.”
^ Kishima kya Kihebelu nansha kya Kialamia kishintulula’mba “A Tata!”
^ Nansha’mba “uswile.”
^ Nansha’mba “tupini.”
^ Nansha’mba “muvwale bityetye; uvwele’nka kivwalwa kya munshi kete.”
^ Nansha’mba “Mulanga’po namani?”
^ Nansha’mba “bukōnde bwa ku kibelo.”
