Nehemia 9:1-38
9 Mu difuku dya 24 dya kweji’wa bene Isalela bebunga; bashikilwa na nzala bavwele masāka ne kwitūta luvumbi.+
2 Penepo boba ba ku lutundu lwa bene Isalela, basonsoloka beni bonso,+ baimana, besapula bubi bwabo ne bilubo bya bashabo.+
3 Ebiya baimana pa kifuko kyabo kebatange mukanda wa Bijila+ wa Yehova Leza wabo na diwi ditunduke mu mansá asatu,* kadi mu mansá asatu makwabo besapula bubi ne kwivukwila kudi Yehova Leza wabo.
4 Yeshua, Bani, Kademiele, Shebania, Buni, Shelebia,+ Bani, ne Kenane, baimana pa lukala+ lwa bene Levi, baabija Yehova Leza wabo na diwi ditunduke.
5 Kadi bene Levi, ba Yeshua, Kademiele, Bani, Hashabeneya, Shelebia, Hodia, Shebania, ne Petahia, banena’mba: “Imanai mutendele Yehova Leza wenu nyeke ne nyekeke.*+ Batendele dijina dyobe dya ntumbo, dine dizunzwilwe peulu pa dyese dyonso ne mitendelo.
6 “Abe wi Yehova bunka bobe;+ wi mulonge madiulu, bine, diulu dya madiulu ne bibumbo byao byonso, ntanda ne byonso bidi’mo, majiba ne byonso bidi’mo. Kadi wibilamanga abyo byonso byūmi, kadi kibumbo kya mūlu kivukwilanga kodi.
7 Abe wi Yehova Leza wa bine, watongele Abalama,+ wamutambija mu Ulu+ wa bene Kaladea, wamwinika ne dijina dya bu Abalahama.+
8 Wamwene’mba mutyima wandi i mukōkele ku meso obe,+ penepo wasamba nandi kipwano kya kumupa ntanda ya bene Kenani, bene Hiti, bene Amole, bene Pedizi, bene Yebushi, ne bene Ngilangashi, mwanda wa kupa’yo lutundu*+ lwandi; kadi wafikidije milao yobe, mwanda wi moloke.
9 “Mwanda wamwene malwa a bakulutuba betu mu Edipito,+ kadi waivwene kudila kwabo pa Dijiba Dityila.
10 Penepo walonga biyukeno ne bingelengele padi Felo ne pa bengidi bandi bonso ne pa bantu bonso ba ntanda yandi,+ mwanda abe wayukile amba bebalongēle bintu na ditatu.*+ Welongela dijina dikidi’ko kufika ne dyalelo.+
11 Kadi wakalañenye dijiba ku meso abo, amba babuke dijiba pa nshi myūmu,+ kupwa waela boba badi bebalonda mu mushike pamo bwa dibwe dyaelwa mu mema matomboke.+
12 Webendeje dyuba na dilenga dya dikumbi, bufuku nabo na dilenga dya mudilo, mwanda wa kwibamunikila mu dishinda dyobafwaninwe kwenda.+
13 Kadi watūkīle pa Lūlu lwa Shinai,+ wesamba nabo abe mūlu,+ webapa ne butyibi boloke, bijila bya bubine,* misoñanya miyampe ne mbila.+
14 Webayukije Sabato yobe ijila,+ webapa mbila, misoñanya ne bijila kupityila kudi mwingidi obe Mosesa.
15 Webapele mikate ya mūlu pobadi na nzala,+ webatambijija ne mema mu kidibwe pobadi na kyumwa,+ kadi webalombwele batwele bayate ntanda yowatyipile* kwibapa.
16 “Ino abo, bakulutuba betu, balongele bintu na ditatu,*+ baumija mitwe,*+ kadi kebatejejepo mbila yobe.
17 Bapelele kwivwana,+ kadi kebavulukilepo bilongwa byobe bitulumukwa byowalongele mu bukata mwabo, ino baumija mitwe* ne kutonga mutwe mwanda wa kujokela mu bupika bwabo mu Edipito.+ Ino abe wi Leza kejepo kulekela,* wa kanye*+ ne lusa, wija pa kukwatwa bulobo kadi muyule buswe bwa ndamatyidile,* kadi kwebalekelepo.+
18 Nansha pobelongēle nkishi wa kyuma* wa kyana kya ñombe kebanena’mba, ‘Uno’u ye Leza obe mwine wakulupwile mu Edipito,’+ kadi balonga bilongwa bikatampe bya kipuni,
19 ino nansha nankyo, na lusa lobe lukatampe, kwebalekelepo mu ntanda mutuputupu.+ Dilenga dya dikumbi kedyatalukilepo peulu pabo dyuba mwanda wa kwibendeja mu dishinda, nansha dilenga dya mudilo bufuku mwanda wa kwibamunikila mu dishinda dyobafwaninwe kwenda.+
20 Kadi waletele mushipiditu obe muyampe mwanda wa kwibapa bujinguludi,+ kwasuminwepo kyakanwa kyabo māna,+ kadi webapele mema pobadi na kyumwa.+
21 Webapele byakudya mu ntanda mutuputupu myaka 40.+ Kebabudilwepo kintu nansha kimo. Bivwalwa byabo kebyaonekelepo,+ kadi maulu abo keayudilepo.
22 “Abe webapele malopwe ne bantu, weabanya bipindibipindi,+ amba bayate ntanda ya Shihone+ ke yabo, ko kunena’mba, ntanda ya mulopwe wa Heshebone,+ ne ntanda ya Oka+ mulopwe wa Bashane.
23 Kadi wavudije babo bana pamo bwa ñenyenye ya mūlu.+ Kupwa webatweja mu ntanda yowalaile bakulutuba babo amba bakatwela’mo beiyate.+
24 Ebiya babo bana batwela, bayata ntanda,+ nobe webanekeninye bene Kenani,+ bekadi ba mu ntanda’ya, webapāna mu kuboko kwabo, ne balopwe babo ne bantu ba ntanda’ya, amba bebalonge mobasakila.
25 Bakwata bibundi bikomejibwe+ ne ntanda ya bumeni,*+ kadi bayata ne mobo mayule bintu biyampe bya miswelo yonso ke abo, byumbu bikole kala, madimi a mañanza, bitongo bya impafu,+ ne mityi mingi ipa bipa. Ebiya badya, baikuta ne kununa, kadi basangela bininge buyampe bobe bukatampe.
26 “Kebakukōkelepo, ino bakutombokēle,+ bavundamina Bijila byobe.* Baipaile bapolofeto badi bebadyumuna mwanda wa kwibajokeja kodi, balonga bilongwa bya kipuni kikatampe.+
27 Pa kino, webapēne mu kuboko kwa balwana nabo,+ badi bebasusula’nka kwibasusula.+ Ino abo badi bakwabija mu kitatyi kya tusua twabo, nobe wadi wivwana abe mūlu; kadi pa mwanda wa lusa lobe lukatampe, webapele bapandiji ba kwibakūla ku kuboko kwa balwana nabo.+
28 “Ino pobadi’tu bakūlwa, badi balonga monka bibi ku meso obe,+ kadi abe nobe wadi wibaleka mu kuboko kwa balwana nabo badi bebatādila.*+ Penepo badi bajoka kebakwabija,+ nobe wadi wivwana abe mūlu ne kwibakūla misunsa ne misunsa mwanda wa lusa lobe lukatampe.+
29 Nansha byowadi wibadyumuna mwanda wa kwibajokejeja ku Bijila byobe, badi beendeja bya ditatu* ne kupela kwivwana mbila yobe,+ kadi badi bajilula misoñanya yobe, mine ikekadija muntu mūmi shi walama’yo.+ Ino bavundamine na kibengo ne kūmija nshingo yabo, bapela kwivwana.
30 Abe webatūkijije mutyima+ myaka mingi, kadi wadi wibadyumuna’nka kwibadyumuna na mushipiditu obe kupityila ku bapolofeto bobe, ino abo bapela kwivwana. Ku mfulo nobe webapāna mu kuboko kwa bantu ba matanda’a.+
31 Kadi na lusa lobe lukatampe, kwebatukijepo+ nansha kwibaleka, mwanda wi Leza wa kanye* ne lusa.+
32 “Shi ke pano, a Leza wetu, Leza mukatampe, mukomokomo, kadi ulenga nzuba, ulamine kipwano kyandi ne kulombola buswe bwa ndamatyidile,+ kokisūla masusu etutana batwe, ne balopwe betu, ne bamfumu,+ ne babitobo,+ ne bapolofeto,+ ne bakulutuba betu, ne bantu bobe bonso tamba mafuku a balopwe ba Ashidia+ kufika ne dyalelo.
33 Abe wi moloke mu byonso bitufikila, mwanda ubalonga bintu na bubinebine; ino batwe bo balonga bibi.+
34 Balopwe betu, ne bamfumu, ne babitobo, ne bakulutuba betu, kebalaminepo Bijila byobe nansha kuta mutyima ku mbila yobe nansha ku bivulujo* byobe byowebadyumwine nabyo.
35 Nansha pobadi mu bulopwe bwabo, basangela buyampe bungibungi bowebapele kadi bekele mu ntanda mikatampe ya bumeni* yowebapele, kebakwingidilepo+ nansha kuleka bilongwa byabo bibi.
36 Ino pano dyalelo, twi bapika+—bine, bapika mu ntanda yowapele bakulutuba betu badye bipa byayo ne bintu biyampe byayo.
37 Byangulwa byayo bingibingi i bya balopwe bowitutūdile mwanda wa bubi bwetu.+ Babikele pa imbidi yetu ne pa bimunanwa byetu monso mobasakila, kadi netu tudi mu tusua tukatampe.
38 “Pa mwanda wa bino byonso, tubalembe kumvwañana kusumininwe+ kotweivwana, kadi bamfumu betu ne bene Levi, ne babitobo betu, abaitabija na kukoma’po kashé.”+
Kunshi kwa Dyani
^ Kishima pa kishima i, “kipindi kimo kya pa bipindi biná bya difuku.”
^ Nansha’mba “tamba nyeke kutūla ku nyeke.”
^ Kishima pa kishima i, “lukunwa.”
^ Nansha’mba “na kibutakwe.”
^ Nansha’mba “bijila bikulupilwa.”
^ Kishima pa kishima i, “yowatūlwidile kuboko.”
^ Nansha’mba “na kibutakwe.”
^ Kishima pa kishima i, “baumija nshingo yabo.”
^ Nansha’mba “kanye ka buswe.”
^ Nansha’mba “ufwila lusa.”
^ Nansha’mba “Leza wa bilongwa bya lulekelo.”
^ Kishima pa kishima i, “baumija nshingo yabo.”
^ Nansha’mba “nkishi musungululwe.”
^ Nansha’mba “ya bupeta.”
^ Kishima pa kishima i, “baela Bijila byobe kunyuma kwabo.”
^ Nansha’mba “bebavingakanya.”
^ Nansha’mba “bya kibutakwe.”
^ Nansha’mba “ufwila lusa.”
^ Nansha’mba “bidyumu.”
^ Nansha’mba “ya bupeta.”
