Ntanda yonso bantu bekondanga na kyanga kikomo ne koneka kwa bitatyi. Ivwana binena ino lapolo ilonda’ko:

•   “Mu Kweji 6 ntanda yonso kwadi kyanga kikomo kekyaikeleko pano kepadi myaka 174 na pobashilwile kuleta malapolo atala kyanga.”—Agence américaine d’observation océanique et atmosphérique, États-Unis, département du Commerce, 13 Kweji 7, 2023.

•   “Mu Itali, Eshipanye, Franse, Alemanye ne mu Polonye pesabwa pano balanga’mba kyanga kidi’mo kisa kufika mu 48°C [118°F] enka na mokikadile pa kisanga kya Sicily ne kya Sardinia–bino bifuku byo bidi na kyanga bininge mu Bulaya.”—Agence spatiale européenne, 13 Kweji 7, 2023.

•   “Byenda bikabila’ko ino ntanda bininge, mobimwekela kusa kwikala mvula wa kyonakanya bininge kadi uleta ne dilobe dibi mpata.”—Stefan Uhlenbrook, directeur de l’hydrologie, de l’eau et de la cryosphère à l’Organisation météorologique mondiale, 17 Kweji 7, 2023.

 Mungya ino lapolo, le kuno koneka kwa bitatyi ikukulengeja usele mutyima kulu bininge? Tubandaulei binena Bible pa uno mwanda.

 I amo. Bino bitatyi bya kyanga kikomo ne miswelo mikwabo mivule ya koneka kwa bitatyi bifikila ntanda yonso bifikidijanga byālaile Bible bitala ano etu mafuku. Kimfwa, Yesu wālaile amba tukamona “binkumbulu bilenga moyo,” nansha “bya kulengeja moyo ne biyukeno bikatampe.” (Luke 21:11; Dibuku Dijila) Kukanda kwa kino kyanga ntanda yonso i kulengeje bantu bekale na moyo wa amba bintu bilonga bantu bibwanya konakanya ntanda tukomenwe kushikata’po.

 Aa! Leza wāpangile ntanda mwanda wa bantu bashikate’po lonso; kēipangilepo mwanda wa bantu be yonakanye. (Ñimbo ya Mitōto 115:16; Musapudi 1:4) Na bubine Leza i mulaye amba ‘ukonakanya boba bonakanya ntanda’—Kusokwelwa 11:18.

 Bible ulombola’mba Leza ubwanya kadi usakanga kukinga ntanda ku bintu bibi bibwanya kwiifikila.

•   “[Leza] utalajanga kimpumpu kya luvula; Mantanki a dijiba atalala nyā” (Ñimbo ya Mitōto 107:29) Leza udi na lupusa pa bintu bya kipangila. Udi na bukomo bwa kupwija makambakano onso ekonda na bantu mu badilwa ne koneka kwa bitatyi.

•   “Utalanga ntanda, wiilengeja ipe bipa bingi ne kwiipeteja bininge” (Ñimbo ya Mitōto 65:9) Leza, usakwesela ntanda ikale ke paladisa.

 Pa kuyukila’ko bivule bitala milao ya mu Bible ya kulumbulula ntanda, tala kishinte kinena’mba “Le I Ani Ukakūla Ntanda?”