KIFUNDWA 41
Le Bible Unena Bika pa Mwanda Utala Kusambakena Pamo?
Bantu bavule bevwananga bumvu kwisambila pa myanda ya kusambakena pamo. Inoko Bible paesambila pa kusambakena pamo, wisambanga pampikwa kafinda kadi na bulēme. Tumwenanga mu byobya binena Bible pa uno mwanda. Ne i kyendele’mo. Ne kadi bidi, Yehova ye Umpangi. Nanshi uyukile byobya byonso byotubwanya kumwena’mo. Witulombolanga byobya byotufwaninwe kulonga pa kumusangaja amba twikale na būmi bwa nyeke.
1. Lelo Yehova unena bika pa mwanda utala kusambakena pamo?
Kusambakena pamo i kyabuntu kitamba kudi Yehova. Usaka’nka ba mwana-mulume ne mwana-mukaji besongele basangele’kyo. Kino kyabuntu kikwashanga ba mulume ne mukaji bekale na bana kadi belombole bukena mobyendele ne mu muswelo usangaja. O mwanda Kinenwa kya Leza kinena’mba: “Sangala pamo na mukaji wa busongwalume bobe.” (Nkindi 5:18, 19) Yehova usaka bene Kidishitu besongele bekale belamate umo na mukwabo, mu uno muswelo, kebakalongapo makoji nansha dimo.—Tangai Bahebelu 13:4.
2. Lelo busekese i bika?
Bible witusapwila’mba: “Ba busekese . . . kebakapyanangapo Bulopwe bwa Leza.” (1 Bene Kodinda 6:9, 10) Balembi bālembele Bible mu Kingidiki bāingidije kishima por·neiʹa mwanda wa kwisambila pa busekese. Mu kino kishima mubadilwa, (1) kusambakena pamo a kwa bantu bampikwa kwisonga, (2) kusambakena pamo kwa bana-balume na bana-balume, ne (3) kusambakena pamo na banyema. Tubwanya kusangaja Yehova ne kumwena’mo batwe bene shi twikale “kwilama ku busekese.”—1 Bene Tesalonika 4:3.
LANGULUKA BININGE
Tala umone muswelo obwanya kwepuka busekese ne muswelo obwanya kwikala wampikwa disubi mu mwikadilo.
3. Nyema busekese
Muntu umo witwa bu Yosefa wālwile pa mwanda wa kushala utōka mu mwikadilo. Tangai Ngalwilo 39:1-12, ne kwisambila pa bino bipangujo:
-
Le i bika byātonwene Yosefa anyeme?—Tala vese 9.
-
Molangila, le Yosefa wākwete butyibi buyampe? Mwanda waka?
I muswelo’ka ubwanya bankasampe dyalelo kwiula Yosefa ne kunyema busekese? Talai VIDEO.
Yehova usaka batwe bonso tunyeme busekese. Tangai 1 Bene Kodinda 6:18, ne kwisambila pa bino bipangujo:
-
Le i ngikadilo’ka ibwanya kutwala muntu ku kulonga busekese?
-
I muswelo’ka obwanya kunyema busekese?
4. Ubwanya kukomena matompo
Le i bika bilengejanga muntu akomenwe kukomena ditompo dya kulonga busekese? Talai VIDEO, ne kwisambila pa kipangujo kilonda’kya.
-
Mu ino video, pamonanga uno tutu amba milangwe ne bilongwa byandi bibwanya kumutwala ku kulonga makoji, le waloñanga’po bika?
Enka ne bene Kidishitu ba kikōkeji balwanga kyaba kimokimo pa kulama milangwe yabo ikele itōka. I muswelo’ka obwanya kwepuka kwimika milangwe yobe pa myanda ya busekese? Tangai Bene Fidipai 4:8, ne kwisambila pa bino bipangujo:
-
Le i bintu bya muswelo’ka byotufwaninwe kulangulukila’po?
-
Lelo kutanga Bible ne kuvudilwa bya kulonga mu mwingilo wa Yehova bibwanya kwitukwasha namani tukomene matompo a kulonga bubi?
5. Tumwenanga mu misoñanya ya Yehova
Yehova uyukile kyokya kilumbuluke kotudi. Witusapwilanga muswelo wa kwikala batōka mu mwikadilo ne muswelo otubwanya kumwena’mo. Tangai Nkindi 7:7-27 nansha kutala VIDEO, kupwa kemwisambila pa bipangujo bilonda’bya.
-
Le uno nsongwalume wetūlanga namani mu dishinda dya kutompibwa?—Tala Nkindi 7:8, 9.
-
Mungya Nkindi 7:23, 26, busekese bubwanya kulupula bipa bibi. Ino shi twikale batōka mu mwikadilo, le i makambakano’ka otukepuka?
-
Le kwikala batōka mu mwikadilo kubwanya kwitukwasha namani tukekale na būmi bwa nyeke?
Bantu bamo balañanga’mba Leza udi na kaninga-mpo pa kupeleja mu Bible bulādi bwa bana-balume na bana-balume. Inoko Yehova aye usakanga batwe bonso tumone būmi bwa nyeke. Pa kwibumona, tufwaninwe kulonda misoñanya yandi mu būmi bwetu. Tangai 1 Bene Kodinda 6:9-11, ne kwisambila pa kino kipangujo:
-
Le mungya milangwe ya Leza, bilokoloko byampikwa kufwaninwa i’nka byobya bya bulādi bwa bana-balume na bana-balume kete?
Pa kusangaja Leza, batwe bonso tufwaninwe kushinta būmi. Le mudi kafwila-midimo? Tangai Ñimbo ya Mitōto 19:8, 11, ne kwisambila pa bino bipangujo:
-
Le ulanga misoñanya ya Yehova ya mu mwikadilo i myendele’mo? Mwanda waka ubanena nankyo?
Yehova ke mukwashe bavule balonde misoñanya yandi ya mu mwikadilo. Ubwanya kukukwasha nobe
BANTU BAMO BANENANGA’MBA: “Kepadipo mwanda ku muntu ense kulāla na wasaka, shi abo bene i besanswe.”
-
Le ubwanya kunena’po namani?
MU KĪPI
Kusambakena pamo i kyabuntu kipēne Yehova ku ba mulume ne mukaji besonge.
Pitulukai’mo
-
Lelo mu busekese mubadilwa bika ne bika?
-
Le i bika biketukwasha twepuke busekese?
-
I bika byotukamwena’mo shi tubalonda misoñanya ya Yehova ya mu mwikadilo?
KIMBA
Bandaula, umone mwanda waka Leza utalanga shi ba mulume ne mukaji i besonge nansha shi kebesongelepo.
“Le Bible Unena Bika pa Busongi bwa Ntēkele-Nkuvwike?” (Kishinte kya pa Entelenete)
Tala umone mwanda waka musoñanya wa mu Bible upeleja bulādi bwa bantu ba ngitu imo keukankamikangapo mushikwa.
“Lelo Kulāla kwa Bantu ba Ngitu Imo I Kubi?” (Kishinte kya pa Entelenete)
Wifunde umone motukingilwa na bijila bya Leza bīsambila pa kusambakena pamo.
“Le Bulādi bwa ku Kanwa Nabo I Busekese Bine?” (Kishinte kya pa Entelenete)
Tala myanda mimweke inena’mba “Badi Bandēmekele,” umone kine kyatonwene mwana-mulume wadi ulāla na bana-balume ashinte būmi bwandi mwa kusangeja Leza.
“Bible Ushintanga Būmi” (Kiteba kya Mulami, 1 Kweji 4, 2011)
a Mu bino bilongwa bipelejibwe, mubadilwa ne kilongwa kya kusambakena pamo, kutweja ngitu ya bumvu ku kanwa, kutweja ngitu ya bumvu ku mujondo, ne kufinyafinya mutaka wa mukwabo mwanda wa kwilangula bilokoloko.
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
