Nansha musakanga kwikala na nsangaji mu busongi ne mu kisaka, kukokeja kutamba bintu bimo bya kitulumukila bibwanya kwimuvutakenya nsangaji. (Musapudi 9:11) Leza uletanga bukwashi buyampe kotudi kitatyi kyotulwa na makambakano. Shi mwingidije misoñanya ya mu Bisonekwa ilonda’ko ino, abe ne kyenu kisaka mukanekenya, nansha ke mu bikambija bivule.

BINENA BIBLE: ‘Elai makambakano enu onso kwadi, mwanda aye wimutele mutyima.’ (1 Petelo 5:7) Vulukai nyeke amba Leza katopekwapo pa matompo enu. (Yakoba 1:13) Byomumufwena, ukemukwasha biyampe mpata. (Isaya 41:10) “Pungulwilai mityima yenu mu kifuko kyandi.” —Ñimbo 62:8.

Ne kadi shi mutanga ne kwifunda Bible difuku ne difuku mukasengibwa. Ku mfulo, mukemwena muswelo ‘wituseñanga Yehova mu byamalwa byetu byonso.’ (2 Kodinda 1:3, 4; Loma 15:4) Wimulaile kwimupa “ndoe ya Leza ya kutabuka ñeni yonso.”—Fidipai 4:6, 7, 13.

BYOMUKOKEJA KULONGA:

• Lombai kudi Yehova bukwashi bwa kutūkija mutyima ne kulanga byoloke

• Pitulukai mu mimweno yenu yonso, mutonge’po kitabukile buya kyomukokeja kufikila’po

BINENA BIBLE: “Mutyima wa wañeni umonanga kuyukidija; kadi kutwi kwa wañeni kukimba kuyukidija.” (Nkindi 18:15) Potolola myanda yonso. Sokola bisakibwa bya umo ne umo wa mu kyenu kisaka. Wisamba nabo. Wibevwana.—Nkindi 20:5.

Le shi muswe obe wafwa? Kokatyina kulupwila patōka kutapikwa mutyima kobe. Vuluka amba nansha ke ‘Yesu nandi wasūmije impolo.’ (Yoano 11:35; Musapudi 3:4) Kukōkolokwa biyampe ne kulāla tulo nako kukwashanga. (Musapudi 4:6) Kulonga namino kupēlejanga bintu mwa kupwijija bikoleja.

BYOMUKOKEJA KULONGA:

• Kepafikile makambakano, ikalai na kibidiji kya kwisamba na ba mu kyenu kisaka. Shi myanda ibatambe, bakapēlelwa kwisamba nobe

• Wisamba na boba ke batanwe na myanda ya uno muswelo

BINENA BIBLE: “Mulunda usanswanga mafuku onso nyeke. Mukimonya-malwa wilombola bu-mwanabo.” (Nkindi 17:17) Balunda nobe basakanga kukukwasha, inoko pamo bakomenwanga kuyuka kya kulonga. Kokeshisa kwibasapwila bine bikusakilwa. (Nkindi 12:25) Kadi, kimba bukwashi bwa ku mushipiditu ku boba bevwanija Bible. Buludiki bwa Bible bobasa kukupa busa kukukwasha.—Yakoba 5:14.

Usa kumona mukwashi ukusakilwa pokekala kyaba ne kyaba pamo na bantu badi binebine na lwitabijo mudi Leza kadi bakulupile mu milao yandi. Kadi usa kusengibwa pa mutyima posa kukwasha bakwabo basakilwa kukankamikwa. Wibasapwile lukulupilo lobe mudi Yehova ne mu milao yandi. Pyasakena mu kukwasha bantu bakwabo basakilwa bukwashi, kadi kokasonsoloka boba bakuswele kadi bakukwatakanyanga.—Nkindi 18:1; 1 Kodinda 15:58.

BYOMUKOKEJA KULONGA:

• Wisamba na mulunda wa pa mutyima kadi umuleka ukukwasha

• Umusapwila pampikwa kufya bisakibwa byobe