Leza usakanga bantu basangele būmi pano pa ntanda. Wāpangile ntanda ne byonso bidi’po mwanda wa kuswa kwaswele bantu. Panopano ponka usa kuletela bantu ba mu matanda onso būmi bulumbuluke. Ukanyongololanga bantu ku bintu bilengeja masusu.​—Tanga Yelemia 29:11.

I kutupu umbikalo ubwenye kupwa ñuma, misongo, ne lufu. Ino kudi myanda miyampe. Panopano Leza usa kupingakanya malopwe onso a bantu na umbikalo wandi. Babikalwa bandi bakekala na ndoe kadi bakomo ku ngitu.​—Tanga Isaya 25:8; 33:24; Danyele 2:44.

Masusu akapwa’nka pakatalula Leza babi pano pa ntanda. (Zefenia 2:3) Le ukebatalula kitatyi’ka? Kinenwa kya Leza kyālaile kala ino myanda ikambakanya muzo wa muntu. Myanda ilongeka dyalelo ilombola’mba kitatyi kya Leza kupwa masusu kibafwena.​—Tanga 2 Temote 3:1-5.

Tufwaninwe kwifunda myanda itala padi Leza mu Kinenwa kyandi, Bible. Bible udi pamo bwa mukanda witutumīne mbutwile wa buswe. Witulombola mwa kwikadila na būmi bwa nsangaji dyalelo ne mwa kukamwena būmi bwa nyeke mu mafuku a kumeso. Shako bamo kebakasangalapo kukumona bakukwasha wivwanije Bible. Inoko būmi bwa kumeso bulaile Leza i bulumbuluke mpata bokufwaninwepo kubulwa.​—Tanga Nkindi 29:25; Kusokwelwa 14:6, 7.