Bulopwe bwa Leza i umbikalo wa mūlu. Bukapingakena pa imbikalo yonso ne kulengeja kiswa-mutyima kya Leza kilongeke mūlu ne pano pa ntanda. Myanda ya Bulopwe bwa Leza i miyampe. Panopano ponka Bulopwe bwa Leza busa kuvuija kisakibwa kya muntu kya kukimba umbikalo muyampe. Busa kukutyila umbumo bantu bonso badi pano pa ntanda.​—Tanga Danyele 2:44; Mateo 6:9, 10; 24:14.

Bulopwe bonso bufwaninwe kwikala na mulopwe. Yehova i mutonge wandi Mwana, Yesu Kidishitu ekale Mulopwe wa Bulopwe bwandi.​—Tanga Kusokwelwa 11:15.

Tala video Le Bulopwe bwa Leza I Bika?

Mwanā Leza i Mulopwe mufwaninwe mwanda udi na kanye kadi ulamete ku byobya byoloke. (Mateo 11:28-30) Ne kadi, udi na bukomo bubwanya kukwasha bantu, mwanda ukaludika ntanda yonso aye’ko mūlu. Pa kupwa kusanguka wākandile mūlu kukashikata ku lundyo lwa Yehova kailaije. (Bahebelu 10:12, 13) Ku mfulo Leza wamupele lupusa lwa kushilula kuludika.​—Tanga Danyele 7:13, 14.

Bantu betwa bu “bajila” bakaludika na Yesu mūlu. (Danyele 7:27) “Bajila” babajinji kutongwa i batumibwa ba Yesu ba kikōkeji. Yehova ukitonga ne dyalelo bana-balume ne bana-bakaji ba kikōkeji bu bajila. Basangulwanga na umbidi wa ku mushipiditu pamo bwa Yesu.​—Tanga Yoano 14:1-3; 1 Kodinda 15:42-44.

 I bantu banga ba kwenda mūlu? Yesu wibatela bu “kaluombe katyetye.” (Luka 12:32) Kibalwa kyabo kine i bantu 144 000. Bakaludika ntanda pamo na Yesu.​—Tanga Kusokwelwa 14:1.

Bulopwe bwa Leza bwashilwile kuludika mu 1914. * Kilongwa kibajinji kyālongele Yesu bu Mulopwe i kya kwela Satana ne bandemona bandi pano pa ntanda. Satana wakalabele ne kushilula kuleta kavutakanya pano pa ntanda. (Kusokwelwa 12:7-10, 12) Tamba penepa, malwa a bantu i mavudile’ko. Mavita, nzala, bipupo bya misongo, ne bintenshi, byonso bino bibadilwa mu “kiyukeno” kilombola’mba panopano ponka Bulopwe busa kuludika ntanda yonso.​—Tanga Luka 21:7, 10, 11, 31.

Kupityila ku mwingilo wa busapudi wingilwa ntanda yonso, Bulopwe bwa Leza bukongakanyanga kala kibumbo kikatampe kya bantu batambile mu mizo yonso. Midiyo ne midiyo ya bantu betyepeje i betabije kubikalwa na Yesu. Bulopwe bwa Leza bukebakinga pobukonakanya ino ngikadilo mibi ya bintu pano pa ntanda. O mwanda bonso basaka kumwena mu Bulopwe bwa Leza bafwaninwe kwifunda kwikala bu babikalwa ba kikōkeji ba Yesu.​—Tanga Kusokwelwa 7:9, 14, 16, 17.

Mu bula bwa myaka 1 000, buno Bulopwe bukafikidija mpango imbajinjibajinji ya Leza itala muzo wa muntu. Ntanda yonso ikalamuka ke paladisa. Mfulo mfulō, Yesu ukajokejeja Shandi Bulopwe. (1 Kodinda 15:24-26) Le uyukile muntu kampanda okokeja kusapwila myanda ya Bulopwe bwa Leza?​—Tanga Ñimbo ya Mitōto 37:10, 11, 29.