Eseta wādi nsongwakaji Muyuda wādi ushikata mu Shushane, kibundi kya bene Peleshia. Myaka mingi kunyuma, Nebukaneza wākaselele kisaka kya ba Eseta mu Yelusalema. Eseta wātamijibwe na Modekai, mwanabo wa mu kisaka, wādi mwingidi wa Ahaswelusa mulopwe wa Peleshia.

Mulopwe Ahaswelusa wādi ukimba mukaji wa kusonga. Bengidi bandi bāmuletela bana-bakaji bayampe mapala ba mu ntanda’ya, mwine mwādi ne Eseta. Ino mu bano bana-bakaji bonso, mulopwe wātonga’mo Eseta ekale wandi mukaji. Modekai wāsapwidile Eseta aleke kwiyukanya bu Muyuda.

Muntu umo wa mitatulo witwa bu Hamane, ye wādi mukatampe wa bamfumu bonso. Wādi usaka bantu bonso bamufukatyile. Modekai pa kupela kumufukatyila, Hamane wākalabala, kākimbe kumwipaya. Hamane pa kuyuka’mba Modekai i Muyuda, wākwata mulangwe wa kwipaya Bayuda bonso bādi mu ntanda’ya. Wākasapwila mulopwe Ahaswelusa amba: ‘Bayuda i bantu baleta kyaka; ufwaninwe kwibepaya.’ Ahaswelusa nandi wāmunena’mba: ‘Wibalonge mosakila,’ kadi wāmupa ne lupusa lwa kutūla’ko kijila. Hamane wātūla’ko kijila kisoñanya bantu bepaye Bayuda mu difuku 13 dya kweji wa Adala. Yehova wādi umwene.

Eseta kādipo uyukile kino kijila. O mwanda Modekai wāmulembēle’kyo ne kumusapwila’mba: ‘Enda kudi mulopwe ukesambe nandi.’ Eseta wānena’mba: ‘Muntu yense wenda kwa mulopwe pampikwa kwitwa bakamwipaya. Mulopwe kangityilepo, pano kepadi mafuku 30! Nansha nankyo, ami nsa kwenda’ko. Shi angolwele’tu nkonto wandi, nankyo napande. Ino shi kangolwedile’yepo, nankyo nafu.’

Eseta wākatwelele mu kipango kya mulopwe. Mulopwe pa kumumona, wāmolwela nkonto. Eseta nandi wāmufwena, mulopwe  wāmwipangula’mba: ‘Eseta, le usaka nkulongele bika?’ Eseta wālondolola’mba: ‘Nsaka kwimwita ku fetyi, abe ne Hamane.’ Pobāfikile ku fetyi, Eseta wēbeta ne ku fetyi ya bubidi. Pobādi ku fetyi ya bubidi, mulopwe wāipangula Eseta monka’mba: ‘Le usaka nkulongele bika?’ Eseta wālondolola’mba: ‘Kudi muntu usaka kungipaya ami ne bami bantu. Nakwisāshila, witupandije.’ Mulopwe wāmwipangula’mba: ‘I ani usaka kwimwipaya?’ Eseta wāmusapwila’mba: ‘I uno Hamane, muntu mubi.’ Ahaswelusa pa kuloba bininge, wāipaija Hamane ponka na ponka.

Ino nansha nankyo, kekwādipo muntu nansha umo ubwanya kwipaya kijila kya Hamane, nansha ke mulopwe mwine. Penepo mulopwe wātūla Modekai bu mukatampe wa bamfumu, wāmupa ne lupusa lwa kutūla’ko kijila kipya. Modekai wātūla’ko kijila kipa Bayuda lupusa lwa kwilwila abo bene shi abatambwe bulwi. Mu difuku 13 dya kweji wa Adala, Bayuda bānekenya balwana nabo. Tamba dine difuku’dya, Bayuda bāshilwile kusoba masobo a kuvuluka buno bushindañani mwaka ne mwaka.