1. Le i bika byotwefundile ku kupwila kwa pa mwaka kwa mu 2023?

 KU KUPWILA kwa pa mwaka kwa mu 2023, a twatambwile’ko bitōkeji kampanda bikunka mutyima bya nkulupilo yetu ne kwivwana’ko misapu kampanda isangaja itala mwingilo wetu. Kimfwa, twefundile’ko amba bantu bamo babwanya kukekala na mukenga wa kwilunga na bantu ba Yehova, enka ne pa kupwa kwa Babiloni Mukatampe konakanibwa. Kadi twefundile’ko amba kushilwila mu Kweji 11, 2023, basapudi ba Bulopwe kebakalombwepo monka kutūla lapolo ya byonso byobalonga mu busapudi. Le kuno kushinta kulombola’mba mwingilo wetu wa busapudi ke wa mvubu mityetye ne amba keukidipo wa kampeja-bukidi? Aa!

2. Mwanda waka difuku dyonso dipita dilengejanga mwingilo wetu wa busapudi wikadile’ko wa kampeja-bukidi? (Mako 13:10)

² Difuku dyonso dipita, dilengejanga mwingilo wetu wa busapudi wikadile’ko wa kampeja-bukidi. Mwanda waka? Mwanda difuku dyonso dipita ditufwenyanga ku mfulo. Tubandaulei’ko byālaile Yesu pa mwingilo wa busapudi mu mafuku a mfulo. (Tanga Mako 13:10.) Mungya nsekununi idi mu Mateo, Yesu wānenene amba myanda miyampe ikasapulwa pa ntanda yonso ikelwe na bantu kumeso kwa “mfulo” kwiya. (Mat. 24:14) Kino kishima kifunkila pa konakanibwa kwa ngikadilo mibi ya bintu ya Satana. Yehova ke mutunge “difuku ne nsá” isa kulongeka bino binkumenkume panopano ponka. (Mat. 24:36; 25:13; Bil. 1:7) Difuku dyonso dipita ditufwenyanga ku kino kitatyi. (Loma 13:11) Enka ne bifika mfulo, batwe tufwaninwe kwendelela kusapula.

3. Le i bika bitutononanga tusapule?

 ³ Kitatyi kyotulangulukila pa mwingilo wetu, i biyampe twiipangule kino kipangujo: Mwanda waka tusapulanga myanda miyampe? Buswe bo bwitutononanga tusapule. Bintu byotuloñanga mu mwingilo wa busapudi bilombolanga buswe botusenswe myanda miyampe, buswe botusenswe bantu, ne kutabukidila buswe botusenswe Yehova ne dijina dyandi. Lekai tubandaule bino bintu kimo ne kimo.

TUSAPULANGA MWANDA TUSENSWE MYANDA MIYAMPE

4. Le twiivwananga namani pobetusapwila myanda miyampe?

⁴ Le ubwanya kuvuluka moweivwanine pobakusapwidile mwanda muyampe—padi wa kubutulwa kwa mwana mu kisaka nansha wa kupebwa kaji kowadi usakilwa bininge? Na bubine waikele na kipyupyu kya kusapwila ba mu kyobe kisaka ne balunda ino myanda miyampe. Le ye moweivwanine ne powaivwene myanda miyampe kutabuka yonso—ko kunena’mba myanda miyampe ya Bulopwe bwa Leza?

5. Lelo weivwene namani powefundile dibajinji bubine bwa mu Kinenwa kya Leza? (Tala ne bifwatulo.)

⁵ Langulukila pa moweivwanine powefundile dibajinji bubine bwa mu Kinenwa kya Leza. Wefundile amba Tata obe wa mūlu ukusenswe, usakanga wikale mu kisaka kya batōtyi bandi, i mulaye kutalula’ko misanshi ne masusu, ne amba ubwanya kwikala na lukulupilo lwa kwimona monka mu ntanda mipya na baswe bobe bafwile, ne bikwabokwabo. (Mako 10:​29, 30; Yoa. 5:​28, 29; Loma 8:​38, 39; Kus. 21:​3, 4) Buno bubine bwakusangeje bininge. (Luka 24:32) Wasenswe byowefundile, kadi wasakile kusapwila muntu ense buno bubine bulēme!—Dingakanya na Yelemia 20:9.

6. Le i ñeni’ka yowaboila ku kimfwa kya ba Ernest ne Rose?

⁶ Twisambilei’ko pa kino kimfwa. Tutu umo witwa bu Ernest b wadi na myaka dikumi  pafwile shandi. Ernest uvuluka’mba: “Neipangwile amba: ‘Le waenda mūlu? Nansha wafu lonso?’ Nadi ngabila bana bakwabo badi na bashabo.” Ernest wadi wenda kitatyi kyonso ku tubudi, wafukata pa kibundu kya shandi kalombela’mba: “A Leza, nakwisāshila, nkimba kuyuka kudi wami tata.” Kintu kya myaka 17 pa kupita’po na pafwile shandi, Kamoni umo wanena Ernest befunde nandi Bible, nandi waitabija. Wasangele pa kuyuka’mba bafwile kebayukilepo kintu pamo bwa abo badi mu tulo bukū, ne amba Bible i mulaye amba kukekala lusangukilo. (Mus. 9:​5, 10; Bil. 24:15) Ku mfulo, watene malondololo ku bipangujo byadi bimuvutakanya ñeni mu bula bwa myaka mivule! Ernest wasangedile bininge bubine bwa mu Bible bwaefundile. Wandi mukaji Rose washilwile nandi kwifunda Bible ne kusangela bininge byaadi wifunda. Babatyijibwa mu 1978. Basapwile nkulupilo yabo milēme ku ba mu kisaka, ku balunda nabo, ne ku bantu bakwabo badi balombola kusangela. Ba Ernest ne Rose i bakwashe bantu 70 ne musubu bendelele kufika ne ku kubatyijibwa.

7. Le i bika bilongekanga shi tubasanswa bininge bubine bwa mu Bible? (Luka 6:45)

⁷ Na bubine, shi tubasanswa bininge bubine bwa mu Bible, tusakanga kusapwila’bo bantu bakwabo. (Tanga Luka 6:45.) Twiivwananga pamo bwa bana ba bwanga ba Yesu ba mu myaka katwa kabajinji bānenene amba: “Ketubwanyapo kuleka kwisamba bintu byotwamwene ne byotwaivwene.” (Bil. 4:20) Tusenswe bininge bubine, o mwanda tusakanga kusapwila’bo bantu bavule.

TUSAPULANGA MWANDA TUSENSWE BANTU

8. Lelo i bika bitutononanga tusapwile bantu bakwabo myanda miyampe? (Tala kapango “ Sanswa Bantu—Ulonge Bana ba Bwanga.”) (Tala ne kifwatulo.)

⁸ Netu tusenswe bantu pamo bwa Yehova ne wandi Mwana. (Nki. 8:31; Yoa. 3:16) Twivwaninanga bininge lusa bantu “bampikwa Leza” ne bampikwa “lukulupilo.” (Ef. 2:12) Bekondanga na makambakano mavule, inoko batwe tudi na bine byobasakilwa—ke myanda miyampe ya Bulopwe bwa Leza kadi. Buswe botwibasenswe ne lusa lotwibevwanina bitutononanga tulonge bukomo bwetu bonso mwanda wa kwibasapwila myanda miyampe. Uno musapu mulēme ubwanya kwibapa lukulupilo, kwibakwasha bekale na būmi buyampe tamba’nka pano, ne kwibapa mukenga wa kwikala na “būmi bwinebwine”—ko kunena’mba būmi bwa nyeke mu ntanda mipya ya Leza.—1 Tm. 6:19.

9. Le i kidyumu’ka kyotusapwilanga bantu kitala mafuku a kumeso, ne mwanda waka? (Ezekyele 33:​7, 8)

⁹ Kadi buswe botusenswe bantu bwitutononanga twibadyumune ku mfulo ya ino ntanda mibi yafwena’i. (Tanga Ezekyele 33:​7, 8.)  Twivwaninanga lusa balondakani netu ne ba mu kyetu kisaka kebengidilapo Yehova. Bavule i beele mu myanda ya mu būmi bwa difuku ne difuku pampikwa kuyuka bīya kumeso—ko kunena’mba “kyamalwa kikatampe kekyaikele’ko kashā tamba ku ngalwilo ya ino ntanda kufika ne pano, . . . kadi kekikekala’kopo monka.” (Mat. 24:21) Tusakanga bayuke bisa kulongeka pa kino kitatyi kya butyibi—dibajinji kutalulwa’ko kwa mutōtelo wa bubela, kupwa konakanibwa kwa ino ngikadilo mibi ya bintu pa Amakedona. (Kus. 16:​14, 16; 17:​16, 17; 19:​11, 19, 20) Tulombelanga’mba bantu bavule bevwane kino kidyumu ne kwilunga netu mu butōtyi butōka tamba’nka pano. Ino le tunene namani pa boba kebatejepo kidyumu kyotwibasapwila pano, kubadila’mo ne baswe betu ba mu kisaka?

10. Mwanda waka i kya mvubu twendelele kudyumuna bantu?

¹⁰ Monka mwashintulwidile’byo kishinte kibadikile, Yehova ubwanya kukapandija bantu bakashinta mityima yabo pobakamona konakanibwa kwa Babiloni Mukatampe. Shi bidi namino, nanshi pano po pene potufwaninwe kusapula kino kidyumu na kampeja-bukidi. Tala uno mwanda: Bintu byotwibasapwila pano bibwanya kwibafundija bintu byobakavuluka mu kine kitatyi’kya. (Dingakanya na Ezekyele 33:33.) Padi bakavuluka kidyumu kyobaivwene kotudi ne kwibatonona belunge netu mu butōtyi butōka kumeso kwa mfulo kufika. Pamo’nka bwa mulami wa kifungo wa mu Fidipai wāshintyile mutyima enka pokwāikele “kutenkana kukatampe kwa ntanda,” ne bantu bamo botusapwila musapu wetu pano babwanya padi kukashinta mutyima wabo pa kupwa kwa Babiloni Mukatampe konakanibwa.—Bil. 16:​25-34.

TUSAPULANGA MWANDA TUSENSWE YEHOVA NE DIJINA DYANDI

11. Le i muswelo’ka otupanga Yehova ntumbo, bulēme, ne bukomo? (Kusokwelwa 4:11) (Tala ne bifwatulo.)

¹¹ Bubinga bukatampe bwitulengejanga tusapule myanda miyampe i buswe botusenswe Yehova Leza ne dijina dyandi dijila. Tumonanga mwingilo wetu wa busapudi bu muswelo wa kutendela Leza otusenswe. (Tanga Kusokwelwa 4:11.) Twitabije na mutyima wetu onso amba Yehova Leza i mufwaninwe kupebwa ntumbo, bulēme, ne bukomo na batōtyi bandi ba lulamato. Tumupanga ntumbo ne bulēme kitatyi kyotusapwila bantu bakwabo bubinga bukulupilwa bwa amba aye “wapangile bintu byonso,” ne amba shi tudi’ko i pa mwanda wa kiswa-mutyima kyandi. Tumupanga bukomo bwetu potwingidija kitatyi kyetu, bukomo bwetu, ne bintu byotudi  nabyo mwanda wa kusapula ne pa mfulo mungya motubwaninya. (Mat. 6:33; Luka 13:24; Kol. 3:23) Na bubine, tusenswe kwisamba myanda ya Leza wetu otusenswe. Kadi buno buswe bwitutononanga tusapwile bantu bakwabo dijina dyandi ne ngikadila yandi. Mwanda waka?

12. Le i muswelo’ka otupandulanga dijina dya Yehova mu busapudi?

¹² Buswe botusenswe Yehova bwitutononanga tupandule dijina dyandi. (Mat. 6:9) Tusakanga kusapwila bantu bakwabo amba bintu bibi binena Satana padi Yehova i bya bubela. (Ngo. 3:​1-5; Yoba 2:4; Yoa. 8:44) Mu busapudi, tusakanga kupandula dijina dya Leza na kulombola bantu bonso basangela bubine butala pādi. Tusakanga bantu bonso bayuke amba ngikadila yandi mikatampe i buswe, amba muswelo wandi wa kuludika i muyampe kadi wa boloke, ne amba panopano ponka Bulopwe bwandi busa kutalula’ko masusu ne kuletela muzo wa muntu nsangaji ne ndoe. (Ñim. 37:​10, 11, 29; 1 Yo. 4:8) Kitatyi kyotusapwila bantu bino bintu bitala padi Yehova, tupandulanga dijina dyandi. Kadi tusangalanga pa kuyuka’mba twiendejanga mungya dijina dyetu. Muswelo’ka?

13. Mwanda waka twifyelelanga kwitwa bu Batumoni ba Yehova? (Isaya 43:​10-12)

¹³ Yehova witwitanga bu “batumoni” bandi. (Tanga Isaya 43:​10-12.) Pano kepadi myaka kampanda, mukanda umo utamba ku Kitango Kyendeji wanenene amba: “Tudi na dyese dikatampe dya kwitwa bu Batumoni ba Yehova.” c Mwanda waka? Tubandaulei’ko kino kimfwa. Fwatakanya’po bidi abakusambila’mba wi mulonge kintu kampanda kibi. Ebiya kosakilwa muntu wa kusapwila bantu  bakwabo amba mwanda’wa i wa bubela, ne amba wi muntu muyampe kabwanyapo kulonga nansha dimo kino kintu. Le i ani okatonga bu wa kukunenena? Na bubine ukatonga muntu oyukile ne okulupile, kadi uyukene bu wa mwiendelejo muyampe mwine obabwanya kukulupila. Ne Yehova nandi paetutongele bu Batumoni bandi, i mulombole amba wituyukile biyampe kadi ukulupile amba tukasapwila bantu bakwabo amba aye ye Leza umo kete wa bine. Twimonanga bu balēmekibwe bininge pa kwikala bu Batumoni bandi. O mwanda tukwatakanyanga mikenga yo-yonso ya kuyukanya dijina dyandi ne kubepulula bubela bonso bobamubepele. Potulonga namino, twiendejanga mungya dijina dyetu dyotwifyelelanga bininge dya bu Batumoni ba Yehova!—Ñim. 83:18; Loma 10:​13-15.

TUKENDELELA KUSAPULA KUFIKA NE KU MFULO

14. Le i bintu’ka byotutengēle na kipyupyu kwimwena kumeso’ku?

¹⁴ Tutengēle na kipyupyu kwimwena bintu bisa kulongeka panopano kumeso’ku! Na bukwashi bwa Yehova, tukulupile kwimwena bantu bavule betabija bubine kumeso kwa kyamalwa kikatampe kushilula. Kadi tusangedile bininge mulangwe wa amba nansha ke mu kino kitatyi kya makambakano makomo mu mānga ya muzo wa muntu—ko kunena’mba pa kyamalwa kikatampe—tubwanya kwendelela kumwena’ko bantu bavule batamba mu ntanda ya Satana ne kwilunga netu mu kutendela Yehova!—Bil. 13:48.

15-16. Le i bika byotukendelela kulonga, kadi i kufika ne kitatyi’ka?

¹⁵ Pano’ko bidi, tudi na mwingilo wa kwingila. Tudi na dyese dya kusapula musapu keukasapulwapo monka—ko kunena’mba kusapula myanda miyampe ya Bulopwe bwa Leza pano pa ntanda ponso. Kadi mu kino kitatyi kimo kyonka, tufwaninwe ne kwendelela kusapula musapu wa kidyumu. Bantu banenwe kuyuka’mba mfulo ya ino ngikadilo mibi ya bintu ifwenanga bukidi bonka. Ebiya pakafika kino kitatyi kya butyibi, bakayuka’mba uno musapu otwadi tusapula wadi utamba kudi Yehova Leza.—Ezk. 38:23.

¹⁶ Le penepo i bika byotusumininwe kulonga? Byotusenswe myanda miyampe, bantu, ne kutabukidila Yehova ne dijina dyandi—tukendelela kusapula na kipyupyu, na kampeja-bukidi, ne na bupyasakane kufika enka ne bikanena Yehova amba, “Kubapu!”