1. Le i bika biloñanga muntu wisāsa?

 SHI tubalonga kintu kibi, i kya mvubu kwisāsa. Mu Bible, muntu wisāsa ushintanga mulangilo wandi pa mwiendelejo kampanda, waleka mwiendelejo’wa, ne kusumininwa kuleka kujokela’mo.—Tala kishima “Kwisāsa” mu Nshintulwilo ya Bishima bya mu Bible.

2. Mwanda waka batwe bonso tunenwe kuyuka myanda itala kwisāsa? (Nehemia 8:​9-11)

² Muntu yense unenwe kuyuka myanda itala kwisāsa. Mwanda waka? Mwanda batwe bonso tuloñanga bubi difuku ne difuku. Byotudi ba ku lutundu lwa ba Adama ne Eva, batwe bonso twi bapyane bubi ne lufu. (Loma 3:23; 5:12) I kutupu muntu katalwepo na uno mwanda. Enka ne bantu ba lwitabijo lwa kutendelwa pamo bwa mutumibwa Polo, bēkondele na milangwe ya bubi. (Loma 7:​21-24) Le kino kishintulula’mba tufwaninwe kwikala babimonya-malwa kitatyi kyonso pa mwanda wa bubi bwetu? Aa, Yehova i wa lusa, kadi usakanga twikale na nsangaji. Tubandaulei’ko kimfwa kya Bayuda ba mu mafuku a Nehemia. (Tanga Nehemia 8:​9-11.) Yehova wādi usaka bekale na nsangaji pobamutōta, pa kyaba kya kwitopeka bipitepite pa mwanda wa bubi bwabo bwa mafuku kunyuma. Yehova uyukile amba kwisāsa kutwalanga ku nsangaji. O mwanda witufundijanga myanda itala kwisāsa. Shi twisāse bubi bwetu, tubwanya kukulupila’mba Tata wetu wa lusa uketulekela.

3. Le i bika byotusa kubandaula mu kino kishinte?

³ Lekai tuyukile’ko bivule pa mwanda utala kwisāsa. Mu kino kishinte, tusa kubandaula’mo myanda isatu. Dibajinji, tusa kumona byāfundije Yehova bene Isalela pa mwanda utala kwisāsa. Kupwa, tusa kwisambila pa muswelo wākweshe Yehova babipya-mambo mwanda wa kwibafikija ku kwisāsa. Ku mfulo, tusa kwisambila  pa byēfundile balondi ba Yesu pa mwanda utala kwisāsa.

BYĀFUNDIJE YEHOVA BENE ISALELA PA MWANDA UTALA KWISĀSA

4. Le Yehova wāfundije bene Isalela bika pa mwanda utala kwisāsa?

⁴ Yehova paālongolwele bene Isalela bu muzo, wāsambile nabo kipwano na kwibapa bijila, nabo bāmulaya’mba bakebikōkela. Shi bākōkele bijila byandi, nandi wādi wa kwibakinga ne kwibesela. Yehova wēbakulupije pangala pa bino bijila’mba: “Ino mbila yonkusoñanya dyalelo dino’di ke mikomopo bininge kodi, nansha yokomenwa kufikila’po.” (Kup. 30:​11, 16) Inoko shi bāmutombokēle, kimfwa na kutonga kutōta baleza bakwabo, wādi wa kuleka kwibesela kadi nabo bādi ba kususuka. Inoko nansha nankyo, bādi babwanya monka kwitabijibwa na Leza. Bādi babwanya kujokela “kudi Yehova Leza [wabo] ne kwivwana diwi dyandi.” (Kup. 30:​1-3, 17-20) Mu muneneno mukwabo i amba, bādi babwanya kwisāsa. Shi bēsāshile, Yehova wādi wa kwibafwena ne kwibesela monka.

5. Le Yehova wālombwele namani amba kāelelepo bantu bandi ba kikōkeji? (2 Balopwe 17:​13, 14)

⁵ Bantu batongwe ba Yehova bāmutombokēle misunsa mivule. Kutentekela pa kutōta bilezaleza, bālongele ne bilongwa bikwabo bibi bine byēbalengeje basusuke. Inoko Yehova wāendelele kulonga bukomo mwanda wa kukwasha bantu bandi ba kubulwa kikōkeji. Wātumine bapolofeto misunsa mivule mwanda wa kukwasha bantu bandi besāse ne kujokela kwadi.—Tanga 2 Balopwe 17:​13, 14.

6. Le Yehova wāingidije namani bapolofeto mwanda wa kufundija bantu bandi kamweno kadi mu kwisāsa? (Tala ne kifwatulo.)

⁶ Yehova wāingidije divule bapolofeto bandi mwanda wa kudyumuna ne kulemununa bantu bandi. Kimfwa, Leza wānenene kupityila kudi Yelemia amba: “Abe Isalela mushetemuke, joka . . . Nkikemutalepo munshi na bukalabale, mwanda ami ne wa lulamato . . . Nkikekalapo na nsungu nyeke. Itabija’tu mambo obe, mwanda ubatombokela Yehova Leza obe.” (Yel. 3:​12, 13) Yehova wānenene kupityila kudi Yoela amba: “Jokelai kondi na mityima  yenu yonso.” (Yoe. 2:​12, 13) Wāsoñenye Isaya asapwile bantu amba: “Talulai bilongwa byenu bibi ku meso ami; lekai kulonga bibi.” (Isa. 1:​16-19) Kadi Yehova wāipangwile kupityila kudi Ezekyele amba: “Le ami nsangelanga lufu lwa mubi? . . . Le nkisakangapo avundamine mashinda andi amba ashale mūmi? Ami nkisangelangapo lufu lwa muntu nansha umo, . . . nanshi jokai amba mwikale bōmi.” (Ezk. 18:​23, 32) Yehova usangalanga pamona bantu besāsa mwanda usakanga bendelele kwikala bōmi, ko kunena’mba nyeke ne nyeke! Nanshi Yehova kelaijangapo enka muntu ulongele bubi ashinte, ebiya kamukwasha. Tubandaulei’ko bimfwa bikwabo bibingija uno mwanda.

7. Le Yehova wāfundije bantu bandi bika na kwingidija nsekununi ya mupolofeto Hosea ne wandi mukaji?

⁷ Tala Yehova byaāfundije bantu bandi kupityila ku kimfwa kimweke kya Ngomela, mukaja mupolofeto Hosea. Ngomela pa kupwa kulonga makoji, wāshile Hosea wāenda ku bana-balume bakwabo. Le kādipo ukokeja kushinta? Yehova mwine umonanga bidi mu mityima, wālombwele Hosea amba: “Enda monka, kasanswe mwana-mukaji obasenswe kudi muntu mukwabo kadi ulonga makoji, monka musanshilwe Yehova bantu ba Isalela nansha byobaalamukila kudi baleza bakwabo.” (Hos. 3:1; Nki. 16:2) Usa kumona’mba mukaja Hosea wādi ukyendelela kulonga bubi bukatampe. Nansha nankyo, Yehova wāsapwidile Hosea akamukimbe, amulekele, ne kumwaluja bu mukaji. a Kupityila ku kino kimfwa, Yehova wādi usaka kufundija bantu bandi ba kubulwa kikōkeji mwaādi wiivwanina pobadi. Nansha byobētumpile mu kulonga bubi bwa mu meso fututu, aye wādi’nka wibasenswe kadi wādi ukimba kwibakwasha besāse ne kushinta mwiendelejo wabo. Kino kimfwa kitufundija’mba Yehova uyukile kanda ne kanda kadi mu mutyima wa muntu, kadi ukalonga bukomo bwa kukwasha muntu ukyendelela kulonga bubi bukatampe mwanda wa kumufikija ku kwisāsa. (Nki. 17:3) Lekai tubandawile’ko myanda mikwabo pa uno mwanda.

MUSWELO UFIKIJANGA YEHOVA BABIPYA-MAMBO KU KWISĀSA

8. Le Yehova wālongele’po namani mwanda wa kukwasha Kaini afikile ku kwisāsa? (Ngalwilo 4:​3-7) (Tala ne kifwatulo.)

⁸ Kaini wādi mwana umbedi wa ba Adama ne Eva. Wāpyene bya kusakasaka bya kulonga bubi ku bambutwile bandi. Kadi Bible unena pādi amba: “Mingilo yandi yādi mibi.” (1 Yo. 3:12) Padi kino kyo kyālengeje Yehova aleke kuloelelwa “nansha dimo Kaini ne kyamulambu kyandi kine” kitatyi kyaāmulambwile kitapwa. Pa kyaba kya kushinta mwiendelejo wandi, “Kaini wāloba bininge ne kukalala.” Le Yehova wālongele’po namani? Wēsambile na Kaini. (Tanga Ngalwilo 4:​3-7.) Usa kumona’mba Yehova wālangulukile na Kaini na kanye na kumukulupija’mba ukamwesela shi alonge byobya biyampe. Kadi wāmudyumwine ku kyaka kya kulonga bubi. Kya bulanda, Kaini kātejejepo. Kālekelepo Yehova amukwashe esāse. Le Kaini pa kupela madingi, Yehova wālekele’byo kulonga bukomo bwa kukwasha babipya-mambo bakwabo mwanda wa bafikile ku kwisāsa? Nansha dimo!

9. Le Yehova wākweshe namani Davida esāse?

⁹ Yehova wādi usenswe bininge Mulopwe Davida. Wāmwityile enka ne bu “muntu wa mwendele mutyima wami.” (Bil. 13:22) Inoko Davida wālongele bubi bukatampe bwa makoji ne kwipayañana. Mungya Bijila bya Mosesa, Davida wādi unenwe kwipaibwa. (Levi 20:10;  Umb. 35:31) Inoko, Yehova wāsakile kumukwasha esāse. b Wātuma mupolofeto wandi Natana akapempule Davida, nansha Davida byaādi kalombwele kakiyukeno nansha kamo ka kwisāsa. Natana wāingidija kyelekejo mwanda wa kukwasha Davida evwanije amba i mulonge bubi bukatampe. Davida pa kujingulula’mba i mulubile Yehova bininge, wēsāsa. (2 Sa. 12:​1-14) Wālemba lwimbo lwa mitōto lulombola muswelo wāealakenye pa bintu byaālongele. (Ñim. 51, bilembwa bya kūlu.) Luno lwimbo lwa mitōto i lusenge babipya-mambo bavule ne kwibalengeja besāse. Mwene i kisangaja kumona’mba Yehova wākweshe Davida mwingidi wandi muswedibwe esāse?

10. Le ubeivwana namani pa kuyuka’mba Yehova witutūkijijanga mutyima ne kwitulekela?

¹⁰ Yehova ushikilwe bubi bwa miswelo yonso, kadi kebutalengapo kilomonyeka. (Ñim. 5:​4, 5) Inoko uyukile amba batwe bonso twi babipya-mambo. Kadi byaetusenswe, utoñanga kwitukwasha tulwe na bubi. Uloñanga nyeke bukomo bwa kukwasha enka ne babipya-mambo ba mu meso fututu besāse ne kufwena kwadi. Bine bisenga’po kashā kuyuka kino! Potulangulukila pa kitūkijetyima kya Yehova ne lulekelo lwandi, tusumininwanga kushala ba kikōkeji kwadi ne kwisāsa bukidibukidi kitatyi kyotulonga bubi. Pano tubandaulei’ko muswelo wāfundije Yesu balondi bandi myanda itala kwisāsa.

BYĒFUNDILE BALONDI BA YESU PA MWANDA UTALA KWISĀSA

11-12. Le i kimfwa’ka kyāletele Yesu mwanda wa kulombola mwikadile lulekelo lwa Shandi? (Tala kifwatulo.)

¹¹ Kitatyi kya Meshiasa kwiya kyābwene. Monka mwalombwedile’kyo kishinte kibadikile, Yehova wāingidije Yoano Mubatyiji ne Yesu Kidishitu mwanda wa kufundija bantu bandi mvubu ya kwisāsa.—Mat. 3:​1, 2; 4:17.

¹² Mu bula bwa mwingilo wandi, Yesu wāfundije bantu mwikadile lulekelo lwa Shandi. Yesu wāfundije’lo mu muswelo wa pa bula kitatyi kyaāletele kyelekejo kya mwana mujimine. Uno nsongwalume wātalukile ku njibo ne kwiela mu būmi bwa bya bulongelonge. Inoko kitatyi kampanda pa kupita’po, ‘wēlanga’ wājokela  ku njibo. Le shandi wālongele’po namani? Yesu wānenene amba “aye ukidi dya kulampe mwishinda, shandi wamumona, wamukwatyilwa lusa, ebiya wanyema lubilo wakamupamba bīpa, kamufifye senene.” Mwana wāsakile kwikala mwingidi mu njibo ya shandi, inoko shandi wāmwita bu “uno wami mwana” ne kumwalwija mu kisaka. Shandi wānena’mba: “Wadi mujimine, wamweka.” (Luka 15:​11-32) Na bubine Yesu paādi mūlu kumeso kwa kwiya pano pa ntanda, wāmwene Shandi ulombola lusa na luno ku babipya-mambo besāsa. Bine, uno shao o muswelo usenga kadi ukankamika wālombwele Yesu mwikadile mutyima wa lusa wa Tata wetu, Yehova!

13-14. Le i bika byēfundile mutumibwa Petelo pa mwanda utala kwisāsa, ne i bika byaāfundije bantu bakwabo pa uno mwanda? (Tala ne kifwatulo.)

¹³ Mutumibwa Petelo wēfundile ñeni ya kamweno kudi Yesu pa muswelo ulekelanga Yehova boba besāsa. Petelo wālongele bilubo bivule, inoko Yesu wādi’nka umulekela. Kimfwa, Petelo pa kupwa kutuna Mfumwandi misunsa isatu, wātyumukilwe mutyima na milangwe ya kwitopeka. (Mat. 26:​34, 35, 69-75) Inoko Yesu pa kusanguka, wāmwekēle Petelo—kadi mobimwekela kwa bunka bwandi. (Luka 24:​33, 34; 1 Ko. 15:​3-5) Na bubine, Yesu wāyukile amba Petelo i mwisāse, o mwanda wāmukulupije mu uno mukenga’mba i mumulekele.

¹⁴ Petelo pa kupwa kwimwena uno mwanda, pano wādi kabwanya kufundija bakwabo myanda itala kwisāsa ne lulekelo. Kitatyi kampanda pa kupita’po na pāsobelwe masobo a Pentekosa, Petelo wānenene mwisambo ku kibumbo kya Bayuda bampikwa kwitabija, wēbashintulwila’mba baipaile Meshiasa. Inoko wēbakankamika na buswe amba: “Mwisāsei, kadi alamukai mwanda wa bubi bwenu bujimankanibwe, amba bitatyi bya kutūja bitambe kudi Yehova mwine.” (Bil. 3:​14, 15, 17, 19) Mu uno muswelo, Petelo wālombwele amba kwisāsa kulengejanga kipya-mambo alamuke, ko  kunena’mba ashinte mulangilo wandi ne bilongwa byandi ne kwikala na mwiendelejo mupya usangaja Leza. Kadi mutumibwa Petelo wālombwele amba Yehova ukabula bubi bwabo, nansha kwibulengeja bujimankane. Ne kadi myaka mivule pa kupita’po, Petelo wākulupije bene Kidishitu amba: “Yehova . . . wimutūkijije mutyima mwanda kasakilepo muntu nansha umo oneke, ino usaka bonso bafikile pa kwisāsa.” (2 Pe. 3:9) Bine, bisenga’po kashā kuyuka’mba shi twisāse bubi bwetu, Yehova uketulekela nansha shi i bukatampe namani!

15-16. (a) Le Polo wēfundile namani myanda itala lulekelo? (1 Temote 1:​12-15) (b) Le i bika byotukabandaula mu kishinte kilonda’ko?

¹⁵ Solo wa ku Tasusa wālongele bintu bivule bibi byāmulengeje asakilwe bininge kwisāsa ne kulekelwa. Wāpangilepangile bya mu meso fututu balondi baswedibwe ba Kidishitu. Bene Kidishitu bavule ye bano bādi balanga’mba kakabwanyapo kushinta nansha dimo. Inoko Yesu musanguke wādi uyukile amba Solo ubwanya kushinta ne kwisāsa. Aye ne Shandi bāmwene ngikadila miyampe mwadi. Yesu wānenene amba: “Uno muntu i kingidilwa kyonatonga.” (Bil. 9:15) Yesu wālongele enka ne kingelengele mwanda wa kufikija Solo ku kwisāsa. (Bil. 7:58–8:3; 9:​1-9, 17-20) Pa kupwa kwikala mwine Kidishitu, Solo—mwine wāyukene mwenda mafuku bu mutumibwa Polo—wālombwele misunsa mivule mutyima wandi wa kufwija’ko pa kanye ne lusa byobāmulombwele kudi ba Yehova ne Yesu. (Tanga 1 Temote 1:​12-15.) Uno mutumibwa wa mutyima wa kufwija’ko wāfundije amba: “Leza, mu kanye kandi, usakanga kukufikija ku kwisāsa.”—Loma 2:4.

¹⁶ Le Polo paāivwene mwiendelejo wa bumvu wa busekese wādi mu kipwilo kya bwine Kidishitu mu Kodinda, wāpwijije’o namani? Wāpwijije’o mu muswelo witufundija ñeni mikatampe pa muletelanga Yehova bulemununi na buswe, ne kamweno kadi mu kulombola lusa. Tukabandaula ino nsekununi kamo ne kamo mu kishinte kilonda’ko.