“MWANGULO i mukatampe, ino bengidi i batyetye. O mwanda, abijai Mwinē mwangulo atume bengidi mu mwangulo wandi.” (Luka 10:2) Bino binenwa byānenenwe na Yesu pano kepadi myaka 2 000 i bikwatañane na myanda ilongeka mu Myamar dyalelo. Namani? Mu Myamar, mudi basapudi 4 200 kete basapula myanda miyampe ku bantu midiyo 55.

Inoko, “Mwinē mwangulo,” Yehova, i mutenge mityima ya batutu ne bakaka tutwa na tutwa ba mu matanda palapala, bende mu ino ntanda idi Kutunduka ne Kunshi kwa Azia mwanda wa kukakwasha ku mwangulo wa ku mushipiditu. I kika kyebalengeje baviluke mu abo matanda? Le babwenye namani kuviluka? Ne i madyese’ka obeselwe? Lekai twimwene.

Myaka mityetye kunyuma, Kazuhiro, pania umo wa mu Jampani, waponene kifwafwa bibi, wapungila, kupwa bamuselela ku lupitalo. Dokitele wamusapwila’mba kafwaninwepo kwendeja motoka mu myaka ibidi. Kino kyasense Kazuhiro. Kawiipangula’mba, ‘Le nkendeleja namani uno mwingilo onsenswe​—bupania?’ Walombele bininge, wazenza Yehova amupe’ko mukenga wa kwendeleja mwingilo wa bupania.

Kazuhiro unena’mba: “Kweji umo pa kupita’po, mulunda nami wadi wingidila mu Myamar waivwene byamalwa byauntene. Kupwa waungita ne kunombola’mba: ‘Muno mu Myamar mudi kala myotoka iselañana. Shi wiye muno, ukokeja kwendeleja mwingilo obe pampikwa wendeje motoka!’ Nakepangula dokitele wami shi mbwanya kuvilukila mu Myamar. Natulumukile pansapwidile dokitele amba: ‘Kudi shayuka umo mu myanda ya bongolo utambile mu Myamar, pano udi muno mu Jampani. Nsa kukakutwala’ko. Shi misongo ibakakujokela monka, ubwanya kukakukwasha.’ Namwene amba binenwa bya uno dokitele i malondololo atamba kudi Yehova.”

Bukidi bonka, Kazuhiro watuma musapu ku bilo ya musambo wa mu Myamar, webalombola’mba aye ne wandi mukaji badi na mutyima wa kukengidila mu ino ntanda bu bapania. Papita’tu mafuku atano kete, kala bilo yalondolola’mba, “Iyai, tusakilwa bapania bavule!” Penepa ba Kazuhiro ne wandi mukaji Mari, bapoteja yabo myotoka ibidi mwanda wa kupota mukanda wa kwenda nao mu ntanda ingi ne kufuta ku amviyo. Dyalelo, bengilanga na nsangaji mu kisumpi kya ludimi lwa batumama mu Mandalay. Kazuhiro unena’mba: “Kwimwena ino myanda, i kukomeje lwitabijo lwetu mu mulao wa Leza udi mu Ñimbo  ya Mitōto 37:5 wa amba: ‘Pāna dishinda dyobe kudi Yehova; mukulupile, nandi ukakulongela bintu.’”

Mu 2014, Batumoni ba Yehova ba mu Myamar baikele na dyese dya kulongela kitango kya pa bula mu yabo ntanda. Kwaile kutanwa bantu bavule ba mu matanda angi. Umo bidi i Monique, kaka wa myaka 34 wa mu États-Unis, unena’mba: “Potwajokele ku kitango, nalombele Yehova ankwashe ndyuke kyomfwaninwe kulonga mu bwami būmi. Kupwa, twesamba na bami bambutwile pa bitungo byami bya ku mushipiditu. Batwe bonso twamona’mba, mfwaninwe kujokela mu Myamar, inoko pa kukwata butyibi bwa mfulo byaunombele kitatyi ne milombelo mivule.” Monique ushintulula kine kyaalongele namino.

“Yesu wākankamikile balondi bandi ‘babale lupeto lobasa kujimija.’ O mwanda neipangwile amba: ‘Le ngidi na lupeto lwa kuviluka nalo? Lelo nkabwanya kwikwatakanya ami mwine mu ntanda ya bweni pampikwa kwingila kaji ka ku ngitu kitatyi kivule?’” Unena’mba: “Najingulwile bukidi bonka’mba nkidipo na lupeto lubwane lwa kuvilukila nalo mu kipindi kikwabo kya ntanda.” Penepa, le wabwenye namani kuviluka?​—Luka 14:28.

Monique unena’mba: “Difuku dimo mukulu wami wa kaji mwana-mukaji waunena tukemone nandi. Nazakala, kenanga’mba usa kuntalula pa kaji. Inoko, mukulu wami wa kaji waumfwijije’ko pa mwanda wa mwingidilo wami muyampe. Kupwa, waunsapwila’mba wakwete’ko mulangwe wa kumfwija’ko na lupeto, lwine lwafikile’nka pa buvule bwa lupeto lonadi nsakilwa!”

Monique wingidilanga mu Myamar tamba mu Kweji 12, 2014. Le wiivwananga namani pa kwingidila kokwa kusakilwa basapudi bavule? Unena’mba, “Ngidi na nsangaji pa kwiya kuno. Ñendejanga bifundwa bya Bible bisatu. Umo i mwana-mukaji wa myaka 67. Uñimunanga nyeke na mimungomungo ne kumpamba bīpa. Paefundile amba dijina dya Leza i Yehova, ne impolo yamusuma. Wanenene amba: ‘Uno o musunsa mubajinji mu būmi bwami kwivwana’mba dijina dya Leza i Yehova. Wi mwanuke mutyetye kondi, inoko ubaumfundija bintu bya mvubu byonadi nkyayukile kashā.’ Na bubine nami nasumije impolo. Kwimwena myanda pamo bwa ino i kulengeje boba bengidila kokwa kusakilwa basapudi bavule bekale na būmi bwa nsangaji.” Panopano, Monique waikele na dyese dya kukafunda Masomo a Basapudi ba Bulopwe.

Mwanda mukwabo walengeje bamo bavilukile mu Myamar i nsekununi idi mu Annuaire 2013 des Témoins de Jéhovah isambila pa ino ntanda. Kaka umo wa myaka 30 ne musubu witwa bu Li, aye wadi ushikatanga kala Kutunduka ne Kunshi kwa Azia. Wadi muvudilwe twaji, inoko nsekununi ya mu Annuaire yamulengeje ekale na mutyima wa kukengidila mu Myamar. Unena’mba, “Ponakatenwe ku kitango kya pa bula mu Yangon kya mu 2014, twetene’ko na ba mulume ne mukaji bengidilanga kokwa kusakilwa bukwashi mu mwaba wa ludimi lwa Kishinwa mu Myamar. Byonadi nesamba Kishinwa, nakwata butyibi bwa kuvilukila mu Myamar mwanda wa kukakwatakanya kisumpi kya ludimi lwa Kishinwa. Tweivwana na Monique, kupwa twavilukila mu Mandalay. Yehova i mwitwesele tusokole kaji ka kufundija ku masomo amo onka, kadi twasokwele kwa kushikata kubwipi na ano masomo. Nansha byomudi kyanga ne bikoleja bikwabo, nsangedile kwingidila kuno. Bantu ba mu Myamar badi na būmi bupēla, kadi badi na bulēme ne mutyima wa kwivwana myanda miyampe. Kisangaja’po kashā pa kumona mupēlakenya Yehova uno mwingilo. Nkulupile amba Yehova ye wasakile mvilukile mu Mandalay.”

Banabetu bavule bengidila kokwa kusakilwa basapudi bavule i bemwene bukomo bwa milombelo. Tala kimfwa kya Jumpei wa myaka 37 ne wandi mukaji Nao,  wa myaka 35. Badi bengidilanga kala mu kipwilo kya ludimi lwa batumama mu Jampani. Mwanda waka bavilukidile mu Myamar? Jumpei unena’mba: “Ami ne wami mukaji twadi kala na kitungo kya kukengidila kokwa kusakilwa basapudi bavule mu ntanda ingi. Tutu umo otwadi nandi mu kipwilo kya ludimi lwa batumama mu Jampani wavilukidile mu Myamar. Nansha byotwadi na kalupeto katyetye, netu twavilukile mu Kweji 5, 2010. Batutu ne bakaka ba mu Myamar betutundaile na nsangaji!” Lelo i mumone namani mwaba wa ludimi lwa batumama wa mu Myamar? Unena’mba, “Mudi bantu bavule basangela. Potutadijanga mavideo a mu ludimi lwa batumama, atulumujanga benē njibo babitwi. Twi basangale pa kukwata buno butyibi bwa kwingidila Yehova kuno kuntu!”

Lelo ba Jumpei ne Nao bekwatakenye namani mu myanda ya lupeto? Unena’mba, “Myaka isatu pa kupita’po, twashele na kalupeto katyetye, kadi ketwadipo na lupeto lubwane lwa kufutyila njibo mu mwaka ulonda’ko. Ami ne wami mukaji twalombele bininge. Amba tutulumuke, twatambula mukanda utamba ku bilo ya musambo witulombola kwingila bu bapania ba pa bula ba kitatyi kityetye! Twakulupile mudi Yehova, kadi twamwene amba udi netu. I mwitukwatakanye mu miswelo yonso.” Panopano, ba Jumpei ne Nao nabo bakafundile Masomo a Basapudi ba Bulopwe.

Lelo i kika kyalengeje Simone, tutu wa myaka 43 wa mu Itadi, ne wandi mukaji Anna, kaka wa myaka 37 wa mu Nuvele-Zelande bavilukile mu Myamar? Anna ulondolola’mba, “I nsekununi ya mu Annuaire 2013 isambila pa Myamar!” Simone nandi unena’mba: “Kwiya mu Myamar, i dyese dya binebine. Muno būmi i bupēla, kadi mpityijanga kitatyi kivule mu mwingilo wa Yehova. I kisangaja’po kashā kwimwena muswelo witukwatakanya Yehova potwingidila mu mwaba musakilwa basapudi bavule.” (Ñimbo ya Mitōto 121:5) Anna unena’mba: “Ngidi na nsangaji yonadi nkyaikele nayo kashā. Tudi na būmi bupēla. Pano mpityijanga kitatyi kivule na wami mulume, kadi tubapwana bininge. Ne kadi twi basokole balunda bayampe bapya. Bantu kebasañunangapo Batumoni, kadi muswelo obasangela musapu i utulumuja!” Namani?

Anna unena’mba: “Difuku dimo, nasapwidile muntu umo ufunda ku iniveleshite wadi pa nsoko, kupwa twelaya kwitana nandi monka. Ami pa kumujokela, nandi waita’po ne mulunda nandi umo. Pa kwenda’ko monka, bavudila’ko. Kupwa, bebwejeja’ko monka. Pano nefundanga’ko batano batuntulu.” Simone unena’mba: “Bantu ba mu mwaba badi biyampe kadi basakanga kuyuka myanda mivule. Bavule basangelanga. Inoko tubulwanga kitatyi kya kujokela bonso basangela.”

Ino le i bika bifwaninwe kutebwa’ko mutyima pa kukwata butyibi bwa kuvilukila mu Myamar? Mizuho, wa mu Jampani, unena’mba: “Ami ne wami mulume Sachio, twadi twabilanga nyeke kukengidila mu ntanda musakilwa basapudi bavule​—ino mu ntanda’ka? Pa kutanga nsekununi ya mu Annuaire 2013 isambila pa Myamar, twatengelwe bininge na myanda mimweke ikunka mutyima mine yetulengeje tulanguluke  shi netu tubwanya kukengidila mu Myamar.” Sachio ubweja’ko amba: “Twakwete butyibi bwa kwenda mu Yangon, kibundi kikatampe kya mu Myamar, kukalonga’mo yenga mutuntulu mwanda wa kubela ntanda. Ano’tu mafuku matyetye otwalongele’mo etunekenye amba tufwaninwe kuvilukila muno.”

Rodney ne wandi mukaji Jane, ba mu Ostrali, abo bonso ba myaka 50 ne musubu, ne wabo mwana mwana-mulume Jordan, ne Danica, wabo mwana mwana-mukaji bakengidile kokwa kusakilwa basapudi bavule mu Myamar tamba mu 2010. Rodney unena’mba: “Twatengelwe bininge na kyumwa kya myanda ya ku mushipiditu kyadi na bantu. Nakankamikile ne bisaka bikwabo bitompe kukengidila mu mwaba udi pamo bwa Myamar.” Mwanda waka? “Mwanda kino i kilengeje kisaka kyetu kikale kikomo ku mushipiditu! Bankasampe bavule bapityijanga kitatyi kivule na kukaya na matelefone, kunanga na myotoka, kwingila twaji, ne bikwabokwabo. Ino betu bana bapityijanga kitatyi na kwifunda bishima bipya bya kwingidija mu busapudi. Befundanga mwa kulangulukila na bantu kebayukilepo myanda ya mu Bible ne mwa kulondolwela ku kupwila, kadi bavuijanga ne mingilo mivule ya ku mushipiditu isangaja.”

Oliver, tutu wa myaka 37 wa mu États-Unis, ulombola kine kyasangedile uno mwingilo amba: “Kwingidila Yehova ku kifuko kingi kudi na byabuyabuya bivule. Kuviluka kwetu kwaunkweshe ngikale na kikulupiji ne kukulupila Yehova nansha shi natanwa mu ngikadilo’ka. Kwingila pamo na bantu boketwadipo twiyukile nabo dibajinji inoko botudi nabo nkulupilo imo i kunkwashe bya binebine njingulule amba i kutupu kintu nansha kimo mu ino ntanda kidingakene na mvubu ya Bulopwe bwa Leza.” Dyalelo, Oliver ne wandi mukaji Anna, bakyendelela kwingila na bupyasakane mu mwaba wa ludimi lwa Kishinwa.

Trazel, kaka wa myaka 52 wa mu Ostrali, wakengidile mu Myamar tamba mu 2004. Unena’mba: “Ku boba badi na mukenga, nebasakila bakengidile kokwa kusakilwa basapudi bavule. Ne mwimwene amba, shi udi na mutyima wa kwingila, nabya Yehova nandi ukakwesela pa bukomo bolonga. Nkyadipo mfwatakanya nansha dimo amba mbwanya kwikala na buno būmi. I mpalo mikatampe kadi ngidi na būmi bwa nsangaji bonkyadipo mfwatakanya.”

Tulomba’mba bino binenwa bikunka mutyima bya boba bengidila kokwa kusakilwa basapudi bavule mu Myamar bikukankamike ulangulukile pa muswelo wa kukwasha bantu ba mityima myoloke badi mu myaba kemwasapwilwe. Bine, boba bengidila kokwa kusakilwa basapudi bavule betanga’mba, “Tubemwisāshila, abukilai mu Myamar mwitukwashe’ko!”