“Polombela, kokanena bintu bimo byonka wadi’mo kodi’mo.”​—Mateo 6:7.

Yehova ketusakilangapo kupituluka mu milombelo mikwatyile pa mutwe nansha kutanga’yo mu dibuku dya milombelo. Ino usakanga twisambe bitamba ku mutyima. Fwatakanya’po bidi mobikakusanshila shi udi na mulunda ukupitulukila’nka mu binenwa bimo byonka difuku ne difuku. Balunda bayampe besambanga patōkelela kadi pampikwa budimbidimbi. Kitatyi kyotulombela mu byetu bishima, tulombolanga Tata wetu wa mūlu myanda itutala.

“Pomulombanga, kemutambulangapo, mwanda mulombanga na milangwe mibi.”​—Yakoba 4:3.

Na bubine, ketukatengelapo Leza alondolole milombelo yetu, shi tumulomba bintu byotuyukile amba ketusakilangapo kulonga’byo nansha kwikala nabyo. Kimfwa, le Yehova ukalondolola muntu ukaya makayo a kwidya lupeto ulomba amwesele, aye papo mwitupeleje kwikala na makomwa-meso ne kukulupila mu kabutyibutyi ka amba twi beselwe? (Isaya 65:11; Luka 12:15) Bine, ketubwanyapo kutengela Yehova alondolole ino milombelo! Pa kusaka’mba Leza alondolole kitatyi kyotumulomba, tufwaninwe kukulupila’mba milombelo yetu ikwatañene na byobya byaetusapwila mu Bible.

 “Yewa upela kwivwana bijila​—enka ne milombelo yandi i ya munyanji.”​—Nkindi 28:9.

Mu bitatyi byāsonekelwe Bible, Leza kādipo ulondolola bantu bapela bijila byandi byoloke. (Isaya 1:15, 16) Leza kalamukilepo. (Malaki 3:6) Shi tusaka Leza alondolole milombelo yetu, tufwaninwe kulonga bukomo bwa kukōkela bijila byandi. Ino le bikekala namani shi twalongele bintu bibi pa kala? Le ko kunena’mba Yehova kaketwivwanapo nansha dimo? Mhm! Leza uketulekela na buswe shi twalamuke ne kulonga bukomo bwa kumusangaja.​—Bilongwa 3:19.