Mupolofeto Mosesa wānenene amba shi tukōkele mbila ya Leza, nabya Leza uketwesela. (Kupituluka mu Bijila 10:13; 11:27) Ketukōkelangapo Leza mwanda’tu wa kutyina kwitupa mfuto. Ngikadila miyampe ya Leza itulengejanga tumukōkele mwanda tumusenswe, kadi ketusakengapo kulonga bintu bimufītyija mutyima. “Buno namino bo buswe bwa Leza, amba tulame mbila yandi.”​—1 Yoano 5:3.

Le kukōkela Leza kwituletelanga madyese namani? Twisambilei pa miswelo ibidi.

“Ami Yehova, ne Leza obe, Mwine ukufundija mwanda wa kamweno kobe, . . . ukwendeja mu dishinda dyofwaninwe kwenda.”​—ISAYA 48:17.

Yehova Leza, Umpangi wetu, wituyukile kadi witupanga bulombodi botusakilwa. Shi tusaka bufundiji bwandi bwitukwashe tukwate butyibi bwa tunangu, tufwaninwe kwifunda Bisonekwa Bijila mwa kuyukila byobya bitusakila Leza kulonga, kupwa twebingidija.

“Ba nsangaji i boba bevwana mwanda wa Leza ne kwiulama!”​—LUKA 11:28.

Dyalelo, bantu midiyo ne midiyo bakōkela Kinenwa kya Leza badi na nsangaji ya bine. Kimfwa, twisambilei bidi pa mwana-mulume umo wa mu Eshipanye, mwine wadi keje kuloba kadi ususula bakwabo, kubadila’mo ne wandi mukaji. Difuku dimo watangile bilembwa bya mupolofeto Mosesa bīsambila pa ngikadila ya kutalala ya Yosefa, mwanā Yakoba. Yosefa bāmupoteje bu umpika, kadi bamukuta pampikwa mwanda; inoko wāikele nyeke utalala, wa ndoe kadi ulekela bakwabo. (Ngalwilo, shapita 37-45) Uno mwana-mulume wa mu Eshipanye unena’mba: “Kulangulukila pa kimfwa kya Yosefa kwaunkweshe ngikale na ngikadila ya kutalala, kanye, ne kwīfula. Kadi pano ngidi na būmi bwa nsangaji.”

Bisonekwa Bijila bitulombolanga bintu bivule bya kulonga mwa kwikadila biyampe na bakwetu. Tukesambila bininge pa bino bintu mu kishinte kilonda’ko.