Bantu bavule bapelanga Leza mwanda bamutopekanga’mba i aye wibasusula.

Bendeji bavule ba bipwilo bafundijanga patōkelela nansha mu muswelo mufyame amba, Leza ye ulengeja masusu otususuka. Kimfwa, bamo banenanga’mba:

• Bimpengele bya kipangila i mfuto itamba kudi Leza.

• Bana bafwanga mwanda Leza usakilwa bamwikeulu bavule momwa mūlu.

• Leza wielanga mu mavita, kintu kine kileta masusu makatampe.

Ino le bibwanika bendeji ba bipwilo bavubakenye Leza myanda ya bubela? Le shi Leza kebetabijepo le?

Leza kalengejangapo masusu otususuka.

Shi wadi ulengeja’o, longa kebyadipo bya kwitana na ngikadila yandi itelelwe mu Bible. Kimfwa:

“Mashinda andi onso [a Leza] i moloke. . . . Aye i moloke kadi moloke swā.”​—KUPITULUKA MU BIJILA 32:4.

“Kebibwanikapo Leza wa bine kulonga bintu na nshikani, nansha Mwinē Bukomo Bonso kulonga bibi!”​—YOBA 34:10.

“Mwinē Bukomo Bonso kanyengakanyangapo boloke.”​—YOBA 34:12.

Leza ketabijepo bipwilo bimuvubakenya myanda ya bubela.

Mu bino bipwilo mubadilwa ne byoba bifundija’mba Leza ye ulengeja masusu otususuka, ne byobya biela mu mavita ne ñuma.

“Bapolofeto’bo banenanga bupolofeto bwa bubela mu dijina [dya Leza]. Nkibatuminepo nansha kwibasoñanya nansha kwisamba nabo. Bupolofeto bobanena kodi i kimonwa kya bubela . . . kadi i bongojani bwa mityima yabo.”​—YELEMIA 14:14.

Yesu wātopekele buzazangi bwa bipwilo.

“Ke muntupo ense wa kunena ami amba, ‘Mfumwami, Mfumwami,’ ukatwela mu Bulopwe bwa mūlu, poso’nka yewa ulonga kiswa-mutyima kya Tata udi mūlu. Bavule bakanena mu dyodya difuku amba: ‘Mfumwetu, Mfumwetu, le ketwadipo tunena bupolofeto mu dijina dyobe, tupanga bandemona mu dijina dyobe ne kulonga bilongwa bya bukomo mu dijina dyobe?’ Ino ami nami nkebalombola’mba: ‘Nkimuyukilepo nansha dimo! Ntalukei papo, banwe ba kujilula bijila!’”​—MATEO 7:21-23.