Bepēne Abo Bene na Mutyima Tō—Mu Meksike

BINE kisangaja’po kashā pa kumona mwenda muvudila kibalwa kya bankasampe Batumoni bapēleja’ko bwabo būmi mwanda wa kutandabula mwingilo wabo wa bwine Kidishitu. (Mat. 6:22) Le i kushinta’ka kobalongele? Balwanga na makambakano’ka? Pa kuyuka kino tutalei bamobamo bengila uno mwingilo mu Meksike.

“TWADI TUSAKILWA KUSHINTA”

Dustin ne wandi mukaji Jassa ba mu États-Unis besongele mu Kweji 1, 2007. Kyaba kityetye pa kupita’po, bapotele kintu kyobadi bakimba myaka na myaka—ke kyombo kadi, bashikata’mo kintu kya mwaka mutuntulu. Kyombo kyabo kyadi kīmene kubwipi na Astoria, mu Orégon, États-Unis, kibundi kya nkuo kijokolokelwe na mikuna ya mató ne ngulu isonsa mashika, kidi kubwipi na Dijiba dya Pasifike. Dustin unena’mba, “Konso koela meso kusangaja!” Bano ba mulume ne mukaji badi bamwene’mba, badi mu būmi bupēla, bakulupile mudi Yehova. ‘Nansha nankyo,’ padi badi balanga’mba, ‘tudi mu kyombo kya mametele 7.9, twingilanga mu bula bwa kitatyi kibwanine, tupwilanga mu kipwilo kya ludimi lweni, kadi twingilanga bu pania mukwashi kitatyi kimokimo.’ Kitatyi kampanda pa kupita’po, bamwene amba badi beongola. Dustin unena’mba: “Pa kyaba kya kukwatakanya kipwilo twadi tupityija kitatyi kilampe na kulongolola kyetu kyombo. Ino twadi tuyukile’mba shi tusaka kubadikija Yehova mu būmi bwetu, twadi tufwaninwe kushinta.”

 Jassa nandi unena’mba: “Kumeso kwa kusongwa nadi nshikatanga mu Meksike monadi mpwila mu kipwilo kya ludimi lwa Angele. Nasangedile mpata kwingidila mwine’mwa, kadi nadi nkimba kujokela’ko.” Pa mwanda wa kutamija kyumwa kya kusaka kukengidila mu ntanda ingi, Dustin ne Jassa bakwete’ko mpangiko mu butōtyi bwabo bwa kisaka ya kubandaula mānga ya batutu ne bakaka bavilukile ku madimi asakilwa mwangulo. (Yoa. 4:35) Dustin unena’mba: “Twasakile netu kwimwena ino nsangaji.” Kitatyi kyebalombwele balunda nabo amba mu Meksike mubabundwa kisumpi kipya, kadi kisakilwa bukwashi, kino kyavulwije ba Dustin ne Jassa kukanina kwabo. Baleka kaji, bapoteja kyombo kyabo, ne kuvilukila mu Meksike.

“KINTU KILUMBULUKE KYOTWADI KETWAMWENE KASHĀ”

Dustin ne Jassa bavilukila mu kibundi kya Tecomán—kidi kubwipi na dijiba dya Pasifike ino mu makilometele kubwipi kwa  4345 kunshi kwa Astoria. Dustin unena amba, “Kuno ako i kutupu ngulu ne mashika. Kudi’ko kyanga kikomo kadi tumona’ko’nka mityi ya matunda.” Ku ngalwilo byadi bikomo kusokola kaji. Mwanda wa kubulwa lupeto badi badya’nka mutyele ne nkunde lubanga ne kyolwa, kadi yenga ne yenga. Jassa unena’mba, “ino kitatyi kimo twadi tumona bu nkunde ne mutyele bibetutonda, bantu botwadi twifunda nabo Bible bashilwile kwituletela myembe, makonde, ne mapapai, ne mifuko miyule matunda!” Mwenda mafuku bano ba mulume ne mukaji basokwele kaji ku masomo emanine kufundija ludimi lwa Kitaiwan pa Entelenete. Lupeto lobatambulanga pano ku kano kaji lwibakwashanga bavuije bisakibwa byabo bya difuku ne difuku.

I muswelo’ka wiivwana ba Dustin ne Jassa pa būmi bwabo bupya? Banena’mba: “kuno kuviluka i kintu kilumbuluke kyotwadi ketwamwene kashā. Kipwano kyetu na Yehova ne kipwano kyetu umo ku mukwabo kibatyita kupita mafuku kunyuma. Mafuku onso tuloñanga bintu byonso pamo—kutambila mu mwingilo wa busapudi, kwisamba mwa kukwashisha bifundwa byetu bya Bible, ne kuteakanya kupwila. Pano kadi ketukikambakanibwangapo bininge pangala pa mitabakano ya umbūmi na kala.” Babweja’ko amba: “Pano tubaivwanija mwanda oketwadipo twivwanije biyampe tamba kala—bubinebine butala mulao udi mu Mitōto 34:8, wa’mba, ‘tompai mumone’mba Yehova i muyampe.’”

TUNUNU NE TUNUNU TWA BENGIDI BAKWITUMA ABO BENE—LELO I KIKA KIBATONONA?

Batutu ne bakaka kupita pa 2900—besonge ne bankunga, bavule badi na myaka 20 ne 30—bavilukile kukengidila mu myaba ya mu Meksike musakilwa basapudi ba Bulopwe bavule. Mwanda waka  bano Batumoni i batonge kwingila uno mwingilo mukomo? Kitatyi kyaipangwilwe bamo umbukata mwabo kino kipangujo, baletele bubinga busatu. Lelo i bubinga’ka?

Mwanda baswele Yehova ne bantu bakwabo. Leticia wabatyijibwe na myaka 18. Unena’mba: “Kitatyi kyonepēne kudi Yehova naivwanije amba kino kishintulula kumwingidila na mutyima wami onso ne muya wami onso. Pa kusaka kulombola’mba nswele Yehova na mutyima onso, nadi nsakilwa kupityija kitatyi ne bukomo buvule mu mwingilo wandi.” (Mako 12:30) Hermilo, mulumya Leticia, wadi na kintu kya myaka 20 kitatyi kyavilukile kokwa kusakilwa basapudi bavule ba Bulopwe. Unena’mba: “Naivwanije’mba kukwasha bakwabo na kuvuija bisakibwa byabo bya ku mushipiditu wadi muswelo muyampe wa kulombola’mba nebasenswe.” (Mako 12:31) Waviluka mu kibundi kiyampe kya Monterrey mwaadi wingila ku banki, kadi na būmi buyampe, inoko waenda mu kakibundi katyetye.

Mwanda wa kwimwena nsangaji ya bine ne yaendaenda. Mafuku matyetye pa kupwa kubatyijibwa, Leticia waendele na kaka umo pania wa bwino mu kibundi kya mufula mobasapwile mu bula bwa kweji mutuntulu. Leticia uvuluka’mba: “Kudi kintu kyonatendele mpata. Nasangele mpata pa kumona muswelo wadi witaba bantu ku musapu wa Bulopwe otwadi twibasapwila. Potwafikile ku mfulo kwa mwine kweji’wa, nafikile ne mu kwineneja’mba, ‘Kino’ki kyo kitungo kinekine mu būmi bwami!’” Essly, kaka umo nkungakaji wa myaka isenselela ku 20, nandi wemwenine ino nsangaji, yo yamulengeje nandi akengidile kokwa kusakibwa basapudi bavule. Kitatyi kyadi ku masomo, wadi witana na Batumoni bapyasakane bavule badi bengidila kokwa kusakilwa basapudi bavule. Unena’mba, “Pa kumona nsangaji yadi na bano batutu ne bakaka, nami nakokelwe’mba, ngikale na būmi bwiifwene na bwabo.” Kadi i bakaka bavule balongele na mwalongele Essly. Mu Meksike bakaka bakungakaji 680 ne kupita bengidilanga kokwa kusakilwa basapudi bavule. Bine i kimfwa kiyampe mpata ku bankasampe ne ku batame bene!

Mwanda wa kwikala na būmi budi na kitungo kadi busangaja. Upwa’tu masomo, Essly watambwile mukanda wa kufutyilwa inivelesite. Bakwabo badi bamukankamika etabije ne kulondalonda bobamona bu “būmi buyampe”—kutambula dipolome dya inivelesite, kaji, motoka, ne kunanga. Ino aye, kalondelepo madingi abo. Essly unena’mba: “Namwene ne balunda nami bavule bene Kidishitu balondalonda bino bintu, kadi namwene’mba bitungo bya ku mushipiditu kebadipo bebikwete na bulēme kutabuka. Kadi namwene’mba kwenda kobadi benda batokenena mu bya ino ntanda kwebafikije mu kutanwa na makambakano mavule kutabuka. Nsaka kwingidila Yehova ne pa mfulo mu bunkasampe.”

 Essly wafundile’ko mu myeji mityetye masomo a ntentekelo, amukweshe asokole kaji ka kumukwasha na lupeto pakengila bu pania kokwa kusakibwa basapudi ba Bulopwe bavule. Kadi wadi na makambakano pa kwifunda ludimi lwa benē kibundi kwaendele, lwa Otomi ne Tlapaneco. Pano uvuluka myaka isatu yakasapwile ku ntanda kalubwanga, unena’mba: “Kwingidila kokwa kusakilwa basapudi bavule kwaundetele nsangaji mivule kadi pano būmi bwami namone’mba budi na kitungo. Kadi kutabukidila, kipwano kyami na Yehova kibababaila’ko.” Phillip ne Racquel, ba mu États-Unis badi na myaka isenselela ku 30 banena’mba. “Ntanda ishintanga lubilolubilo kadi bantu bavule i betabije’mba, būmi bwabo budi’nka bwa mantanki a mema. Ino kwingidila kokwa kotutana bavule betabija musapu wa mu Bible kwitukwasha tumone’mba būmi budi na kitungo. I kintu kisangaja’po kashā!”

MUSWELO—WA KUNEKENYA MAKAMBAKANO

Inoko kwingidila kokwa kusakilwa basapudi bavule ba Bulopwe nako kwikalanga ne bikoleja. Kimfwa mwa kumwena lupeto lwa kuvuija nalo bisakibwa bimobimo. Kadi padi ukasakilwa kushinta bibidiji bimobimo mwanda bikwatañane na kokengidila’kwa. Verónica, pania ke mwije wanene’mba: “Ku kibundi kimo konaingidile, nadi nteka ne kupoteja bidibwa bya lubanga bya bei mityetye. Ku kibundi kikwabo, nadi mpoteja mbwija ne kubanda bantu nywene. Ino kuno kondi nkolopanga njibo, ne kufundija kalasa ka bambutwile bapya, nebafundija mwa kwiivwanikila na babo bana.”

Kulonda bibidiji ne bishiyekulu bya bakwabo kukokeja kwikala kukomo mpata kitatyi kyoshikete na bene kibundi. Kino’kyo kyafikile ba Phillip ne Racquel kitatyi kyobakasapwile mu mwaba munenwa ludimi lwa Nahuatl. Phillip unena’mba: “Twadi beshile bibidiji bikomo.” Le i bika byebakweshe bashinte? “Twadi tutala bintu bilumbuluke bidi mu bene Nahuatl—kipwano mu byabo bisaka, ke bavudile bya buzazangi, kadi badi na buntu.” Racquel nandi unene’mba: “Mafuku otwashikete’ko, kadi ne kwingidila pamo na batutu ne bakaka ba mu kine kibundi’kya, kwetufundije bintu bivule.”

MWA KWITEAKENYA

Shi usaka kwenda kukengidila kokwa kusakilwa basapudi bavule, le i bika byofwaninwe kulonga pano mwanda wa kwiteakanya? Batutu ne bakaka ke beje mu uno mwingilo banena’mba: Kumeso kwa kuviluka shilula bidi na kupēleja bobe būmi ne kwifunda kusangela byodi nabyo. (Fid. 4:11, 12) Le i bika bikwabo byosakilwa kulonga? Leticia unena’mba: “Nkyadipo nsaka kaji ka ntanda kalomba kushikata pamo kitatyi kilampe. Nadi nsaka kwikala na bwana pabo bwa kwenda kitatyi kyo-kyonso—kadi kwenda konso konsakile.” Hermilo nandi’mba: “Nefundile kuteka, kukenda ne kukoma.” Ino aye Verónica’mba: “Ponakidi kwetu na bambutwile ne banabetu, nefundile kuteka bidibwa bya bei mityetye, abyo’ko byubaka ngitu. Kadi nefundile kulea.”

Levi ne Amelia ba mu États-Unis besonge pano ke padi myaka mwanda basekununa muswelo webakweshe milombelo mipotoloke beteakanye mwa kukengidila mu Meksike. Levi’mba: “Twapikwile lupeto lotwadi tukokeja kwingidija mu bula bwa mwaka mutuntulu mu ntanda bene, kupwa twalombele Yehova etukwashe mwa kusokwela luno lupeto.” Mu bula bwa myeji mityetye, basokwele kino kibalwa kya lupeto kyobalombele, ne kwija kwine mpika aba baviluka. Levi kadi’mba: “Yehova walondolwele ku ino milombelo yetu mipotoloke, netu twalongele’nka motwamulaile.” Amelia nandi ubweja’ko’mba: “Batwe twadi tulanga’mba tukalonga’ko’tu mwaka umo kete, ino pano ke myaka isamba-ibidi mituntulu, kadi ne bya kujoka bine ke tukibilañangapo! Kushikata kuno kwetukweshe twimwene batwe bene bukwashi bwa Yehova. Difuku ne difuku twimwenanga buyampe bwandi.”

Ino ba Adam ne Jennifer, ba mulume ne mukaji ba mu États-Unis bengidila mu mwaba wa mu Meksike mwisambwa Angele, nabo bakwashibwe mpata na milombelo. Baleta ano madingi’mba: “Kokelaija’mba’nka ubwanininye byonso. Lombola Leza kusaka kobe kwa kukengidila ku ntanda ingi mu milombelo, kupwa longa bintu kukwatañana na milombelo yobe. Pelēja bobe būmi kupwa lembela musambo wa mu ntanda yosaka kukengidila’mo, ebiya shi ubapu kupikula lupeto, vilukila’mo!” * Shi ulonge namino, nabya ukemwena nsangaji ne byabuyabuya bivule bya ku mushipiditu bikutengele.

[Kunshi kwa dyani]

[Kifwatulo pa paje 3]

Dustin ne Jassa

[Kifwatulo pa paje 4]

Amelia ne Levi

[Kifwatulo pa paje 4]

Racquel ne Phillip

[Kifwatulo pa paje 4]

Essly

[Kifwatulo pa paje 5]

Leticia ne Hermilo

[Kifwatulo pa paje 5]

Verónica

[Kifwatulo pa paje 5]

Adam ne Jennifer