1, 2. Le i bipangujo’ka bipangulwa pangala pa binenwa bya Yesu bidi mu Mateo 24:14?

YESU wālaile amba mu mafuku a mfulo myanda miyampe ya Bulopwe ikasapulwa ku bantu bonso. (Mateo 24:14) Batwe Batumoni ba Yehova tuyukene ntanda yonso pa mwanda wa mwingilo wa busapudi. Bantu bamo betabijanga musapu otusapula, ino bakwabo nabo bapela’o. Ino mu boba bapela, bamo betulēmekele pa mwanda wa uno mwingilo otwingila. Tuyukile amba batwe bo bengilanga mwingilo wālaile Yesu. Le tudi na bubinga bwa kunenena namino? Le tukakulupila namani amba busapudi bwetu o mwingilo wālaile Yesu?

² Bibumbo bivule bya bipwilo binenanga amba nabyo bisapulanga musapu wa Yesu. Inoko basapulanga’nka mu bipwilo, ku televijo, ku Entelenete, nansha’tu kulombola bakwabo mobayukile myanda ya Yesu. Bakwabo balañanga’mba kukwasha balanda na kwikala dokitele, muñanga, nansha bu mwadimu nabyo i muswelo mukwabo wa kusapula. Lelo ino mingilo yonso’i o mwingilo wa busapudi wēsambile’po Yesu?

3. Mungya Mateo 28:19, le i bintu’ka biná bifwaninwe kulonga balondi ba Yesu?

 ³ Lelo Yesu wādi usaka bandi bana ba bwanga belaije bantu bēye kobadi? Mhm! Yesu pa kupwa kusanguka, wāsapwidile tutwa na tutwa twa balondi bandi amba: “Nanshi, endai mukalonge bana ba bwanga mu bantu ba ku mizo yonso, mwibabatyijei . . . , mwibafundijei kulama byonso byonemusoñenye.” (Mateo 28:19, 20) Byotudi balondi ba Yesu, tunenwe kulonga bintu biná. Tufwaninwe kulonga bana ba bwanga, kwibabatyija, ne kwibafundija. Inoko kibajinji, tufwaninwe kwenda ku bantu. Mwifundi umo wa Bible unena’mba: “Kwenda i kiselwa kya bonso betabije, mwikale mu bipito nansha mu tulunga-lui.”—Mateo 10:7; Luka 10:3.

4. Le kwikala “biluwe bya bantu” kulomba bika ne bika?

⁴ Le Yesu wādi usaka bandi bana ba bwanga balonge bika? Le wādi wibasakila basapule’tu mobasakila’ni nansha wādi usaka bekale mu bisumpi biteakanibwe? Byobidi bikomo ku muntu umo kusapula “ku mizo yonso,” nanshi bandi bana ba bwanga bādi bafwaninwe kwikala mu bisumpi biteakanibwe. Ye byādi bisaka kunena Yesu paāityile bandi bana ba bwanga bekale “biluwe bya bantu.” (Tanga Mateo 4:18-22.) Yesu kādipo wisambila pa kiluwe umo uloba na bulobo ne kyambo, ukungile keta kāye kadīle. Ino, buluwe bwēsambīle’po Yesu, i bwa kwingidija manda. Buno buluwe bulomba kwingila bininge, kuteakanya bintu, ne kwingila na bantu.—Luka 5:1-11.

5. Le i bipangujo’ka biná byotufwaninwe kwiipangula, ne mwanda waka?

⁵ Pa kuyuka bene basapula myanda miyampe dyalelo, i biyampe twiipangule bino bipangujo biná:

• I musapu’ka ufwaninwe kusapula balondi ba Yesu?

• Le bafwaninwe kutononwa na bika?

• I manwa’ka obafwaninwe kwingidija?

• Le bafwaninwe kufika ne kwepi na mwingilo wabo ne kwingila’o kufika ne kitatyi’ka?

Malondololo a bino bipangujo aketukwasha tujingulule bene bengila uno mwingilo upandija būmi ne kuningija mutyima wetu wa kwendelela kusapula.—2 Temote 4:16.

6. Mwanda waka ukulupile amba Batumoni ba Yehova basapulanga musapu wa bine?

⁶ Tanga Luka 4:43. Yesu wādi usapula “myanda miyampe ya Bulopwe,” kadi usaka bana bandi ba bwanga basapule’yo nabo. Le i kisumpi’ka kya bantu basapula uno musapu ku bonso? I enka Batumoni ba Yehova kete! Nansha ke boba betushikilwe bene betabije uno mwanda. Kimfwa, tala mumpe umo washikete mu matanda mavule byaasapwidile Kamoni umo wa Yehova. Mu ntanda yonso mwaashikete wadi wipangula Batumoni ba Yehova i musapu’ka obasapula. Mumpe’wa unena’mba, “Bonso badi bendalale, balondolola’nka bimo amba: ‘I myanda miyampe ya Bulopwe.’” Bino binenwa bya mumpe kebilombolapo amba tudi bendalale ino bibingija amba batwe twi bene Kidishitu ba bine bekutyile umbumo. (1 Kodinda 1:10) Kadi Bulopwe bwa Leza o musapu wimanine’po dipepala Kiteba kya Mulami Kisapula Bulopwe bwa Yehova. Dino dipepala ditampwanga buvule bwa makopi kubwipi kwa 59 000 000, mu ndimi 254 ku nimelo ne nimelo, ne kino kyo kilengeje dikale bu dibajinji ku buvule ntanda yonso!

7. Le tubayuka namani amba bendeji ba bipwilo bya kine Kidishitu kebasapulangapo musapu wa bine?

⁷ Bendeji ba bipwilo bya kine Kidishitu kebasapulangapo myanda ya Bulopwe bwa Leza. Shi besambila pa Bulopwe, bavule banenanga’mba budi mu mutyima wa muntu. (Luka 17:21) Kebafundijangapo bantu  amba Bulopwe i umbikalo wa mūlu uludikwa na Yesu. Bavudile kwisambila padi Yesu kitatyi kya Noele ne kya Pasaka. Kebashintulwilangapo bantu amba Bulopwe bwa Leza bukapwija makambakano onso a bantu ne amba panopano ponka busa kutalula’ko bibi byonso pano pa ntanda. (Kusokwelwa 19:11-21) I kimweke patōka’mba bendeji ba bipwilo bya kine Kidishitu kebayukilepo bilonga Yesu padi bu Mulopwe wa Bulopwe bwa Leza. Kadi byokebayukilepo musapu wa Yesu, o mwanda kebayukilepo ne kine kyobafwaninwe kusapwila.

8. I kintu’ka kibi kekifwaninwepo kutonona muntu engile mwingilo wa kusapula?

⁸ Bana ba bwanga ba Yesu kebafwaninwepo kusapula mwanda wa kumona lupeto nansha kūbaka mobo atulumuja. Yesu wānenene amba: “Mubatambula ku bitupu, nenu pānai ku bitupu.” (Mateo 10:8) O mwanda mwingilo wa busapudi keufwaninwe kwikala bwa busunga. (2 Kodinda 2:17) Bana ba bwanga ba Yesu kebafwaninwepo kulomba bebafute pa mwanda wa mwingilo wa busapudi. (Tanga Bilongwa 20:33-35.) Nansha uno musoñanya wa Yesu byoudi’tu padi tō, ino bipwilo bivule i bilabikwe na mukongo wa lupeto mwanda wa kulama bipwilo byabo ne kufuta bendeji ne bengidi babo. Mfulo mfulō, bendeji bavule ba bipwilo abapeta bininge.—Kusokwelwa 17:4, 5.

9. Le Batumoni ba Yehova i balombole namani amba badi na kintu kiyampe kibatonona basapule?

⁹ Le Batumoni ba Yehova nabo baloñanga mikongo ku Mobo abo a Bulopwe ne ku bitango? Aa! Mwingilo wabo ukwatakanibwanga na byabuntu bya kwilanga. (2 Kodinda 9:7) Ku mwaka, Batumoni ba Yehova bapityije mansá midiyala ibidi mu kusapula myanda miyampe ne kwendeja bifundwa bya Bible midiyo kitema ne kupita kweji ne kweji. Kebebafutangapo ino bengidijanga na nsangaji lupeto lwabo mwanda wa kusapula. Mukimbi umo wanene pangala pa mwingilo wa Batumoni ba Yehova amba: “Kitungo kyabo kikatampe i kusapula ne kufundija.” Kadi wabwejeje’ko amba Batumoni ba Yehova kebadipo na bakulu ba kipwilo bobafuta. Ino shi ketusapulangapo pa mwanda wa lupeto, pene’pa i kika kitutonona tusapule? Tusapulanga na mutyima tō mwanda tusenswe Yehova ne bantu. Kino kifikidijanga bupolofeto budi mu Ñimbo ya Mitōto 110:3. (Tanga.)

10. Le i manwa’ka āingidije Yesu ne bandi bana ba bwanga pa kusapula?

¹⁰ Le i manwa’ka āingidije Yesu ne bandi bana ba bwanga pa kusapula? Bādi benda konso kutanwa bantu. Kimfwa, bādi basapula mu bipito ne mu mansoko. Bādi bakakimba bantu ne ku mobo abo. (Mateo 10:11; Luka 8:1; Bilongwa 5:42; 20:20) Muswelo muteakanibwe wa kusapwila bantu ba miswelo yonso i busapudi bwa ku njibo ne njibo.

11, 12. Le i bika byotumona shi tubadingakanya bukomo bulonga ba bipwilo bya kine Kidishitu na bobwa bulonga Batumoni ba Yehova pa kusapula myanda miyampe?

¹¹ Lelo bipwilo bya kine Kidishitu bisapulanga myanda miyampe na mwālongele Yesu? Divule, bendeji bafutwa lupeto bo basapwilanga ba mu kipwilo kyabo. Bano bendeji kebaloñangapo bana ba bwanga bapya ino bakimbanga kulama bobadi kala nabo. Kyaba kimo, batompele kukankamika ba mu bipwilo byabo basapule. Kimfwa, mu mwaka wa 2001, Papa Jean Paul II wanene mu mukanda amba bana ba kipwilo bafwaninwe kusapula Evanjile ne kwikala na bupyasakane pamo bwa mutumibwa Polo wanene amba: “Malwa ami shi nkisapwilepo Evanjile.” Kupwa papa wanena’mba uno mwingilo wa busapudi keufwaninwepo kwingilwa’tu enka na bantu batyetye bafundijibwe, ino ufwaninwe kwingilwa na bana bonso ba kipwilo. Inoko, i batyetye kete balondele ano madingi.

¹² Ino Batumoni ba Yehova nabo le? I abo kete basapula amba Yesu uludikanga bu Mulopwe tamba mu 1914. Bakōkele Yesu ne kutūla mwingilo wa busapudi pa kifuko kibajinji mu būmi bwabo. (Mako 13:10) Kitabo kimo (Pillars of Faith—American Congregations and Their Partners) kyanene amba ku Batumoni ba Yehova, kusapula o mwingilo wa mvubu mpata. Kyanene monka amba shi abatana wa nzala, mufudile, nansha ubela bamukwashanga kwampikwa kwilwa kitungo kyabo kya kusapula mfulo ya ino ntanda ne kufundija bantu myanda ya lupandilo. Batumoni ba Yehova bendelelanga kusapula uno musapu ne kwingidija manwa āingidije Yesu ne bana bandi ba bwanga.

13. Lombola bukata bwa mwingilo wa kusapula.

¹³ Yesu wānene amba balondi bandi badi ba kusapula ne kufundija myanda miyampe pa “ntanda yonso ikelwe na bantu.” Wēbasoñenye kulonga bana ba bwanga mu bantu ba “ku mizo yonso.” (Mateo 24:14; 28:19, 20) Kino kishintulula’mba myanda miyampe ifwaninwe kusapulwa ntanda yonso.

14, 15. Mu mwanda utala bukatampe bwa mwingilo, i kika kilombolanga’mba Batumoni ba Yehova bafikidijanga bupolofeto bwa Yesu? (Tala kifwatulo ku ngalwilo.)

¹⁴ Enka Batumoni ba Yehova bo bafikidije bupolofeto bwa Yesu bwa amba myanda miyampe ikasapulwa ntanda yonso. Mwanda waka tubanena namino? Mu États-Unis, mudi bendeji kintu kya 600 000 ba bipwilo bya kine Kidishitu, papo amo Batumoni ba Yehova kintu kya 1 200 000 basapula myanda miyampe mu mine ntanda’ya. Kudi kintu kya bamumpe bene Katolika 400 000 ntanda yonso, inoko koku Batumoni ba Yehova midiyo 8 ne kupita basapula myanda miyampe mu matanda 240. Bine, Batumoni ba Yehova basapulanga myanda miyampe pano pa ntanda ponso, ne kino kitumbijanga Yehova ne kumuletela mitendelo!—Ñimbo ya Mitōto 34:1; 51:15.

¹⁵ Kitungo kyetu batwe Batumoni ba Yehova i kusapula myanda miyampe ku bantu bavule kumeso kwa mfulo kwiya. Pa kwingila  uno mwingilo, twalamunanga ne kulupula midiyo ne midiyo ya bitabo, mapepala, matrakte, ne lwito lwa ku kitango ne lwa ku Kivulukilo mu ndimi 700 ne kupita. Tupanga’byo bantu ku bitupu. Ku mwaka, twalupwile kintu kya mabuku esambila pa Bible midiyala 4 ne kipindi. Kadi twalupwile kintu kya Mabible midiyo 200 a Bisonekwa Bijila—Bushintuludi bwa Ntanda Mipya mu ndimi 130 ne kupita. Kadi diteba dyetu didi mu ndimi 750 ne kupita. Enka Batumoni ba Yehova kete ye bengila uno mwingilo utulumukwa.

16. Le tubayuka namani amba Batumoni ba Yehova badi na mushipiditu wa Leza?

¹⁶ Le uno mwingilo ukengilwa kufika ne kitatyi’ka? Yesu wānene amba myanda miyampe yadi ya kusapulwa kufika’nka ne biya mfulo. Batwe Batumoni ba Yehova twi babwanye kūminina mu mwingilo mu ano mafuku a mfulo, mwanda tudi na mushipiditu ujila wa Yehova. (Bilongwa 1:8; 1 Petelo 4:14) Bantu bamo ba mu bipwilo babwanya kunena’mba amba, “Tudi na mushipiditu ujila.” Ino le i babwanye kwingila mwingilo wingila Batumoni ba Yehova mu ano mafuku a mfulo? Bisumpi bimo byatompele kusapula na motusapwilanga, inoko bakomenwa. Bakwabo badi na mutyima wa kusapula, ino kitatyi kityetye baleka’byo. Bangi nabo babwanya kusapula ku njibo ne njibo, inoko kebasapulangapo myanda miyampe ya Bulopwe. Nanshi kebabwenyepo kwingila mwingilo wāshilwile Yesu.

17, 18. (a) Mwanda waka tukokeja kunena’mba enka Batumoni ba Yehova bo basapula myanda miyampe ya Bulopwe dyalelo? (b) Twi babwanye namani kwendelela na uno mwingilo?

¹⁷ Penepo i bāni basapula myanda miyampe ya Bulopwe dyalelo? I enka Batumoni ba Yehova! Le tubekiyuka namani? Mwanda tusapulanga musapu wa bine, ke myanda miyampe ya Bulopwe kadi. Tusokolanga bantu mu busapudi bwetu, mwanda twingidijanga manwa mayampe. Kudi kintu kiyampe kitutonona tusapule, ke buswe kadi botuswele Yehova ne bantu. Mwingilo wetu i mukatampe bininge mwanda tusapwilanga bantu ba mizo yonso ne ndimi. Kadi tukendelela kusapula myanda miyampe ya Bulopwe enka ne bikafika mfulo!

¹⁸ I kintu kitulumukwa bine pa kumona mwingilo wa kusapula myanda miyampe uvuija bantu ba Yehova mu ano mafuku a mfulo. Ino le twi babwanye namani kwingila uno mwingilo? Mutumibwa Polo ushintulula amba: “Mwanda Leza ye mwine wimukomeja, ne kwimupa mutyima ne bukomo bwa kulonga monka mwaloelelwe.” (Fidipai 2:13) Tulomba Yehova endelele kwitupa bukomo bwa kusapula nyeke myanda miyampe!—2 Temote 4:5.