1. Le tufwaninwe kulonga namani pangala pa lwitabijo lwetu?

 LWITABIJO ke kintupo kidi na bonso. (2 Tesalonika 3:2) Inoko Yehova upānanga’lo ku bonso bamutōta. (Loma 12:3; Ngalatea 5:22) Bine tufwijanga’ko Yehova pa kwitupa lwitabijo!

2, 3. (a) I bika byotumwena mu kwikala na lwitabijo? (b) I bipangujo’ka byotusa kubandaula?

² Yehova wāpēne wandi Mwana muswedibwe amba muntu ense witabija mudi Yesu alekelwe bubi bwandi. Kino i kilengeje bantu bekale balunda na Yehova ne kukekala na būmi bwa nyeke. (Yoano 6:44, 65; Loma 6:23) Bine Yehova i mulombole kanye kotudi! Nansha byotudi ba bubi kadi bafwaninwe lufu, Yehova wāmwene’mba tubwanya kulonga bintu bilumbuluke. (Ñimbo ya Mitōto 103:10) Wetukweshe twifunde myanda miyampe itala Yesu ne kitapwa kyandi. Potwaikele na lwitabijo mudi Yesu ne kumulonda, twashilwile kutengela būmi bwa nyeke!​—Tanga 1 Yoano 4:9, 10.

 ³ Ino i bika bikwabo byotubwanya kwifunda pa lwitabijo? Le kuyuka’tu byobya bitulongēle Leza ne byobya byaketulongela mu mafuku a kumeso, ko kwikala na lwitabijo? Tutalei bintu bikwabo byotufwaninwe kulonga.

4. Shi tudi na lwitabijo, le luketutonona tulonge bika?

⁴ Shi tudi na lwitabijo mudi Yehova ne Yesu, ketukemaninapo’tu’nka pa kuyuka byobetulongēle ne byobaketulongela mu mafuku a kumeso. Ino, i ne kwikala na mutyima wa kwiendeja mu muswelo obetusakila twiendeje. Kadi tudi na kipyupyu kya kukwasha bakwabo nabo bebayuke. Mutumibwa Polo unena’mba: “Shi unene patōkelela kyokya ‘kinenwa monka mu kyakanwa kyobe,’ amba Yesu i Mfumwami, ne kulombola lwitabijo mu mutyima obe amba Leza wamusangwile mu bafwe nabya ukapandanga. Mwanda ku mutyima ko kulombolanga muntu lwitabijo mwanda wa boloke, ino ku kyakanwa ko kunenanga muntu patōkelela mwanda wa lupandilo.”​—Loma 10:9, 10; 2 Kodinda 4:13.

5. Mwanda waka lwitabijo ludi na mvubu, ne i bika byotufwaninwe kulonga pa kwikala na lwitabijo lukomo? Leta kimfwa.

⁵ Bibamweka patōka amba, pa kukekala na būmi bwa nyeke mu ntanda mipya ya Leza, tufwaninwe kwikala na lwitabijo ne kwendelela na kwilukomeja. Lwitabijo ludi pamo bwa kamutyi kakunwe. Pa kusaka’mba kamutyi katame kavwambile biyampe, bilomba kusangila’po nyeke mema. Inoko, shi ketusangila’popo mema mafwaninwe, nabya kakafumba ne kuma. Muswelo umo onka, tufwaninwe kutadija shi lwitabijo lwetu i ‘lukomo’ ne shi “lwendanga lutamina’ko.”—Tetusa 2:2; 2 Tesalonika 1:3; Luka 22:32; Bahebelu 3:12.

6. Le Bahebelu 11:1 ushintulula lwitabijo mu miswelo’ka ibidi?

⁶ Mu Bahebelu 11:1, Bible ulombola’mo mushintulwila lwitabijo. (Tanga.) (1) Lwitabijo i “kutengela na kikulupiji byobya byokulupile.” Mu bintu ‘byotukulupile’ mudi ne milao ya Leza ya mu mafuku a kumeso. Kimfwa, tukulupile’mba bibi bikatalulwa’ko ne amba kukekalanga ntanda mipya. (2) Lwitabijo i “kilomboji kimweke patōka,” nansha kikulupiji kya bine, “kya bintu bya bine byampikwa kumweka.” Tuyukile amba Yehova Leza, Yesu Kidishitu, ne bamwikeulu badi’ko nansha byoketukokejapo kwibamona, kadi ne Bulopwe bwa mūlu nabo budi’ko nansha byokebumwekapo. (Bahebelu 11:3) I muswelo’ka otukalombola na bubine’mba tudi na lwitabijo mu milao ya Leza ne mu bintu byoketukokejapo kumona? Tuloñanga kino kukwatañana na muswelo otwiendeja mu būmi, kupityila ku byotunena ne byotulonga.

7. Le kimfwa kya Noa kitukwasha namani twimvwanije mushintulwila kwikala na lwitabijo? (Tala kifwatulo ku ngalwilo.)

⁷ I bika byotwifunda ku lwitabijo lwa Noa? Mutumibwa Polo wānenene amba Noa, “pa kupwa kudyumunwa na Leza ku bintu byādi kebyamwekele, wālombwele amba wakaminwe Leza ne kūbaka safina mwanda wa kupandija ba mu njibo yandi.” (Bahebelu 11:7) Noa byaādi na lwitabijo mu myanda yāmusapwidile Yehova, wāūbakile ino safina mikatakata. Padi balondakani nandi ye bano bādi bamwipangula kine kyaūbakila safina. Tuyukile’mba Noa kādipo ūbile talala. Bible unena’mba Noa wādi “musapudi wa boloke.” (2 Petelo 2:5) Wādyumwine bantu amba Leza usa kuleta dilobe mwanda wa  konakanya babi. Padi ye uno wēbasapwidile enka byobya byāmulombwele Yehova, amba: “Kubapu; mfulo ya bonso ba bu-ngitu ibafika kuno ko ndi. Mwanda ntanda i mikabakane’tu na kampata pa mwanda wabo,” ne amba, “Ami ke nsa kuleta dilobe dya mema panopantanda dyakonakanya bonso ba bu-ngitu, badi ne muya wa bumi monka mwabo ba munshi mwa diulu; kadi bintu byonsololo muno munshi bikafwanga.” Kupwa Noa wādi ufwaninwe kushintulwila bantu bya kulonga pa kupanda. Yehova wāmusoñenye’mba: “ukatwelamo mu safini.”​—Ngalwilo 6:13, 17, 18.

8. Le i bika byānenene Yakoba pa lwitabijo?

⁸ Yakoba nandi wāsonekele pa mwikadile lwitabijo. Wāsonekele’tu kinondanonda na kupwa kwa mutumibwa Polo kusonekela Bahebelu. Yakoba wāsonekele amba: “Nombole lwitabijo lobe pampikwa mingilo, nami nkulombole lwitabijo lwami na mingilo yami.” (Yakoba 2:18) Yakoba wāshintulwile’mba pa kwikala na lwitabijo, bitulomba kulonga bivule ke kwitabijapo’tu bitupu. Bandemona betabije’mba Yehova Leza udi’ko, inoko kebadipo na lwitabijo mwadi. Abo, i balwana nandi. (Yakoba 2:19, 20) Kadi, shi muntu waikala na lwitabijo, ukasangaja Leza  na kwingila mingilo milumbuluke ne kwikala na bilongwa biyampe. Kino kyo kyālongele ne Abalahama. Yakoba wāsonekele amba: “Mwene Abalahama tata wetu wātelelwe bu moloke pa kupwa kulambula Izake wandi mwana pa kisōkelo? Ubamone amba lwitabijo lwandi lwāingile pamo na mingilo yandi kadi lwitabijo lwandi lwāfikijibwe pa bubwaninine na mingilo yandi.” Yakoba wākomeneje’mba lwitabijo lwampikwa mingilo i lwa bitupu paānenene’mba: “Monka mwikadile umbidi wampikwa mushipiditu i mufwe, ne lwitabijo lwampikwa mingilo nalo i lufwe.”​—Yakoba 2:21-23, 26.

9, 10. Le kulombola lwitabijo mudi Mwana kushintulula bika?

⁹ Myaka 30 ne musubu pa kupita’po, Yoano wālembele Evanjile yandi ne mikanda isatu mikwabo. Pamo bwa balembi bakwabo ba Bible, Yoano wāimvwanije mwikadile lwitabijo. Misunsa mivule mu bilembwa byandi, Yoano i mwingidije’mo bishima bya Kingidiki bine byalamwinwe kyaba kimo mu Kiluba bu ‘kulombola lwitabijo.’

¹⁰ Kimfwa, Yoano wāshintulwile’mba: “Yewa ulombola lwitabijo mudi Mwana udi na būmi bwa nyeke; yewa kakōkelapo Mwana kakamonepo būmi, ino bukalabale bwa Leza budi nyeke padi.” (Yoano 3:36) Pa kulombola lwitabijo mudi Mwana, tufwaninwe kukōkela Yesu. Ino, kupityila ku bilembwa bya Yoano, tumona’mba divule dine Yesu wādi unena’mba pa kwikala na būmi bwa nyeke, tufwaninwe kulombola lwitabijo mudi aye ne mudi Shandi.​—Yoano 3:16; 6:29, 40; 11:25, 26; 14:1, 12.

11. Le tukalombola namani amba tufwijanga’ko Yehova pa kuyuka bubine?

¹¹ Yehova waingidije mushipiditu wandi ujila pa kwitukwasha twimvwanije bubine butala padi ne padi wandi Mwana ne kwitukwasha twikale na lwitabijo mobadi. (Tanga Luka 10:21.) I muswelo’ka otukalombola’mba tufwijanga’ko Yehova pa byonso byaetulongēle? Tufwaninwe kulangulukila nyeke pa mukenga waetupele wa kupwana nandi kupityila padi Yesu, “Kalombwe Mukatampe, Yewa wa kufikija ku bubwaninine lwitabijo lwetu.” (Bahebelu 12:2) Kadi tufwaninwe kwendelela kukomeja lwitabijo lwetu na kulombela nyeke kudi Yehova ne kwifunda Kinenwa kyandi.​—Efisesa 6:18; 1 Petelo 2:2.

12. Le tukalonga bika shi tudi na lwitabijo?

¹² Tufwaninwe kulombola nyeke kupityila ku bilongwa byetu amba tudi na lwitabijo lukomo mu milao ya Yehova. Kimfwa, twendelelanga na kusapwila bantu myanda ya Bulopwe bwa Leza ne kwibakwasha bekale bana ba bwanga ba Yesu. Kadi tulongelanga nyeke “bantu bonso biyampe, ino kutabukidila boba botubutulwa nabo mu lwitabijo.” (Ngalatea 6:10) Ne kadi tuloñanga bukomo bwa kuvūla “bumuntu bwa kala ne bilongwa byabo,” mwanda ketusakengapo kintu nansha kimo kitonene kipwano kyetu na Yehova.​—Kolose 3:5, 8-10.

13. Le “lwitabijo mudi Leza” ludi na mvubu muswelo’ka? Le Bible wilushintulula namani, ne mwanda waka?

¹³ Bible unena’mba: “Pampikwa lwitabijo kebibwanikapo kusangaja Leza, mwanda yewa umufwena ufwaninwe kwitabija’mba udi’ko ne amba upalanga mpalo boba bamukimba na mikeketo.” (Bahebelu 11:6) Kadi Bible ulombola’mba “lwitabijo mudi Leza” kyo kintu kibajinji kifwaninwe kwikala na bene Kidishitu ba bine. I kipindi kya mu “kyalwilo” kyetu. (Bahebelu 6:1)  Ino kutentekela pa lwitabijo, tusakilwa ngikadilo mikwabo ya mvubu pa kwikala mu kipwano na Yehova ne kwikilama.​—Tanga 2 Petelo 1:5-7; Yude 20, 21.

14, 15. Le buswe budi na mvubu namani shi twibudingakanye na lwitabijo?

¹⁴ Balembi ba Bible i besambile bininge pa lwitabijo kupita pa ngikadilo mikwabo yo-yonso. Le kino kishintulula’mba lwitabijo yo ngikadilo imo kete ya mvubu mpata yotusakilwa kwikala nayo?

¹⁵ Polo wādingakenye lwitabijo na buswe. Wāsonekele amba: “Shi ngidi na lwitabijo lonso lutundulula ngulu, ino kwikala na buswe mpika, nabya ami ne wa bitupu.” (1 Kodinda 13:2) Yesu wānenene amba “mbila itabukile bukatampe” i kusanswa Leza. (Mateo 22:35-40) Buswe bwitukwashanga twikale na ngikadilo mikwabo mivule isangaja Leza. Kimfwa, Bible unena’mba buswe “bwitabijanga byonso.” Nanshi buswe buketukwasha twitabije, nansha kwikala na lwitabijo mu kintu kyo-kyonso kitulombola Leza mu Bible.​—1 Kodinda 13:4, 7.

16, 17. I bika binena Bible pa lwitabijo ne buswe? Pa ino ngikadilo, le mikatampe’po i yepi, ne mwanda waka?

¹⁶ Lwitabijo ne buswe yonso i ngikadilo ya mvubu mpata, divule dine balembi ba Bible i beitele kyapamo. Polo wākankamikile banababo bavwale “kilama-kyadi kya lwitabijo ne buswe.” (1 Tesalonika 5:8) Petelo wālembele padi Yesu amba: “Nansha byokemwamumwene kashā, banwe’ko mumusenswe. Nansha byokemumumonangapo pano, ino mulombolanga lwitabijo mudi aye.” (1 Petelo 1:8) Yakoba wāipangwile banababo bashingwe māni amba: “Lelo Leza katongelepo boba bamonwa bu balanda na ino ntanda’mba bekale bampeta mu lwitabijo kadi bampyana ba Bulopwe bwine bwaalaile boba bamusenswe?” (Yakoba 2:5) Yoano wālembele amba mbila ya Leza i ya amba, “twikale na lwitabijo mu dijina dya wandi Mwana Yesu Kidishitu ne kwisanswa batwe bene na bene.”​—1 Yoano 3:23.

¹⁷ Kadi Polo wāsonekele amba: “Inoko pano kubashala lwitabijo, lukulupilo, buswe, bino bisatu; ino kikatampe kutabuka pa bino’bi i buswe.” (1 Kodinda 13:13) Mu mafuku āya kumeso ketukasakilwapo monka lwitabijo mu milao ya Leza itala ntanda mipya mwanda ikekala ke mifikidile. Tukekalanga na būmi bwa kutendelwa bwisambīle’po Bible. Inoko tukasakilwa nyeke kusanswa Leza ne bakwetu. Bine, buswe botwibaswele bukatamina’ko nyeke.

18, 19. I bika bilupukile ku lwitabijo lwa bantu ba Leza dyalelo, ne i ani mufwaninwe kutendelwa pa kino?

¹⁸ Bantu ba Yehova ba mu kino kyetu kitatyi badi na lwitabijo mu Bulopwe bwa Leza kadi bebukwatakanyanga. Besenswe abo bene na bene. Mwanda balekanga mushipiditu wa Leza uludike būmi bwabo. (Ngalatea 5:22, 23) Le i kulupuke bika? Batutu ne bakaka midiyo mwānda ne kupita kujokoloka ntanda yonso badi na ndoe ne bumo mu bipwilo byabo. Bine, lwitabijo ne buswe i ngikadilo mikatampe.

¹⁹ Buno bumo i bubwanike’nka na bukwashi bwa Leza wetu. I mufwaninwe kutendelwa pa kino. (Isaya 55:13) Bine tumufwijanga’ko pa kwitulengeja ‘tupandijibwe pa lwitabijo.’ (Efisesa 2:8) Yehova ukyendelela kukwasha bantu bavule bekale na lwitabijo mwadi. Ku mfulo, pano pa ntanda ponso pakayula bantu babwaninine, boloke, kadi ba nsangaji bakatendela Yehova nyeke ne nyeke!