1, 2. (a) Lelo mu “kyabuntu . . . kya ku bitupu kekineneka” kya Leza mubadilwa bika ne bika? (b) Lelo i bipangujo’ka byotusa kubandaula mu kino kishinte?

YEHOVA i mwitupe kyabuntu kikatakata kya buswe, pa kutuma Yesu wandi Mwana mulēme mpata pano pa ntanda! (Yoano 3:16; 1 Yoano 4:9, 10) Mutumibwa Polo wēkitelele bu “kyabuntu . . . kya ku bitupu kekineneka.” (2 Kodinda 9:15) Mwanda waka Polo wātelele kino kishima?

² Polo wādi uyukile’mba kitapwa kya Yesu i kyeya kilombola’mba milao yonso ya Leza ya kutendelwa ikafikidila. (Tanga 2 Kodinda 1:20.) Kino kishintulula’mba mu “kyabuntu . . . kya ku bitupu kekineneka” kya Leza mudi kitapwa kya Yesu, ne bintu byonso biyampe ne buswe bwa kwipāna bwitulombola Yehova. Kino kyabuntu i kikomo kunena mwanda ketwikivwanijepo ne pa mfulo. Lelo kino kyabuntu kya pa bula kitulengejanga twiivwane namani? Ne i muswelo’ka kino kyabuntu okitutonona twiteakanye ku Kivulukilo kya lufu lwa Kidishitu kikalongwa mu Dya Busatu, mafuku 23 Kweji 3, 2016?

3, 4. (a) Lelo wiivwananga namani shi muntu wakupe kyabuntu? (b) Lelo kyabuntu kya pa bula kibwanya namani kushinta bobe būmi?

³ Tusangalanga shi muntu kampanda wetupe kyabuntu. Inoko byabuntu bimo bikalanga bya mvubu nansha bya pa bula bine bikokeja kushinta būmi bwetu. Kimfwa, fwatakanya’po bidi shi wi mutapane. Mfuto ya butapani i lufu. Ino na mu kitulumukila muntu okuyukilepo waiya amba bamwipaye pa kyaba kyobe. Wepāna na mutyima tō kufwa pa kyobe kyaba! Lelo kino kyabuntu kya pa bula kikakulengeja wimone namani?

⁴ Kino kyabuntu kya buswe kadi kya pa bula kikakulengeja ushinte bintu mu bobe būmi. Bine, kino kikakutonona kadi wikale na buntu buvule ne buswe bwa kuswa bakwenu ne kwibafwila lusa boba bonso kebakusenswepo. Mu bobe būmi bonso ukafwija’ko pa mwanda wa kino kitapwa kyakwelelwe.

5. Lelo kyabuntu kya Leza kya kitapwa i kikatampe namani kutabuka kyabuntu kyo-kyonso?

⁵ Kyabuntu kya Leza kya kitapwa i kipite bukata kino kyatelwa mu kimfwa. (1 Petelo 3:18) Langa’po bidi: Batwe bonso twi bapyane bubi bwa kwa Adama, ne mfuto ya buno bubi i lufu. (Loma 5:12) Buswe bo bwātonwene Yehova atume Yesu pano pa ntanda ne kufwila bantu, amba “atompe lufu pa mwanda wa muntu ense.” (Bahebelu 2:9) Inoko kitapwa kya Yesu kiketulongela bintu bivule kutabuka! Kikajimankanya lufu fututu. (Isaya 25:7, 8; 1 Kodinda 15:22, 26) Boba bonso betabije Yesu bakekala mu ndoe ne mu nsangaji nyeke ne nyeke, momwa mūlu bu balopwe pamo na Kidishitu nansha pano pa ntanda bu babikalwa ba Bulopwe bwa Leza. (Loma 6:23; Kusokwelwa 5:9, 10) Le i madyese’ka makwabo abadilwa mu kyabuntu kya Yehova?

6. (a) Lelo i madyese’ka abadilwa mu kyabuntu kya Yehova otengele? (b) Le kyabuntu kya Leza kitutononanga tulonge bintu’ka bisatu?

⁶ Ntanda ikekala ke paladisa, babela bakabeluka, ne bafwe bakasanguka, bino byonso bibadilwa mu kyabuntu kya Leza. (Isaya 33:24; 35:5, 6; Yoano 5:28, 29) Tuswele Yehova ne wandi Mwana muswe pa kwitupa kino “kyabuntu . . . kya ku bitupu kekineneka.” Lelo kino kyabuntu kiketutonona tulonge bika? Kiketutonona (1) kwiula Kidishitu Yesu senene, (2) kuswa banabetu, ne (3) kufwila bakwetu lusa bya binebine.

7, 8. Lelo i muswelo’ka otufwaninwe kwiivwana pa buswe bwituswele Kidishitu, ne bufwaninwe kwitutonona tulonge bika?

⁷ Kibajinji, bufwaninwe kwitutonona twingidije būmi bwetu pa kulēmeka Yesu. Mutumibwa Polo wānene amba: “Buswe budi na Kidishitu bwituningilanga.” (Tanga 2 Kodinda 5:14, 15.) Polo wādi uyukile amba shi twitabije buswe bukatampe bwa Yesu, buketuningila nansha kwitutonona tuswe Yesu ne kumulēmeka. Bine, shi twivwanije biyampe kintu kitulongēle Yehova, buswe bwandi buketutonona twiendeje mu muswelo ulombola’mba tulēmekele Yesu. Namani le?

⁸ Buswe bwa Yehova buketutonona twiule kimfwa kya Yesu, ne kulonda senene mu mayo andi. (1 Petelo 2:21; 1 Yoano 2:6) Tulombolanga amba tuswele Leza ne Kidishitu potwibakōkela. Yesu wānene amba: “Yewa udi na mbila yami  ne kulama’yo ye unsenswe. Ne kadi yewa unsenswe, ne Tata nandi ukamusanswa, kadi nami nkamusanswa ne kwilombola patōkelela kwadi.”—Yoano 14:21; 1 Yoano 5:3.

9. Lelo tubwanya kukokwa na bika?

⁹ Mu kino kitatyi kya Kivulukilo, i biyampe kulangulukila pa muswelo otwingidija būmi bwetu. Wiipangule amba: ‘Lelo i mu bintu’ka mokendi kala mwiule Yesu? Le i mu bintu’ka momfwaninwe kwilumbulula?’ I kya mvubu mpata kwiipangula bino bipangujo mwanda ntanda isakanga twiendeje moisakila. (Loma 12:2) Shi ketutadijepo, tukakokwa kwiula bafundiji ba ino ntanda, bantu batumbe, ne bakatutwa-bīla mu myanda ya futu. (Kolose 2:8; 1 Yoano 2:15-17) Lelo i muswelo’ka otukakomena kuno kukokwa?

10. Le i bipangujo’ka byotukokeja kwiipangula mu kitatyi kya Kivulukilo, ne malondololo abwanya kwitutonona tulonge bika? (Tala kifwatulo ku ngalwilo.)

¹⁰ Mu kino kitatyi kya Kivulukilo, i kya kamweno tubandaule bivwalwa, mafilime, ne minjiki ne bidi mu olodinatele yetu, telefone, nansha matabulete. Wiipangule amba: ‘Shi Yesu wadi pano ne kumona momvwadile, le nadi wa kwivwana bumvu?’ (Tanga 1 Temote 2:9, 10.) ‘Le bivwalwa byami bilombola amba ne mulondi wa Kidishitu? Lelo Yesu wadi wa kusangela kutala mafilime ami? Lelo wadi wa kwivwana minjiki yami? Shi Yesu waajima telefone yami nansha tabulete, le nadi wa kwimvwana bumvu pa byasa kumona’mo? Le nadi wa kukomenwa kushintulwila Yesu kyonswidile makayo a video?’ Buswe bwetu botuswele Yehova buketutonona twele kulampe kintu kyo-kyonso kekifwaninwepo ku bene Kidishitu nansha shi i kya lupoto’ka. (Bilongwa 19:19, 20) Potwepēne kudi Yehova, twalaile kwingidija būmi bwetu mwanda wa kulēmeka Kidishitu. Nanshi ketufwaninwepo kulama kintu nansha kimo kilengeja tukomenwe kwiula Yesu.—Mateo 5:29, 30; Fidipai 4:8.

11. (a) Lelo buswe botuswele ba Yehova ne Yesu buketutonona namani mu busapudi? (b) Le buswe bwetu buketutonona namani tukwashe banabetu mu kipwilo?

¹¹ Buswe botuswele Yesu bwitutononanga tusapule ne kufundija na bupyasakane. (Mateo 28:19, 20; Luka 4:43) Mu kitatyi kya Kivulukilo, ubulwe’po kujadika mpangiko yobe amba wingile bupania mukwashi wa mansá 30 nansha 50? Tutu umo wa myaka 84 mufwilwe mukaji kadipo ulanga’mba ubwanya kwingila bupania mwanda wa bununu ne misongo. Inoko bapania ba kwabo badi basaka kumukwasha. Batongele mwaba obabwanya kwingila’mo ne kwanza kumufutyila dishinda pa kwenda’ko. Mfulo mfulō, tutu’wa wafikila pa kitungo kya mansá 30. Le ubulwe’po kukwasha muntu mu kyenu kipwilo engile bu pania mukwashi mu Kweji 3 ne Kweji 4? Shako kebonsopo babwanya kwingila bu pania, ino tubwanya kwingidija kitatyi ne bukomo mwanda wa kwingidila bininge Yehova. Nabya yepotukalombola bwa Polo amba tutononwanga na buswe bwa Yesu. Le buswe bwa Leza buketutonona tulonge kintu’ka kikwabo?

12. Lelo buswe bwa Leza bwitutononanga tulonge bika?

¹² Kya bubidi, buswe bwituswele Leza bufwaninwe kwitutonona tuswe banabetu. Mutumibwa Yoano wāsonekele amba: “Banwe baswedibwe, shi e mwetusanshilwe Leza namino, nanshi tufwaninwe netu kwisanswa batwe bene na bene.”  (1 Yoano 4:7-11) Shi tubaitabija buswe bwa Leza, nankyo tukasanswa banabetu. (1 Yoano 3:16) Le tukebasanswa namani?

13. Lelo Yesu i mwitushile kimfwa’ka kya kusanswa bakwetu?

¹³ Yesu i mwitushile kimfwa kya mwa kuswila bakwabo. Paādi pano panshi, wākweshe bantu, kutabukidila boba bafudilwe. Wābelwile babela, babilema, bampofu, babitwi, ne batumama. (Mateo 11:4, 5) Yesu wādi mwishile na bendeji ba bipwilo, mwanda aye wādi usangela kufundija bantu basaka kuyuka Leza. (Yoano 7:49) Wādi usenswe bano bantu bafudilwe, wālonga bukomo bwa kwibakwasha.—Mateo 20:28.

14. Lelo i bika byokokeja kulonga pa kulombola’mba usenswe banabenu?

¹⁴ Kitatyi kya Kivulukilo i kitatyi kiyampe kya kulangulukila pa muswelo wa kukwasha batutu ne bakaka mu kipwilo, nakampata banunu. Lelo ubulwe’po kupempula bano banabetu baswe? Ubulwe’po kwibendela bidibwa, kwibakwasha ku mingilo ya mu njibo, kwenda nabo ku kupwila, nansha kusapula nabo? (Tanga Luka 14:12-14.) Tulomba buswe bwa Leza bukutonone usanswe banabenu!

15. Le i mwanda’ka oketufwaninwepo kwilwa?

¹⁵ Kya busatu, buswe bwituswele Yehova bwitutononanga tufwile batutu ne bakaka lusa. Batwe bonso twi bapyane bubi ne lufu kudi Adama, i kutupu nansha umo ukokeja kunena’mba, “Nkidi kyonsakilwa kinkūlwa.” Nansha ke bengidi ba Leza ba kikōkeji basakilwa kyabuntu kya kinkūlwa. Batwe bonso twi balekelwe mapu makatampe! Mwanda waka i kya mvubu tuvuluke uno mwanda? Tutana malondololo mu kyelekejo kimo kya Yesu.

16, 17. (a) Le i ñeni’ka yotuboila ku kyelekejo kya Yesu kya mulopwe ne bapika? (b) Ubasumininwa kulonga bika pano powalangulukila pa kyelekejo kya Yesu?

¹⁶ Yesu wāletele kyelekejo kya mulopwe umo wāfwidile umpika wandi lusa wādi umwapwile ndenadi 60000000. Ino mwenda mafuku uno umpika wāpela kufwila’tu lusa umpika mukwabo wādi umwapwile ndenadi 100. Lusa lwāmufwidile mulopwe, lwādi lufwaninwe kutonona uno umpika afwile mukwabo lusa. Mulopwe wākalabele pa kwimvwana amba uno umpika kafwidilepo mukwabo lusa, wādi umwapwile’tu tutyetye. Mulopwe wānena’mba: “Abe umpika umbi, ami nakulekēle mapu obe onso powanzenzele. Lelo nobe kufwaninwepo kufwila mupika mukwenu lusa monka monakufwidile lusa?” (Mateo 18:23-35) Pamo bwa uno mulopwe, Yehova nandi i mwitulekele mapu makatampe. Le buswe ne lusa lwa Yehova bifwaninwe kwitutonona tulonge bika?

¹⁷ Pano potwiteakanya ku Kivulukilo, tubwanya kwiipangula’mba: ‘Le kudi mwanetu usanshije? Le nkomenwe kumufwila lusa?’ Shi i amo, kino kyo kitatyi kiyampe kya kwiula Yehova, wa “mutyima wa lubilo wa kulekela (myanda).” (Nehemia 9:17; Ñimbo 86:5) Shi  tufwijanga’ko pa lusa lukatampe lwa Yehova, nabya tukafwila bakwetu lusa ne kwibalekela bya binebine. Shi ketusenswe po banabetu ne kwibafwila lusa, netu Yehova kaketusanswapo nansha kwitufwila lusa. (Mateo 6:14, 15) Shi tubafwila bakwetu lusa, mwanda obetusanshije nao keushintyilepo, inoko kino kiketukwasha tukekale na nsangaji mu mafuku a kumeso.

18. Lelo buswe bwa Leza bwakweshe namani kaka umo atyumwine mu manwi kubulwa kubwaninina kwa kaka mukwabo?

¹⁸ Bikokeja kwikala bikomo kutyumwina mu manwi kubulwa kubwaninina kwa batutu ne bakaka. (Tanga Efisesa 4:32; Kolose 3:13, 14.) Kaka umo otwita bu Lily. ^[1] (Tala bilembwa bya ku mfulo.) wākweshe mwana-mukaji umo wa kishala witwa bu Carol. Kimfwa, waselele Carol mu motoka ne kwenda konso kwaadi usaka, wamukwasha ku kupota bintu ne ku myanda mikwabo. Nansha Lily byaalongele bino byonso’bi, Carol wadi nyeke ufutulula’byo, kadi ne kyaba kimo byadi bikomo kumukwasha. Inoko Lily waimanine pa ngikadila miyampe ya Carol, waendelela kumukwasha mu myaka kampanda mu misongo yandi kufika ne byafwile. Nansha kukwasha Carol byokwadi kukomo, ino Lily unena’mba: “Ngabilanga kukemona na Carol pakasanguka. Nsaka kumumona pakekala ke mubwaninine.” Kibamweka patōka’mba buswe bwa Leza bubwanya kwitutonona tufwile batutu ne bakaka lusa ne kutengela kitatyi kyobakekala ke babwaninine lonso.

19. Lelo “kyabuntu . . . kya ku bitupu kekineneka” kya Leza kikakutonona ulonge bika?

¹⁹ Bine Yehova i mwitupe “kyabuntu kyandi kya ku bitupu kekineneka.” Twikisangelei nyeke! Kitatyi kya Kivulukilo i kitatyi kilumbuluke kya kulangulukila pa byonso bitulongēle ba Yehova ne Yesu. Shi ke pano nanshi, buswe bwabo bwitutonone twiule Yesu, tusanswe banabetu, ne kwibafwila lusa bya binebine.