Mushipiditu Sandu—Mwanda Waka Kudi Kavutakanya?

LELO mushipiditu sandu i bika? Kipangujo kimweka bu kipēla, ino kutana kilondololwa kipēla kukokeja kwikala kukomo. Papa Benoit XVI wanene ku kibumbo kya mu Ostrali amba: “Bikimweka bu bikomo ne pano kwivwanija senene Mushipiditu.”

Na bubine, kudi milangwe mivule ne kutatana kuvule pa kipangujo kya amba, Lelo mushipiditu sandu i bika? Ivwana mulondolwelanga’po bamobamo:

• I muntu udi munda mwa bana ba bwanga ba Kidishitu.

• I Leza malango, kijila kya Leza kingila mu bantu.

• I kwikala’ko kwa Leza mu mingilo ya ntanda.

• I muntu wa busatu mu Busatu Busantu.

Mwanda waka kudi kano kavutakanya? Mwanda i katambe mu myaka ya katwa ka buná K.K., pāfwatakenye befundi bamo ba teoloji amba mushipiditu sandu i muntu udi mu ludingo lumo na Leza. Inoko, uno kewādipo mulangwe utamba mu Bisonekwa, nansha ku balondi babajinji ba Kidishitu. Dibuku New Catholic Encyclopedia dishintulula amba: “Kipwanino kya Kala kekiletangapo mulangwe amba mushipiditu wa Leza i muntu . . . Mushipiditu wa Leza i bukomo’tu bwa Leza.” Dino dibuku dimo dyonka dibweja’ko amba: “Mikanda mivule ya Kipwanino Kipya ilombola amba mushipiditu wa Leza i kintu, ke muntupo; ne kino i kimweke bininge mu muneneno wa kwenzakanya mushipiditu ne bukomo bwa Leza.”

O mwanda mwine bantu i bakomenwe kulangidija bukomo bu muntu. Bwipangudi bwa panopano bwa mu États-Unis bulombola amba bantu bavule i bapele mulangwe wa amba mushipiditu sandu i muntu nansha “būmi kampanda.” Lelo badi na bubinga? Nansha le i biyampe twitabije befundi ba teoloji bakoma amba “Muya Ujila i Muntu binebine mwishile na Tata ne na Mwana”?

Pa kusokola malondololo akulupilwa, i biyampe tunyemene ku Bible, Kinenwa kya Leza, kishintulula byonso bitala mushipiditu sandu. Mutumibwa Polo wāsonekele amba: “Bisonekwa byonso i bisonekejibwe na Leza ku Muya Ujila, byo bya kufundija ne kudingila madingi ne kufundula bilube.”—2 Temote 3:16, Myanda Miyampe ku Bonso.

Mwanda waka ufwaninwe kukimba kusokola bubinebine butala pa mushipiditu sandu? Mwanda kuyuka buno bubinebine kukakushitwila mukenga wa kukwashibwa na Leza. Lelo wivwananga kyaba kimo bu kubwanyapo kulonga bintu na bukomo bobe? Yesu wālaile bandi bana ba bwanga amba: “Mwikale kulomba nankyo kikemupebwapo . . . Lelo ino bānweko . . . muyūkile kupa bāna benu byakwibapa biyampe, lelo Shenu wa mūlu ke pepi, keye mwine ukakija kupana Mushipiditu Sandu ku bakumulomba?”—Luka 11:9, 13.

Mu bishinte bilonda’ko, tukaleka Bisonekwa bitulombole mwine mwikadile mushipiditu sandu. Kadi tukamona mowikadile bu bukomo bwitutwala ku biyampe mu būmi.

[Bushintuludi pa paje 3]

Bisonekwa bitulombolanga mwine mwikadile mushipiditu sandu