A Nkasampe—ningija Mutyima Obe wa Kwingidila Yehova
A Nkasampe—ningija Mutyima Obe wa Kwingidila Yehova
“Vuluka Umpangi obe mu mafuku obe pokidi nkasampe.”—MUS. 12:1.
1. Lelo i lwito’ka lwāityilwe bana ba mu Isalela?
PANO ke myaka 3500 kunyuma, Mosesa mupolofeto wa Yehova wāsoñenye bapidishitu ne bakulumpe ba mu Isalela amba: “Ukabungakanya bidi bantu’ba, bana-balume ne bana-bakaji ne twana’twa . . . , amba bevwane, kadi amba balombolwe, ne kwakamwa Yehova Leza wenu, ne kutentekela kulonga binenwa byonso bya uno mukanda-wabijila uno’u.” (Kup. 31:12) Tala bidi boba bānenwe kwibunga mwanda wa kutōta: bana-balume, bana-bakaji ne twana. I amo, ne bana bene bādi babadilwa mu bantu ba kwivwana, kufundijibwa ne kulonda bwendeji bwa Yehova.
2. Lelo Yehova wālombwele namani amba utele mutyima bankasampe ba mu kipwilo kya Bwine Kidishitu kibajinji?
2 Mu myaka katwa kabajinji, Yehova wāendelele na kulombola’mba utele mutyima bankasampe bamwakaminwe. Kimfwa, wāsoñenye mutumibwa Polo atweje mu mikanda imo yaātumine ku bipwilo madingi atala nakampata bankasampe. (Tanga Efisesa 6:1; Kolose 3:20.) Bankasampe Bene Kidishitu bālondele ano madingi bātamije mutyima wabo wa kufwija’ko Tata wa buswe udi mūlu, nandi webesela.
3. Lelo dyalelo bankasampe balombolanga namani mutyima wabo wa kwingidila Leza?
3 Lelo dyalelo bankasampe banenwe kwibunga mwanda wa kutōta Yehova? I amo! Mwanda i kya nsangaji ku bantu ba Leza bonso pa kumona bankasampe bavule bengidila Leza ntanda yonso kulonda musoñanya wa Polo wa amba: “Twitei mityima bātwe bene na bene ya pa kwisombela ku lusa ne mīngilo miyampe; ne kuleka’byo kubungakana mpika, pamo na muswelo wa bamobamo, poso kwikwasha bātwe bene; ne byo mwamona difuku dibafwena po pene pa kuningija.” (Bah. 10:24, 25) Kadi, bana bavule basapulanga myanda miyampe ya Bulopwe bwa Leza pamo na bambutwile. (Mat. 24:14) Kadi pa kulombola buswe butamba ku mutyima bobaswele Yehova, mwaka ne mwaka bankasampe tununu ne tununu bepānanga mwanda wa kubatyijibwa ne kumona madyese a kwikala mwanā bwanga wa Kidishitu.—Mat. 16:24; Mako 10:29, 30.
Itaba Lwito Tamba’nka Pano
4. Le i kitatyi’ka kikokeja bankasampe kwitaba ku lwito lwa Leza lwa kumwingidila?
4 Musapudi 12:1 unena’mba: “Vuluka Umpangi obe mu mafuku obe pokidi nkasampe.” A bankasampe, le i myaka inga yomufwaninwe kufikila’po penepa ke mwitaba ku lwito lwa kutōta ne kwingidila Yehova? Bisonekwa kebitelelepo myaka. Nanshi, kokekaka, na kulanga’mba ukidi mwanuke bininge kwabwenye myaka ya kwivwana Yehova ne kumwingidila. Nansha wikale na myaka inga, ubakankamikwa witabe pampikwa kwija.
5. Lelo bambutwile bakokeja namani kukwasha babo bana bendelele ku mushipiditu?
5 Bavule momudi bakwashibwanga na mbutwile umo nansha bonso babidi pa kwendelela ku mushipiditu. Nabya, mudi pamo bwa Temote wa mu bitatyi byāsonekelwe Bible. Pa bwanuke, wāfundijibwe bisonekwa bikola na inandi, Yunisa, ne nkambo wandi Loisa. (2 Tem. 3:14, 15) Padi, bambutwile benu bemwibidijanga muswelo umo onka na kwifunda nenu Bible, kulombela nenu, kwenda nenu ku kupwila kwa pa kipwilo ne ku bitango bikata, kadi batambilanga nenu mu mwingilo wa budimi. I bine, kwimufundija mashinda a Leza i kiselwa kikatampe bininge kipelwe bambutwile benu na Yehova mwine. Lelo mufwijanga’ko pa buswe ne mutyima obemutele?—Nk. 23:22.
6. (a) Le mungya Mitōto 110:3, i butōtyi bwa muswelo’ka busangajanga Yehova? (b) Le i bika byotusa kubandaula pano?
6 Shako, banwe bankasampe pomwenda mutama, Yehova wimusakilanga “mutompe kiswa-mutyima wa Leza, ne mwikadile bulumbuluke,” na mwālongele Temote. (Loma 12:2) Shi mulonge namino, mukengila mingilo ya mu kipwilo, ke mwandapo wa bambutwile basaka mwingile’yo, ino i banwe bene basaka kulonga kiswa-mutyima kya Leza. Shi mwingidile Yehova na mutyima tō, nankyo mukamusangaja. (Mit. 110:3) Penepo, le mukalombola namani amba musakanga kuningija mutyima wenu wa kuteja Yehova ne kulonda bwendeji bwandi? Tusa kubandaula miswelo isatu ya kamweno yomukokeja kulonga namino. Imanine pa kifundwa, milombelo ne mwiendelejo. Pano tubandaule’byo kimo ne kimo.
Yuka Yehova Amba Udi’ko
7. Lelo Yesu wāshile kimfwa’ka mu kwifunda Bisonekwa, ne i kika kyāmukweshe?
7 Muswelo umbajinji olombola’mba usakanga kuningija mutyima obe wa kwingidila Yehova i na kutanga Bible difuku ne difuku. Ukokeja kupwa bulanda bobe bwa pa mutyima ne kwikala na buyuki bwa bulēme budi mu Bible na kutanga Kinenwa kya Leza kitatyi ne kitatyi. (Mat. 5:3) Yesu i mushiye kimfwa. Kyaba kimo, paādi na myaka 12, bambutwile bandi bāmutene mu tempelo, “ushikete mubukata mwa bafundiji kwibomvwana, ne kwibēpangula byakwipangula.” (Luka 2:44-46) Papo ukidi mwanuke, Yesu wādi usenswe Bisonekwa kadi wādi na kwimvwanija. Le i bika byāmukweshe alonge namino? Kwakubulwa ne kutatana kwine, inandi Madia, ne Yosefa shandi wa bulelwa bāmukweshe bininge. Bādi bengidi ba Leza bāfundije Yesu bitala padi Leza tamba pa bwanuke.—Mat. 1:18-20; Luka 2:41, 51.
8. (a) Lelo i kitatyi’ka kifwaninwe kushilula bambutwile kukomeneja buswe bwa Kinenwa kya Leza mu babo bana? (b) Sekununa mwanda umo ulombola mvubu ya kufundija bana tamba pa bwanuke.
8 Mo monka, dyalelo bambutwile bakaminwe Leza bayukile kamweno ka kukomeneja mu mityima ya babo bana kusanswa bubinebine bwa mu Bible tamba ku bwanuke. (Kup. 6:6-9) E mwalongele Rubi, kaka umo Mwine Kidishitu, pa kubutulwa’tu kwa wandi mwana umbajinji, Joseph. Difuku ne difuku, wadi umutangila Dibuku Dyami dya Mānga ya mu Bible. Mwana pa kutama, inandi wadi umukwasha kukwatyila pa mutwe bisonekwa bimo bimo. Lelo Joseph wamwenine mu kino kibidiji? Aye pa kuyuka’tu kunena, washilula kubanga manga ya mu Bible mu bishima byandi aye mwine. Paabwenye myaka itano, wapityije kipindi kibajinji ku Masomo a Mwingilo wa Kiteokratike.
9. Mwanda waka kutanga Bible ne kulanguluka’po kudi na mvubu?
9 A bankasampe, shi musaka kwendelela bukidi ku mushipiditu, mufwaninwe kwikala na kibidiji kya kutanga Bible difuku ne difuku tamba ku bunkasampe ne byomufika ku bukulu. (Mit. 71:17) Mwanda waka butangi bwa Bible bukakukwasha wendelele kumeso? Tala byānene Yesu mu milombelo kudi Shandi: “Ebiya’mba, bakuyūke, abe Leza enka wa binebine.” (Yoa. 17:3) Bine, shi utambule buyuki buvule butala padi Yehova, ukamumonanga senene bu udi’ko bine kadi ukaningisha buswe bomusenswe. (Bah. 11:27) Nanshi, kyaba kyonso kyotanga kipindi kampanda kya mu Bible, ingidija uno mukenga wifundile’ko bivule bitala padi Yehova. Wiipangule: ‘Lelo ino nsekununi ibamfundija bika padi Yehova amba bine udi’ko? Lelo kino kisonekwa kya mu Bible kilombola namani buswe bwa Leza ne amba untele mutyima?’ Kutūla’ko kitatyi kya kulangulukila pa bino bipangujo kukakukwasha uyuke mulangila Yehova, mwaivwanina ne byobya byasaka kodi. (Tanga Nkindi 2:1-5.) Pamo bwa nkasampe Temote, ‘ukasumininwa’ kukulupila byowifunda mu Bisonekwa, kadi ukakunkwa mutyima utōte Yehova na mutyima tō.—2 Tem. 3:14.
Milombelo Moiningishisha Buswe Boswele Yehova
10, 11. Lelo milombelo ikwashanga namani uningishe mutyima obe wa kwingidila Leza?
10 Muswelo wa bubidi okokeja kuningisha mutyima obe wa kwingidila Yehova na mutyima onso i kupityila ku milombelo. Mu Mitōto 65:2, tutanga’mba: “Ē! abe wivwananga kulombela, kudi abe ko kukāya bantu bonso.” Nansha ke pādi Isalela bu bantu ba Leza basambile nabo kipwano, beni bādi bāya mu tempelo ya Yehova bādi babwanya kumufwena kupityila ku milombelo. (1 Bal. 8:41, 42) Leza kadipo’mba yeu ye yeu. Boba balama mbila yandi i bakulupijibwe amba ukebevwananga. (Nk. 15:8) Na bubine, mu bano “bantu bonso” mubadilwa ne banwe bankasampe.
11 Uyukile biyampe amba bulunda bwa bine bonso buniñanga shi mwisambila pamo. Bimweka’mba, wikalanga usangala kulombola mulunda nobe wa pa mutyima milangwe yobe, byosaka ne mowiivwanina. Mo monka, shi ulombela milombelo itamba ku mutyima, wisambanga na Umpangi obe Mukatampe. (Fid. 4:6, 7) Nena na Yehova pamo na abe unena bidi mu mutyima kudi mbutwile wa buswe nansha kudi mulunda nobe wa pa mutyima. Kabidi, muswelo olombela ulombolanga momwenine Yehova. Ukamona’mba shi kipwano kyobe na Leza kyenda kininga, milombelo yobe nayo ikekala mishilakane.
12. (a) Mwanda waka milombelo mishilakane keilombangapo enka binenwa bitupu? (b) Le i bika bikakukwasha wimwene amba Yehova udi pabwipi nobe?
12 Ino yuka’mba milombelo mishilakane ilomba bivule, ke binenwapo bitupu. Ilomba ne malango a mu mutyima. Mu milombelo yobe, lombola buswe bobe bwa kyanga, bulēme bukatampe, ne kikulupiji kyokulupile Yehova. Kitatyi kyojingulula’mba Yehova walondolola ku milombelo yobe, ukemwena abe mwine byokwadipo uyukile amba “Yehova udi pa bwipi na boba bonso bamwitanga.” (Mit. 145:18) Bine, Yehova ukakufwena, ukakupa bukomo bwa kukomena dyabola ne bwa kutonga butongi buyampe umbūmi.—Tanga Yakoba 4:7, 8.
13. (a) Lelo kipwano na Leza kyakweshe namani kaka umo? (b) Lelo bulunda na Leza bukakukwasha namani ulwe na kuningilwa na balunda?
13 Tala pano kimfwa kya Cherie wamwene bukomo mwanda wadi upwene bininge na Yehova. Ku masomo a sekondele watambwile kikombe mwanda waingile senene ku masomo kadi watambile bu umbajinji ku makayo. Paapwile masomo, bamulaile kumufutyila masomo a inivelesite. Cherie unena’mba: “Adi matompo kulaibwa namino, kadi mukulu wa makayo ne bakwetu ba ku masomo badi bantonona ngitabije’byo.” Ino wajingulwile amba kulonda masomo malamala kwadi kumulomba kupāna kitatyi kyandi kyonso na kufunda ne kuteakanya bya makayo—ke kutyepelwa ne kitatyi kya kwingidila Yehova. Lelo Cherie walongele namani? Aye amba, “Pa kupwa kulombela Yehova, napelele kufutyilwa inivelesite, nashilula kwingila bu pania wa lonso.” Kupwa wingilanga bupania ke myaka itano. Unena’mba: “Nkialakanyangapo nansha dimo, ndyukile amba butongi bonatongele i busangaje Yehova ne kumpa nsangaji. Na bubine, shi utūle tumweno twa Bulopwe bwa Leza pa kifuko kibajinji, bintu bikwabo byonso bikakutentekelwapo.”—Mat. 6:33.
Mwiendelejo Muyampe Ulombola’mba
Udi ne “Mutyima Senene”
14. Mwanda waka mwiendelejo muyampe udi na mvubu ku meso a Yehova?
14 Muswelo wa busatu okokeja kulombola’mba wingidilanga Yehova na mutyima tō i mwiendelejo obe. Yehova weselanga bankasampe balama mwiendelejo utōka. (Tanga Nkindi 24:3-5.) Nkasampe Samwele wāpelele kwiula mwiendelejo umbi wa bana ba Edi Mupidishitu Mukatampe. Mwiendelejo muyampe wa Samwele wādi mumweke ku bantu. Bible usekununa’mba: “Ebiyampe nkasampe Samwele wenda utama, kadi wadi muyampe ne kudi Yehova ne ku bantu bene kumo.”—1 Sam. 2:26.
15. Lelo i bubinga’ka bumobumo bofwaninwe kulamina mwiendelejo muyampe?
15 Tudi mu ntanda miyule bantu ba kwisanswa abo bene, ba kapuni ka kwitatula, bampikwa kukōkela ba kwibabutula, kufwija kwine mpika, bampikwa buujila, ba bukalabale bwa malwa, ba kwitatula; ba kusanswa byamazua pakatampe kudi Leza mpika—i kutela’tu ngikadila imoimo itelelwe na Polo. (2 Tem. 3:1-5) Nanshi bikokeja kwikala bikomo bininge kodi kulama mwiendelejo muyampe nansha byotujokolokelwe na bintu bibi. Inoko, kitatyi kyonso kyolonga byoloke ne kupela mwiendelejo wampikwa bwine Leza, ulombolanga’mba udi ku mutamba wa Yehova mu mwanda utala bubikadi bwa ntanda yonso. (Yoba 2:3, 4) Kadi uloelelwe pa kuyuka’mba witabijanga lwito lwa Yehova lwakwita na kyanga’mba: “Wami mwana, wikale wañeni ne kusangaja mutyima wami, amba nondolole yewa umpunika.” (Nk. 27:11) Pakwabo kadi, kuyuka’mba witabijibwe na Yehova kukaningisha mutyima obe wa kumwingidila.
16. Lelo kaka umo wasangeje mutyima wa Yehova namani?
16 Kaka umo Mwine Kidishitu witwa dya bu Carol walamete ku misoñanya ya mu Bible paadi ku masomo papo ukidi na myaka dikumi ne musubu, kadi bantu bamwene mwikadila wandi muyampe. Byaikala namani? Bakwabo ba ku masomo bamupunikile mwanda mutyima wandi wa mundamunda mufundijibwe na Bible wadi umukankaja kukatanwa ku mafetyi ne bisela bya kutumbija yabo ntanda. Mu bino byaba, e mwaadi umona mukenga wa kushintulula nkulupilo yandi. Myaka pa kupita’po, Carol watambwile kakanda katamba kudi mukwabo obadi nandi ku masomo amba: “Nadi nsaka kwisamba nobe ne kukufwija’ko. Būmi ne mwikadilo obe muyampe wa bu nkasampe Mwine Kidishitu, pamo ne kininga kyobe kya kupela myanda ya mafetyi a ntanda, kebyadipo bifyame. Abe ye Kamoni umbajinji kwiyuka nandi.” Kimfwa kya Carol kyatulumwine bininge mukwabo umo wa ku masomo, mwenda mafuku, nandi washilula kwifunda Bible. Walembēle Carol kamukanda amba pano kadi na myaka 40 kashā ubatyijibwa bu Kamoni! Pamo bwa Carol, banwe bankasampe balamete pototo ku misoñanya ya mu Bible dyalelo, mukokeja kukunka bantu ba mityima myoloke bayuke Yehova.
Bankasampe Batumbija Yehova
17, 18. (a) Lelo umonanga namani bankasampe ba mu kyenu kipwilo? (b) Lelo i bika bitengele bankasampe bakaminwe Leza?
17 Batwe bonso mu bulongolodi bwa Yehova pano pa ntanda ponso, tusangalanga pa kumona tununu na tununu twa bankasampe bapyasakene mu butōtyi bwa bine! Bano bankasampe baningishanga mutyima wabo wa kutōta Yehova na kutanga Bible difuku ne difuku, na kulombela, ne kwiendeja mungya kiswa-mutyima kya Leza. Bano bankasampe baleta kimfwa bakankamikanga bambutwile babo ne bantu bonso ba Yehova.—Nk. 23:24, 25.
18 Mu kitatyi kya kumeso, bankasampe ba kikōkeji bakabadilwa mu kibumbo kikatampe kya boba bakamona būmi mu ntanda impya ilaile Leza. (Kus. 7:9, 14) E mobakemwena madyese a ntanda ne miseke ne kwendelela kufwija’ko Yehova, kadi bakamona bukomo bwa kumutendela nyeke ne nyekeke.—Mit. 148:12, 13.
Le Ukokeja Kushintulula?
• Lelo dyalelo bankasampe bakokeja kwingila namani mu mutōtelo wa bine?
• Pa kusaka umwene mu butangi bwa Bible, mwanda waka kulanguluka’po kudi na mvubu?
• Lelo milombelo ikukwashanga namani ufwene kudi Yehova?
• Lelo mwiendelejo muyampe wa Mwine Kidishitu ukwashanga ku bika?
[Bipangujo bya Kifundwa]
[Kifwatulo paje 17]
Le wibidile kutanga Bible difuku ne difuku?