Kipangujo 3: Mwanda Waka Leza Undekele Nsusuka?

SHANDYA Ian wadi nkolwankolwa. Nansha Ian byaātamine na bisakibwa byonso bya ku ngitu, kādipo ukwatakenibwe mu ñeni na shandi. Ian unena’mba, “nkyadipo musenswe bininge, divule mwanda wa kutoma kwandi ne muswelo waadi wikele na mama.” Ian pa kutama, washilula kutatana kwikala’ko kwa Leza. Nadi nanguluka’mba, “‘shi Leza udi’ko bine, mwanda waka ulekele bantu basusuka?’”

Mwanda waka kino kipangujo? Nansha shi kudipo na makambakano mu būmi bobe, mutyima obe wa kuswa boloke ubwanya kutengwa kitatyi kyomona bantu bambulwa mambo basusuka. Inoko, kipangujo kitala pa masusu kikalanga na mvubu mikatampe, nakampata shi i abe ususuka pamo bwa Ian, nansha shi i muntu osenswe wabela nansha kufwa.

Le bamo baletanga malondololo’ka? Bamo bakulupile amba Leza ulekele’ko masusu mwanda wa kwitufundija twikale betyepeje ne ba lusa. Bakwabo nabo balañanga’mba, bantu basusukanga mu būmi bwabo mwanda wa bubi bobālongele pa kala.

Lelo ano malondololo alombola bika? Alombola’mba, Leza kateñwangapo na masusu asusuka bantu ne kadi ebalengejanga bakomenwe kumusanswa. Alombola kadi amba, Leza i ntapani.

Le i bika bifundija Bible? Bible unena patōkelela amba, Leza kafwaninwepo kulambikwa masusu asusuka bantu. Unena’mba, “pa kutompibwa kekukinena nansha umo’mba: Natompibwa na Leza; mhm; ke-muntu Leza kayūkilepo kutompibwa ne bubi, ne aye mwine mo monka katompangapo muntu, mhm.” (Yakoba 1:13) Na bubine, mulangwe wa amba Leza ufwaninwe kulambikwa masusu asusuka bantu keukwatañenepo na muswelo ulombola Bible bumuntu bwa Leza. Namani?

Ngikadilo mibajinji ya Leza i buswe. (1 Yoano 4:8) Pa kukomeneja uno mwanda, Bible unena amba Leza udi na milangwe pamo bwa ya inabana udi na mwana ku kyadi. Leza wipangula’mba, “lelo mwana-mukaji i namani avulaminwe wandi mwana wāmusha amba: Nkikasokolapo lusa pa kipa kya nda yami, a? Eyo, bene bano’ba padi bakavulaminwa, nanshi ami nkikavulaminwapo abe, ehe.” (Isaya 49:15) Le ulanga, inabana wa buswe ubwanya  kusanshija wandi mwana ku kusaka? Ino, mbutwile wa buswe ukalonga bukomo bwa kutyepeja masusu a wandi mwana. Ne Leza nandi mo monka, kalengejangapo bantu bambulwa mambo basusuke.—Ngalwilo 18:25.

Nansha nankyo, bantu bambulwa mambo basusukanga. Ubwanya kwiipangula’mba, ‘shi Leza witutele mutyima kadi wa bukomo bonso, mwanda waka katalula’kopo bintu bilengeja masusu?’

Leza udi na bubinga bwinebwine bwalekele’ko masusu endelela dyalelo. Tubandaulei’ko bidi bumo: Divule dine i bantu balengejanga masusu a bakwabo. Bantu bavule ba kibengo ne kasusu basusula bantu, kebadipo na mutyima wa kushinta mashinda abo. Nanshi pa kusaka amba Leza akatalule’ko bintu bilengeja masusu, ukonakanya bidi bano bantu.

Pa kushintulula mwanda waka Leza kaonakenye boba balonga bibi, mutumibwa Petelo wāsonekele amba: “Aye Mfumwetu kējengapo pa mwanda-wamulao wandi, monka mufwatakenya bamobamo pa mwanda wa kwija, mhm; ino utūkijije mutyima pa bānwe, kasakilepo’mba, nansha umo ōneke, mhm, poso’mba, bonsololo bafikile pa kwalamuka pa mutyima.” (2 Petelo 3:9) Kitūkijetyima kya Yehova Leza i kilomboji kya buswe ne lusa lwandi.

Inoko, panopano ponka Yehova Leza usa kulonga’po kintu. Ukalubwila ‘byamalwa kudi boba bakumwesha’ bantu bambulwa mambo malwa. Boba basusula bakwabo pampikwa mwanda “bakamona malwa ne malwa a konakanibwa kwa nyeke na nyeke.”—2 Tesalonika 1:6-9.

Ian utelelwe kūlu, watene malondololo asangaja ku bipangujo byandi bitala pa masusu. Byobya byaefundile byashintyile mumweno wamona būmi.

Shi usaka kuyukila’ko bivule pa mwanda mwine ulekele’ko Leza masusu ne byakalonga pa ano masusu, tala shapita 11 wa dibuku Lelo I Bika Bine Bifundija Bible? Ditūdilwe mwanda wa kusela pa www.mr1310.com

[Kapango pa paje 9]

Lelo Yesu Wānene Bika pa Mwanda Utala Masusu?

Yesu kālambikilepo Leza masusu aādi ususuka. Ino wānene bino bilonda’ko.

Yesu wālombwele amba Leza kapengapo bantu bambulwa mambo mfuto na kwibaletela masusu. Yesu wābelwile babela, bilema ne bampofu. (Mateo 15:30) Bingelengele byaālongele bitufundija bintu bibidi bya mvubu: Kibajinji, Yesu wāingidije bukomo bwa Leza mwanda wa kutyepeja masusu, ke mwandapo wa kwialengeja. Kya bubidi, Yesu wābelwile bantu na lusa. Kitatyi kyaāmwene bantu basusuka ‘webakwatyilwa lusa.’ (Mateo 20:29-34) Yesu wāmwekeje bya binebine milangwe ya Shandi pa mwanda utala masusu. Nanshi, kupityila ku binenwa ne bilongwa bya Yesu, tubayuka amba Leza uteñwanga Pamona masusu kadi Usakanga kwiatalula’ko.—Yoano 14:7, 9.

Yesu wālombwele patōka nsulo mine kutamba masusu mavule a bantu—Satana Dyabola. Yesu wānene’mba, “aye wadi ntapañani ne kungalwilo kwine.” (Yoano 8:44) Kadi Yesu wātelele Satana Dyabola bu “mulopwe wa panopantanda” ne bu “ñongoji wa panopantanda ponso.”—Yoano 12:31; Kusokwelwa 12:9.

Yesu wētupele kikulupiji pa kitatyi kine kikapwa masusu. Wāfundije balondi bandi kulombela amba: “Abe Tata wetu wa mūlu . . . Bulopwe bobe bufike. Muswidile mutyima obe mūlu ne panopantanda pene i monka.” (Mateo 6:9, 10) Kitatyi kikafika Bulopwe bwa Leza, kekukekalapo monka masusu pano pa ntanda, monka mokeekadilepo mūlu.

Mu kusokwelwa kwaāpele mutumibwa Yoano, Yesu wālombwele mukekadila būmi bwa boba bakekala mu Bulopwe bwa Leza. Mu kine kitatyi’kya, Leza “ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”—Kusokwelwa 1:1; 21:3, 4.