MUTWE WA MWANDA WA PA KIBALU: ÑENI YOTUBOILA KUDI MOSESA
Le Mosesa Wādi ani?
Le i bika byovulukanga mu ñeni poivwananga dijina Mosesa? Le uvulukanga . . .
-
mwana wa lukeke wāfilwe mu kitenge na inandi ku Munonga wa Nile?
-
nkasampe mwana-mulume wālelelwe mu būmi buyampe mu Edipito na mwana Felo mwana-mukaji—ino kāidilwepo nansha dimo amba wādi mwine Isalela?
-
muntu wāikele bu mukumbi ku Midyana mu bula bwa myaka 40?
-
muntu wēsambile na Yehova * kumeso a kimuna kitema mudilo?
-
muntu wāimene kumeso a mulopwe wa Edipito, ulomba pakubulwa moyo kulekelelwa kwa bene Isalela mu bupika?
-
muntu wāludikilwe na Leza asapule Mpupo dikumi pa Edipito kitatyi kyāfutulwile mulopwe wa Edipito Leza wa bine?
-
muntu wāludikile bene Isalela mu kuviluka kukatampe kwa mu Edipito?
-
muntu wāingidijibwe pa kukalañanya Kalunga Katyila?
-
muntu wāpele bene Isalela mbila dikumi ya Leza?
MOSESA wālongele bino byonso ne bikwabo. Ke kya kutulumukapo shi uno muntu wa kikōkeji i mulēmekwe bininge na bene Kidishitu, Bayuda ne Bamizilma!
Na bubine, Mosesa wādi mupolofeto wālombwele “nzuba mikatakata.” (Kupituluka 34:10-12) Wālekele Leza a mwingidije na bukomo bonso. Ino, Mosesa wādi muntu’nka na bantu bonso. Pamo’nka bwa mupolofeto Ediya wāmwekele pamo na Mosesa mu kimonwa kyāmwenwe mu mwingilo wa Yesu pano pa ntanda, Mosesa nandi wādi “umbya bu-muntu monka mo twikadile bātwe umbya bu-muntu.” (Yakoba 5:17; Mateo 17:1-9) Mosesa wātenwe na makambakano’nka na etutana, ino wēanekenye.
Le usaka kuyuka mwaālongele? Tala ngikadilo isatu miyampe yālombwele Mosesa ne ñeni yotubwanya kuboila ku kimfwa kyandi.
^ mus. 7 Yehova i dijina dya Leza monka modilombwedilwe mu Bible.
