Malondololo ku Bipangujo Bimanine pa Bible

Lelo bibwanika kwivwanija Bible?

Bible i Kinenwa kya Leza. Udi pamo bwa mukanda utamba kudi shabana wa buswe. (2 Temote 3:16) Leza i mushintulule mu Bible muswelo otubwanya kumusangaja, kine kyalekele’ko bibi ne bintu byasa kulongela bantu mu mafuku āya kumeso. Ino bafundiji ba bipwilo i banyengakanye bufundiji bwa mu Bible; ne mu uno muswelo bantu bavule balañanga’mba kebabwanyapo kumwivwanija.—Bilongwa 20:29, 30.

Yehova Leza witusakilanga tuyuke bubinebine bumutala. O mwanda i mwitupe dibuku dyotubwanya kwivwanija.—Tanga 1 Temote 2:3, 4.

Le i muswelo’ka obwanya kwivwanija Bible?

Kutentekela pa kwitupa Bible, Yehova witukwashanga tumwivwanije. Wātumine Yesu āye etufundije. (Luka 4:16-21) Yesu wākweshe bemvwaniki bandi bevwanije Bisonekwa ne kutela vese umo ne mukwabo.—Tanga Luka 24:27, 32, 45.

Yesu wāshimikile kipwilo kya bwine Kidishitu mwanda wa mwingilo waāshilwile wendelele. (Mateo 28:19, 20) Dyalelo, balondi ba bine ba Yesu bakwashanga bantu bevwanije byobya bitufundija Bible padi Leza. Shi usaka kwivwanija Bible, Batumoni ba Yehova bakasangela kukukwasha.—Tanga Bilongwa 8:30, 31.

Shi usaka kuyukila’ko bivule, tala shapita 2 wa dino dibuku: Lelo I Bika Bine Bifundija Bible?, dilupwilwe na Batumoni ba Yehova

[Kifwatulo pa paje 16]