“Mwikale Kulomba Nankyo Kikemupebwapo”
FWENAI KUDI LEZA
“Mwikale Kulomba Nankyo Kikemupebwapo”
Bana ba bwanga ba Yesu bāmunene amba: “Abe Mfumwetu witulombola mwakulombela.” (Luka 11:1) Pa kulondolola, Yesu wāletele byelekejo bibidi bitufundija muswelo wa kulombela pa kwivwanwa na Leza. Padi kodi mwiipangule shi Leza wivwananga milombelo, nabya malondololo a Yesu akakusangaja.—Tanga Luka 11:5-13.
Kyelekejo kibajinji kimanine pa muntu ulomba. (Luka 11:5-8) Mu ino mānga, muntu wātambwile mweni ke bufuku bininge, ino kādipo na bidibwa bya kumupa. Kudi mufikilwa uno mwanda wādi ulomba kampeja-bukidi. Nansha nsá byoyādi ke mipite, waenda ku njibo ya mulunda nandi mwanda wa kwapula mikate. Mulunda nandi wāpelele dibajinji kubuka, mwanda kisaka kyandi kyādi ke kiponene mu tulo. Ino mufikilwa waendelela kulomba na kininga kufika ne byālangukile mulunda nandi ne kumupa byakudya. *
Le kino kyelekejo kitufundija bika pa mwanda utala milombelo? Yesu witulombola amba tufwaninwe kūminina—ko kunena’mba kwendelela kulomba, kukimba ne kukokola. (Luka 11:9, 10) Mwanda waka? Lelo Yesu wādi ukimba kunena’mba Leza upelanga kwivwana milombelo yetu? Mhm. Mulangwe wa Yesu i mwishile na wa uno mulunda wēkakile, Leza udi na mēlu a kwitabija kulomba kwendele’mo kwa boba balombela na lwitabijo. Tulombolanga luno lwitabijo na kūminina. Shi tulomba kitatyi ne kitatyi, tulombolanga’mba tusakanga bya binebine byobya byotulomba ne amba tukulupile amba Leza uketupa’byo—shi i bikwatañane na kiswa-mutyima kyandi.—Mako 11:24; 1 Yoano 5:14.
Kyelekejo kya bubidi kimanine padi Yehova “Wivwananga kulombela.” (Mitōto 65:2) Yesu wāipangwile amba: ‘Shi kudi bānwe mwana alombe kudi shandi mwita ino amupe nyonka’mba ke mwita’ni? Ebiya pakwabo, shi alombe dī, kadi amupe kaminye?’ Malondololo adi padi tō—ke kudipo mbutwile wa kilelo ubwanya kupa bandi bana bintu bibi. Penepa, Yesu waingidija kino kyelekejo amba: Shi bashabana bampikwa kubwaninina bapa babo bana “byakwibapa biyampe, lelo Shenu wa mūlu ke pepi, keye mwine ukakija kupana mushipiditu sandu ku bakumulomba?”—ke byabuntu bilumbuluke—bimulomba bandi bana ba pano pa ntanda kadi! *—Luka 11:11-13; Mateo 7:11.
Le kino kyelekejo kitufundija bika padi Yehova, “Wivwanga kulombela”? Yesu witwita tumone Yehova bu Tata wa kilelo udi na mēlu a kuvuija bisakibwa bya bandi bana. Nanshi, batōtyi ba Yehova badi na bwanapabo bwa kumufwena mwanda wa kumulomba bintu bidi ku mityima yabo. Kadi byobayukile’mba wibasakilanga biyampe, betabijanga bukidi-bonka malondololo aebalondolola ku kulomba kwabo, nansha shi malondololo keakwatañenepo na byobadi batengele. *
Butangi bwa Bible bwa mu Kweji 4
[Kunshi kwa dyani]
^ Kyelekejo kya Yesu kilombola bibidiji ne bilongwa bilongekanga mu būmi. Bayuda bādi bamwene kwikala na kizaji bu mwingilo ukola. Kisaka kyādi kitēka mikate mifwaninwe ya kudya pa difuku, o mwanda bādi bavudile kwiapwija shi bidibwa bibakoma. Kadi shi bādi balanda, kisaka kyonso kyādi kilala panshi mu kyumba kimo.
^ Divule dine Yesu wāingidije kishima “ke pepi” pa kulanguluja bantu—binenwa binenanga muntu mutyetye kudi muntu mukatampe.”
^ Shi usaka kuyukila’ko bivule bitala pa muswelo wa kulombela ne kwivwanwa na Leza, tala shapita 17 wa dibuku Lelo I Bika Bine Bifundija Bible? dilupwilwe na Batumoni ba Yehova.
[Bushintuludi pa paje 11]
Leza udi na mēlu a kwitabija kulomba kwendele’mo kwa boba balombela na lwitabijo
