Yesu I Mulombole mwa Kwikadila na Būmi Budi na Kitungo

‘Nanga mwānangile Yesu.’—1 Yoano 2:6.

MONKA motwesambile’kyo mu kishinte kibadikile, Yesu wāikele na būmi budi na kitungo. Nanshi shi tusaka būmi bwetu bwikale na kitungo, tufwaninwe kwiula kimfwa kyandi ne kuteja madingi andi.

Na bubine, Yehova witusoñanya tulonge namino enka na mulombwela’kyo kisonekwa kidi kūlu’ku. Kunanga na mwānangile Yesu kulomba kwiendeja mu būmi bwetu bonso mungya kimfwa kyandi ne bufundiji bwandi. Kulonga namino kuketukwasha twitabijibwe na Leza ne kwikala na būmi budi na kitungo.

Mu bufundiji bwa Yesu mudi misoñanya ibwanya kwitukwasha tunange na mwaānangile. Tutana ino misoñanya mivule mu Busapudi bwandi butumbe bwa ku Lūlu. Tubandaulei’ko bidi misoñanya mityetye ne muswelo otubwanya kwiingidija mu būmi bwetu.

MUSOÑANYA: “Dyese dyo dyabo bakulandapala pa mutyima.”—Mateo 5:3.

MUSWELO UTUNTWILA UNO MUSOÑANYA KU BŪMI BUDI NA KITUNGO: Yesu wālombwele amba bantu basakilwa nyeke kuyuka Leza. Tusakanga kuyuka malondololo ku bipangujo pamo bwa bino: Le i kika kyotwikadile’ko? Mwanda waka kudi masusu mavule pano pa ntanda? Lelo Leza witutele mutyima binebine? Le kudi būmi pa kupwa kufwa? Tusakilwa kuyuka malondololo a bino bipangujo pa kwikala na būmi budi na kitungo. Yesu wādi uyukile’mba kudi nsulo imo kete ikulupilwa kubwanya kutanwa malondololo a bino bipangujo—ke Kinenwa kya Leza kadi. Yesu wānenene mu milombelo yaālombele kudi Shandi amba: “Mwanda obe kyo kyabinebine.” (Yoano 17:17) Le bine Kinenwa kya Leza kibwanya kwitukwasha tuvuije bisakibwa byetu bya ku mushipiditu?

KIMFWA KIMWEKE: Esa byaādi kaimba utangidile kisumpi kya bakayi ba minjiki, wādi mu dishinda dya kwikala kaimba wa bwino wa minjiki ya rock. Nansha nabya, Esa wāmwene amba kudi kintu kampanda kyabudilwe. Unena amba, “Nansha byonādi nsangedile kwikala mu kisumpi kya bakayi ba minjiki, ino nadi ngabila kwikala na būmi budi na kitungo.” Ino mwenda mafuku, Esa wetena na Kamoni wa Yehova. Esa unena’mba, “nāmwipangwile bipangujo bivule. Natengwa na malondololo andi mapotoloke kadi a mu bisonekwa, ebiya naitabija kwifunda nandi Bible.” Byobya byēfundile Esa mu Bible byāmutengele ku mutyima ne kumutonona apāne būmi bwandi kudi Yehova. Unena amba, “pa kala nadi ntanwa kyaba ne kyaba na makambakano ne tusua. Pano ngidi na kitungo kya binebine mu būmi.” *

MUSOÑANYA: “Dyese dyo dyabo boba balusa.”—Mateo 5:7.

MUSWELO UTUNTWILA UNO MUSOÑANYA KU BŪMI BUDI NA KITUNGO: Lusa i kulombola bakwetu kinyenye, kwikala na kanye ne kwibakwata na mutyika. Yesu wāivwanine boba bādi basakilwa bukwashi lusa. Pa kutononwa na lusa lukatampe, wākwete dibajinji mpangiko ya kunyongolola bakwabo mu masusu. (Mateo 14:14; 20:30-34) Shi twiule Yesu na kwikala na lusa tukekala na būmi budi na kitungo, mwanda boba bevwanina bakwabo lusa bamwenanga’mo nsangaji. (Bilongwa 20:35) Tubwanya kulombola lusa ku bakwetu kupityila ku binenwa ne bilongwa byetu bya kanye, ne kunyongolola boba basakilwa bukwashi bwetu. Lelo kulombola lusa kuketwikadija bine biyampe?

KIMFWA KIMWEKE: Ba Maria ne wandi mulume Carlos, i bimfwa bya bantu ba lusa. Shandya Maria i mufwilwe mukaji, kadi mu myaka ya panopano wadi’nka mu butanda bwa misongo. Ba Maria ne Carlos bamuselela kwabo kwinjibo ne kuvuija bisakibwa byandi byonso. Babudilwe’nka ne kulala tulo mu mafuku mavule, enka ne kupēlakana kwenda nandi ku  lupitalo kitatyi kyaakambakanibwe na misongo ya dyabeta. Banena’mba, kyaba kimo badi bakoka bininge. Ino badi na nsangaji’nka na mwānenene Yesu, mwanda baloelelwe bininge pa kuyuka’mba bavuijanga bisakibwa bya shandya Maria.

MUSOÑANYA: “Dyese dyo dyabo boba bakupwanya.”—Mateo 5:9.

MUSWELO UTUNTWILA UNO MUSOÑANYA KU BŪMI BUDI NA KITUNGO: Kwikala ‘wa kupwanya’ kushintulula pa bute pa bute kwikala ‘muntu uleta ndoe.’ Le muntu uleta ndoe ubwanya namani kwikala na būmi budi na kitungo? Kintu kimo bidi, tudi mu kipwano kilumbuluke na bantu betujokolokele. I biyampe tuteje madingi a mu Bible a amba: “Shi kyendelemo, nankyo mwikale ne ndoe ne bantu bonso.” (Loma 12:18) Mu bano “bantu bonso” mubadilwa bantu ba mu kisaka ne bantu bakwabo kebadipo na nkulupilo na yotudi nayo. Le kwikala mu ndoe na “bantu bonso” kuketwikadija bine na būmi budi na kitungo?

KIMFWA KIMWEKE: Langulukila pa kimfwa kimweke kya mwana-mukaji witwa Nair. Watenwe myaka mivule na makambakano mavule atūdile bukomo bwandi bwa kulama ndoe pa ditompo, na kampata mu kyandi kisaka. Nansha byamunyemene wandi mulume pano ke padi kintu kya myaka 15, watamije bandi bana kasuku. Wandi mwana umo wadi utoma bitomibwa bikolwañana, ulonga nyeke byasaka ne kutūla inandi ne mwanabo mwana-mukaji mu kyaka. Nair ukulupile amba, byobya byāefundile mu Bible byāmupele bukomo bwa kwikala muntu upwanya nansha ke mu ino ngikadilo ya matompo. Katompangapo kwipatana nansha kulwila nandi pa bintu kampanda. Uloñanga bukomo bwa kwikala wa kanye, wa lusa ne wivwana bakwabo. (Efisesa 4:31, 32) Witabije amba, kwifunda kwikala muntu upwanya kwāmukweshe ekale mu kipwano kilumbuluke na bantu ba mu kisaka kyandi ne bantu bakwabo.

TA MUTYIMA KU BINTU BĪYA KUMESO

Shi tulonde madingi a tunangu a Yesu, tukatana nsangaji ne kuloelelwa mu būmi. Inoko, pa kwikala na būmi budi na kitungo kya binebine, tusakilwa ne kuyuka byobya bitutengele kumeso. Penepa, būmi bubwanya kwikala na kitungo namani shi tuyukile’mba tukanunupa mwenda mafuku, kubela ne kufwa? Bine, ino i myanda ifikanga mu būmi bwa mu ino ntanda.

Inoko, kudi myanda miyampe! Yehova ubikīle boba bonso balonga bukomo bwa ‘kunanga na mwānangile Yesu’ madyese mavule. Yehova ulaile’mba panopano ponka usa kuleta ntanda impya ya boloke, mwine mukekala bantu ba kikōkeji kukwatañana na mpango yandi kobadi—ke kwikala nyeke na bukomo bwa ngitu bubwaninine kadi. Kinenwa kyandi kinena amba: “Talaipo bidi, kipema kya Leza byo kidi pa bantu, ne ukēkalanga nabo, nabo bakēkala bantu bandi, ne Leza mwine ukēkala nabo, ke Leza wabo kadi. Kadi Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”—Kusokwelwa 21:3, 4.

Maria, mwana-mukaji wa myaka 84 utelelwe mu kishinte kibajinji mu bino bishinte, usangedile kwikala na kyepelo kya kumona kufikidila kwa bino binenwa. Le abe nobe? Le usaka kuyukila’ko bivule pa mwanda utala “būmi bulumbuluke”—bukekala’ko mu Bulopwe bwa Leza? (1 Temote 6:19) Shi i amo, nena Batumoni ba Yehova ba mu kyenu kibundi nansha kulembela boba balupwile dino dipepala. *

[Kunshi kwa dyani]

[Kifwatulo pa paje 7]

Maria ne Carlos

[Kifwatulo pa paje 7]

Nair